من تونس الخضراء الى بلاد بشار

السلام عليكم ورحمة الله وبركاته

يا كثر ما نسمع مشاكل با الاخبار =يالله عساها ما تقرب جهتنا
يالله تاقا بلادنا شر الاشرار = والمسلمين الي على شاكلتنا
عبر محطات الفضاء بث الاقمار = مصايب بلاد العروبه فجتنا
من تونس الخضراء الى بلاد بشار =وسائل الاعلام ما طمنتنا
والاردني عنده حصل عج وغبار= والدوله الي مقلقه خاصرتنا
متشابكه مابين حاكم وثوار = ونبي نجنبها ولا جنبتنا
ايران با الاحداث تضرب لها اوتار = وتبي توسع والهدف منطقتنا
ثوره ورى ثوره بلا سابق نذار = هذي تمسينا وذي صبحتنا
يا ثاير الثوار في بعض الاقطار = نبا نتخاصم والحكم عاقلتنا
الامن نعمه والتظاهر له اضرار = وتضيع فيه الصايبه بغبرتنا
هدم القبب هين ماهو مثل الاعمار = نصبر وندعي في صلاح انظمتنا
يابو عرب لو جاك من غرب تيار= الغرب مصلحته قبل مصلحتنا
ماهمه الا النفط وافواه الابار = والله يالولا النفط ما عبرتنا
قال انت دارك دار وافين الاشبار =حكومتك يا ليتها حاكمتنا
بضلال ابو متعب ذرى الشعب والدار = يا ليت مثل ولا يته واليتنا
الدين له منهج وللدوله شعار =با الله وللاسلا فيها ثقتنا
الحكم فيها راسي مثل سنجار = ما يزع زعه زوابع زعزعتنا
لا تعاتب الثوار في كل ما صار = ما في وطنكم مثل ما بوطنتنا
ابلادكم في حكم الاسلام تندار = وحنا بقانون البشر هاينتنا
انتم ولي الامر ما دونه جدار = وحنا عساكر قبته حاربتنا
تلقا البلاد يديرها خمسة انفار = عصابة لحقوقنا محرمتنا
مابين مسترزق وتاجر وسمسار = متحكمين بدارنا الي ربتنا
صرنا بضاعه في محلات تجار = دوله تساومنا ودوله شرتنا
عشرين عام وكثرها نشرب امرار =وملجمين افواهنا با السنتنا
شفنا القهر والذل تكرار تكرار = واحرق بنفسه تونسي وقهرتنا
ومن تونس الجاره لدار ابن مختار =ثارت على حكامنا ثايرتنا
وتكشفت قدامنا كل الاوكار = تونس ومصر وليبيا ثالثتنا
والكشف باقي به حكومات كثار = يلحق من اولنا الى تاليتنا
سالتني عن دافع الملح والنار = وهذا ختصار وباقي بمشكلتنا
عد الصحيح وقلت يا كثر الاخطار = من كل صوب وصوب متكانفتا
الشرق شيعة فرس والغرب كفار=لا خوان دين ولا لغتهم لغتنا
متحالفين وحلفهم سر وجهار = اطماعهم فا ديارنا ما خفتنا
وان ما حكمنا الشور من بين الاشوار =تغيرت بين الدول خارطتنا