ماحاكاة الهجوس......نايف بن مياس

يا هجوسٍ ليامني بغيته=راق للبال لو ماهو برايق
كنه الطير لا صحت ودعيته=خابرٍ عند صقاره علايق
عارفٍ قدر طيري ماشويته=من حرارٍ مواكرها عرايق
سم جوز الحباري لا لقيته=عادة الحر تفريق الشقايق
لاطلب تل مسباقه عطيته=كل صيده من اللجه لحايق
لاضرب صيدته ضربه مميته=الثنادي يخليها شلايق
بين جمع الولع معروف صيته=مارس الصيد في عدة طرايق
القصيد ابتلاني مابليته=ما اختلف بين مستانس وضايق
وهبة اللي خلقني ماهويته=والتوافيق من رب الخلايق
بس انا زدت علمه واحتويته=وامتلك له شهادات ووثايق
افهم النص لا مني قريته=واعرف النور من نار الحرايق
واتقن القاف لامني بديته=واختمه مايكلفني دقايق

نايف بن مياس الفريدي