ليه هدف بس الهدف ماتحقق !!!!

يالله يا والي على كل والي =يالخالق المعبود فأول وتالي
يالعالي الهادي عليك اتكالي =رجواك يامن من ترجاك ماخاب
مشيت في دربي ولا أنظر ورايه =وعيوني اثتين نور ومرايه
والعقل في رأسي علم لي ورايه=ولا لي عن دروب المقادير مجناب
عقلتها من قبل والأمر كله =في يد من يعلم بكثره وقُله
والله ليّا وفق لشيٍ تُصله =واللي غشاه برحمته ماله حساب
مشيت فالدنيا بطولا وعرضا =وضلعٍ نعدي به وننزل بأرضا
والحال هذا كان مفروض فرضا=فوقي سما والأرض من تحتي تراب
ليه هدف بس الهدف ماتحقق =قابلت رجالا وثوبه مشقق
والله لطف بغيت معه اتوهق =آثره حظي والقراده له ثياب
قلت انت وش جابك ورايه ورايه=قال إنت يالمجنون ما بك درايه
لو رحت وحدك اعتبرها زرايه =ولابى اتزرا فيك واروح فعتاب
قلت انت متعبني سنينٍ طويلة =ولا فيك خير وشيل مثلك حفيلة
لاكن مالي في مثيلك وسيلة=غير الصبر والصبر ياكيف ينجاب
طال الجدال ولا لقينا لها حل =اليا عقدت العلم جنبي له يحل
اقول له بالله عن وجهي تحل =يقوم يضحك قال عارضك ما شاب
من جلستي تكيت كان يتمدد =وانه يعاندني وبي يتعند
قال استمع علمٍ جديدٍ تجدد= لو انسدح ادخلك في جوف سرداب
قلت العذر ياحظ وش ناقص العلم =اللي حصل يكفي ومنك اتعلم
لا تنسدح واقعد معي بنتكلم =لا طبت ياحظي ولا خاطري طاب
بكيت لين الدمع غرق عيوني =عن حالتي ياناس لا تنشدوني
الحلم صحاني وقمت امغبوني =والعلم مفتاحه مقاسه على الباب