الرصاص المشاويك

ماعندنا غير الرصاص المشاويك= ومهندِ يكسر صليب العظامي
ماهمني بالوقت هرج الصعاليك= لاصار مالي بالذخيره حزامي
الحر يبقى حر يفرق عن الديك= وماتنفع الرجال كبر الاسامي
ان كان مايقدر يحل الشرابيك= عليه لاثار العجاج السلامي
ياهن قلنا من عوارف بني خيك= يمكن يجي عاقل يحل الخصامي
هذي سنه هجري علينا تماديك=فاق الخيال وفاق حد النظامي
لقيت بالعجه خبولٍ تباريك= عن الرجوله والكرامه صيامي
واليوم ياعش الصلب والمماليك=بيض الرخم من شهب عرج الحمامي
ولمت للقاله قصير البلاجيك=ومزهب المدفع بعيد المرامي
بين العيون وبين مقرن علابيك= كاويك في مكوا على النار حامي
أنشدك بالله وين غابة حماريك= ذبيت عنها الريع شرقٍ وشامي
شكواي للمعبود ماتقل تعنيك= عنها أنشد اهل العرف واهل المقامي
غشك ونشك جاهل ٍكان يمليك=كلام من ناتج بنات الظلامي
واليوم مايبغى مع الناس طاريك= لو تزهمه يرفع عليك الحسامي
باعك من اول سوم معاد يشريك=هل الدموع وعض راس البهامي
حظك عن اعلوم النشاما برك فيك= وخلاك تنبح كل حرٍ قطامي
ما قل دل وماذكرته يكفيك=اترك كثير البربره والاثامي