ردي على الشاعر السهم الحربي

السلام عليكم ورحمه الله وبركاته سبق ان السهم نزل قصيده وعنوانها غزليه ممنع
دخول الشيبان ومن الدعابه قال شاعرنا الكبير مضحي بن جمران ممازح السهم بثلاثه ابيات
وجاريت شاعرنا مضحي ورد الشاعر اللي انا اعتبره شاعر كبير ومتمكن السهم الحربي علينا جميع وبعد عودتي من مهمه عسكريه وجت رد السهم اللي اتشرف ان الرد عليه حيثه من شاعر كبير ومتمكن

الهواء والعشق مانتم ضمن جيله=
دامكم شيبـان خلـوه بحراجـه =
ودورو سوق المساويك الجليلـه=
كل واحد مطلبه حسب أحتياجـه =
مضحي الجمران داله مع عميله=
ولايغير قايـد الريـم أنتهاجـه =
حسب قوله مكتفي بأحسن بديله=
له مسـار ولايفكـر بأزدواجـه =
عارف أن السيل لاعـدا مسيلـه=
يغرق الشاوي ويسحب من نعاجه=
والمجاري يطمر براس النثيلـه=
وأن غشاه الليل ماولع سراجـه =
يرهبـه سرحـان لازاد بعويلـه=
ولاوطاه الخوف مايعرف خراجه=
إن غزوه القوم ماينطـح قبيلـه=
و لاسمع صوت التفق لاذ بزراجه=
المشوك ياسعـد حـذرا تشيلـه=
لو تشيله ماج قلبـك بأرتجاجـه =
وأعرف أن الدم يعرف بالفصيله=
والقلوب أما حجر وإلا زجاجـه =
والسهم خلوه يطرب مع خليلـه=
كلها شهريـن ويحـدد زواجـه =

ردي على السهم

ياقلمنا وف لطلاب كيله=من بلاد الهند والا من سفاجه
ادري انه يرقب الضلع ويميله=له على عاليه وقفه ودراجه
مير حنا نشفي الكبد العليله= نعرف النادر من فروخ الزراجه
ماحدونا من لهم وطيه ثقيله =عارفين البير عذبه من هماجه
شاعراً ماسار مع دربٍ بديله =اسمه الاصلي على عالي نتاجه
يوم شاف العام بالاوضاع ميله=مارضي ركب المسامه والحداجه
يالسهم راع العواجه ماحبيله=ظربتي يالقرم مع مقرن حجاجه
وانت ماحصلتلك بالدرب زيله= مع عدال الدرب والا بنعواجه
لو صغير السن بالطرقه دليله= دق سلف الجيب من داخل كراجه
ونحره نجد العذيه قبل ليله= مايلفلف بالحواري مع زناجه
وصاب راس الذيب في عيطاء طويله= ماخلط سهم العرب مسكه بداجه
صح من قال الفتى من طبع جيله =بالرجوله والهقاوي والغناجه
قاله اللي يعرف العيص ونخيله=مايدس الراس في يوم المواجه
ومن يدسه مالنا بالامر حيله= والسكوت اخير من كثر الجاجه