للشاعر مصلح بن براك الحربي آه يـا حسرت(ن)دفنتهـا بالضميـر

آه يـا حسرت(ن)دفنتهـا بالضميـر=مثلما تدفن الرمـلاء ولدهـا البكـر
اشتكيت المخدة واشتكيـت السريـر=كيف ابرقد لا صا رفراش نومي جمر
قالت امي تعالج وانت رجل(ن بصير)=ارق نفسك!!! وانته كم تعالـج بشـر
كم مريض(ن)لفانا فيـه شر(ن)كثيـر=بعد رقيتك طاب . وللقرايـة شكـر
سـدري عايـشـن فــي سـديـر=ما يعالـج بلايـه زيـت والا سـدر
إن سكت قلت هذا شيخ قوم(ن)كبيـر=وإن تكلـم كلامـه تقـل ينظـم درر
هيبته وسط ربعه مثل هيبـة وزيـر=كل حوله كوابك غيـر هـو القمـر
لا هو اللي طويل ولاهو اللي قصير=وإن نظرني بعينه قلت فيهـا سحـر
ليتني طيرواكفخ في جنا حي واطيـر=بس آخر جداية غيـر اكتّـب شعـر
آه وا رجلي اللي ما تطيـق المسيـر=يا غلايه عشيريك غارق(ن)في بحـر
بحر عشقك وحبك يا عيوني غزيـر=كل طبي وعرفي عن علاجي قصـر
ارحمي من يحبك من سموم الهجيـر=لا يطوّل غيا بك لا يطـول الهجـر
لا اوصلتني رسالة منك جاني بشيـر=امسحي دمع عاشق فوق خده حـدر
قلت يا يم إبنك مـن عذابـه خطيـر=ماهي عيون حاسد؟؟فيه عين الخـدر
رمح حبه بقلبي حـد راسـه شطيـر=شق صدري وعلااااااا لين شق النحر
كل شربي بدونه همج لو هو غديـر=والثواني بدونه فـوق حسبـة شهـر
كيف ابا ارقد وليلي مثل ليل الكسيـر=اقضي الليل افكر لين حـار الفكـر
ترقدالناس حولي غير طرفي سهيـر=إنطفأ نور وجهي من عذاب السهـر
الآمل يا غلايـة بالعلـي القـد يـر=بين كاف(ن) ونون بحكمتـه لا آمـر
لا دعيته بيكشف كـل أمر(ن)عسيـر=وهو يجعل خيالك في منامـي يمـر
آه لو ترجع سنيني وعووود صغيـر=يوم نكتب سطر !!!!ثم نترك سطـر
غير احط القصايد والهوى وسط بيـر=ثم اعيش بحياتي حر وآموت حـر!!!
ماهو اقعـد سنينـي للمحبـة اسيـر=وانتظر منك نظرة يوم عيـد الفطـر