خيانت الضمير

ياصاحبي وانت قدرك في خفوقي كبير=لكن ترى الظاهر ان الامر فيه التباس
وشلون يصير شياً بالعقل مايصير=ماتعرف الفرق مابين الذهب والنحاس
دام النوايا بخير الجسم كله بخير=لكن تشين النوايا يحصل الانتكاس
والعين هي مبتدأ النكسه لعقل البصير=وإبليس يدخل على المخلوق مثل النعاس
ولما تخون العيون يخون حتى الضمير=ولما يخون الضمير تموت كل الحواس
ومن كان عقله براسه مايبيله شوير=ياخذ من اهل التجارب بالحياه اقتباس
ياشين طبع العشير اليا غدر بالعشير= الصاحب اللي على قدر المحبين داس!
وشلون ابا اعيش من دونك وقلبي كسير=هل يعقل الادمي يعيش من دون راس
الدرب هذا خطير ومن مشى به خطير=اللي تنكر لناسه مات من غير ناس
ياصاحبي مابقى عندي كلامٍ كثير=وراك مشيتني درب الخطأ من الأساس
اثرك تلعب عليه مثل لعب الصغير=ماتدري ان القلوب يصير فيها يباس
وانته حبيبي خلقك الله بالاوصاف غير=عطاك هاك الجمال اللي تقل بالمقاس
ياباهي الحسن مالك في وصوفك خشير=الله عطاك الجمال اللي لبسته لباس
حسن(ن)يفوق الخيال وملمسٍ كالحرير=والمظهر اللي عن العمسان يجلي العماس
من جسمك المسك والريحان حتى العبير=واظن كثرة جمالك له عليك انعكاس
لكن مادام انت الاول بالغلا والاخير= الله يسامحك لو الامر فيه اللتباس