عزتي له من تبكيّه اللحون السامرية ...!

السلام عليكم ورحمة الله وبركاته
مساء الخير
أهدي لكم هذه الابيات وكلي أمل ان تنال الاعجاب والاستحسان

عزتي له من تبكّيه اللحون السامريّه= كل ماغنا تكدّر ساعة احبابه طروا له
من يلوم اللي بكا له غالي ابطا في مجيّه = والرجل منّا دموعه ماينزّلها بسهوله
ابدوياً ماتولّع غير في عشق ابدوية = عشق يرفع عن طمانه دام كلن من حموله
يوم انا من روس قوماً ماتدوّر للرديّة = ماخسرنا بالرهان وكاسبين بكل جوله
لا انتخت فينا هنوفاً قلنا ياوين المنيّة = غطرفي يابنت حنا كل حقاً لك نطوله
عايشين بعز و امن ومارضينا بالخطيّة= وان لقينا مالقينا جينا باعدادن مهولة
للخوي مافينا منهو قد تخلى عن خويّه = مضرب الامثال حنا في ميادين البطولة
المراجل كنزنا اللي منْه أنفسنا غنيّة = ماجهلنا غير خبلاً دلك اخباله افعوله
ماعلى الباقين زود من الأصول اليعربيّة = موطني موطن يفاخر دوم في كثرة زحوله
مير هذا العشق لاجا القلب مامن مقدريّة = كيف جار بنفس رجالاً من اسبابه ملولة
من غياب اللي هويته صارت احوالي شقيّة = ولّ ياحظاً ردياً بيننا نوّخ ذلوله
طمنوني ..بشروني عن غلاي وناظريّه = علموه اشلون حالي واني منتظراً وصوله
الجميل اللي جماله ماخلق بالناس زيّه = عين ..قد.. وحلو خد..وغيرها يازين طوله
جاذبية مع براءة ..خف دم.. ونرجسيّة = مالك ازمام الجمال ومسرجاتن به خيوله
قاهر اقلوب العذارى بالوصوف الساحريّة = من كثر زينه وغيره مايبيه ايصير حوله
كنه البدر التمام اللي ظهر بالليل ضيّه=لو يحل بكل حفله يذبح الناس ابحلوله
يوم يرقص ويتبختر في جنون وفاعليّه=ميّل اقلوباً ومالت كلما اترف في ميوله
كم ذبحهم في جماله والبلا في حسن نيّه=ماكسب غير الدعاوي لعنبو من ذمّ زوله
بس ويلي لا التفت لي مدري ويش ايصير فيّه=كني الطفل الصغير اللي تجّمد من ذهوله
جا يذمّه لي عذولي وقتها جتني حميّه=وانتخت فيني طيوفه : علمّه مقدار قوله..!
غاب عنّي من سنين ومابقالي من بقيّه=كود دمعاً لاطريته تغرق اثيابي سيوله
وش يرده غير خلاً ماهو ابنجد العذيّة = راحل ويطري عليّه كل مابي حال حوله
لا ذكرت اللي مضى لي من الليال الشاعريّه= ليلنا من موج شعري لابدا أرخى سدوله
لاتعبت من القصايد..قال: لاتبخل عليّه=قلت:انا كلي لعينك ياقوافيّ اركعوا له
جبت له عشرة قصايد:قال لالا..ابغى ميّه!=تكفى..تكفى ياحبيبي..!هات مرجانك ولوله
يومن ابحرت ابقصيدي التفت..! ثم قال ليّه: =هذي اروع ماسمعته يا يديني صفقوا له..!
لاوربي..! ذيك أحلى..! مدري هذي..! مدري ذيّه..!=وألا تدري..! شعرك..! وكلك .. وكل اللي تقوله..!
آآآآه وينه..! واهنيّ اللي بقربه..! واهنيّه=من غيابه غبت كلي والفرح أجهل أصوله!
آآآآآه ليته كان عندي..! غير اضمّه في يديّه..! =شايفه نجماً بعيد وماقدرت أني أنوله..!
مايلام اللي سواتي ياللحون السامريّه=كيف مايبكي عليهم بالقصيد اليا طروا له..؟!

تحياتي للجميع
أخوكم
فايز السليمي