ديوان الشاعر محمد عبدالمحسن البدراني

عسى غر المزون اللي نشت ثم جالها ربـان = علـى نجـد العذيـه تنتثـر ويلـوح بارقهـا
يشق القاع ماطرها ويروي وبلهـا الوديـان = وعلى روس الجبال تسوق وتغطي شواهقهـا
ثمان ايـام والبـراق يبـرق والمطـر ودان = وروس المزن ضافيتن على نجـد ومناطقهـا
ابيها تكتسي بالعشـب وتربـع بهـا البـدوان = وأبي راع الجهـام يجيبهـا للنبـت سايقهـا
مجاهيمًٍَِِآ لياقامـت تدافـع كنهـا الضلعـان = عريضات الخدود اللي طويلـن حـد عاتقهـا
وسنامن منفهق لخلاف من ردم الشحم مليان = واذانيها كمـا حربـة شجيعـآ قـام يذلقهـا
سنادآ من وبرها ينسجون البيت ابـو عمـدان = طويلات الغوارب شامخـهَ سبحـان خالقهـا
مجاهيمن حموها حرب في حد الحدب شامـان = على رد العدا دايـم جمـوع الخيـل نصفقهـا
صواريم الحرار اللي على دوس الوغى شجعان = رعت نبت الخطر في ضفهم محد(ن) يضايقهـا
تمرجح في مراتع نجد وإن طمعوا بها العدوان = صناديـد النشامـا دونهـا تفهـق بنادقـهـا
ندلهها ونرعاهـا وترخـص دونهـا الدمـان = ليا جت سربـة الطمعـان راكزتـن بيارقهـا
يشوق العين شوفتها لياصكت على الحيـران= بروض(ن) مخضرآ ترعى وتقطف من زمالقها
انا شفي طرب راسي ليافـج الدجـى فجـران = ادق الجيب سلف لديرتن من صغـر عاشقهـا
لياجيت بشعيبن سايلن تطـرخ بـه الغـدران = بواكير الوسامي فـوق قاعـه هـل دافقهـا
اشب النار واشعمها وصف بجالهـا الرسـلان = نحيفات الوسوط اللي سنى النيـران محرقهـا
ابمشي في فيافي نجد واقطع نـازح الخليـان = وأزهب بندقي لاجيت برض الصيـد وافهقهـا
ابستقطع له الجره ولا شفت ابـرق الجنحـان = امد اللـي ندبهـا لـو تطيـر بعيـد يلحقهـا
وأبى اخاوي هل الطولات واترك خوة الرديـان = قصيرين الشبور نشـوم عنهـا مانصادقهـا
وأبى اغني وأجر الصوت وأنظم فاخر القيفـان = أبسبح مابدالي من بحـور الشعـر واطرقهـا
فعول الطيب والمقناص وطاعة ربنا الرحمـن = هوى نفسن أدلهـا عـن همومـن تزارقهـا