السالفه ياخلف ترجــــــــــع ورى وتروح قدام

خلف:=
سلام منـّـي على نايب حرسنا بدر الاسلام=العدل طبعه وعش ياشعب في حكم الشريعه
الليله الملعبه مفتوحتن للخـــــــاص والعام = واللي يبي يمترح مسموح وأرض الله وسيعه
صياف:=
يامرحبا بالنيابه عن حماة الشــرق والشام = واللي يبى يقــــطع الإسلام يبشر بالقطيعه
الليله الملــــــــعبه بنتن عليها خرص وزمام = واللي مايمشــــيلها بالعلم الابيض ماتطيعه
خلف:=
صياف خلك حـــــــذر لاتنعثر في زرع الألغام = ترى التردد على الغلــــطات ياحـربي شنيعه
وأباآسمك وسم يبقى يالحريبي طول الأيام = وإليا نشدك الغريب فـــقل ترى هذي طبيعه
صياف:=
السالفه ياخلف ترجــــــــــع ورى وتروح قدام = وأنته تلد العيــــون ولدتــــك ماهـــي سريعه
ياللي نويت الوسوم أرتاح وأذكر وسمك العام =اللي على الكـــبد حره كنها شوك النقيعه
خلف:=
بعض السوالف تروح وتنطـــــوي طيات الأفلام = وإليابغــــــــيت الشريط أقوم وأجيـبه وأذيعه
لي ضربتن لو على غيـــــرك ثمان أيام ماقام = وأنته تحمـــــــــل ولو تشعر وتدري بالهزيعه
صياف:=
ياكثر ماتجــــــــــــمع الأفلام مير السيل دمام = وأنا لو إني رفيـــــقك ماقدر أعملبك صنيعه
ماتضــــــــرب إلا غشيمن مابعد صلى ولاصام = ولا الرجاجــــــــيل تطلع فالمراقيب الرفيعه
خلف:=
خلك على الظن لاترميبك الفتــــــنه والأوهام = ثم تاخذ الصفقه اللــي من موجها سريعه
عينك صغـــــــــيره ولاتدري تحــــــــــت الأقدام = ترى الشراره تســــوي فالبيوت أكثر وليعه
صياف:=
أصلح لسانك قبل نحكم عليك بحكم الإعدام = تراي لو ألتفت يمك تضـــــيق إبك الوسيعه
عيني تشوف الهوايل مير أظن الظلم هدام = أشوف خمسه عيون وشفت عينك بالطليعه
خلف:=
حكمك ماهو حكم أخو نوره محطم روس الأصنام = دينك ياقرد الحجاز برخص تشريه وتبيعه
عينك ماهــي عين حرن يطرح الصيده لياحام =عين الحصـــــــيني ليا منه دفن رزقه بريعه
صياف:=
لاوالله ألا بلاك الله وصـــــــار براسك خـــــطام = لاكن بعد عن القـــــــــناص ياظــبي الوديعه
لاوالله نبى نكـــــــتب عليك بروس الأقـــــلام = يالين ذاك الرضـــــــــيع يطلع البنت الرضيعه
خلف:=
أنته تحلم وألا عنــــــــدي خبر تفسير الأحلام = لاوالله ألا غديت اليــــــــــوم والصبح وتبيعه
وش علمك للكـــــــــتابه وأنت لا ناقص ولاتام = ماتعرف ألا حطــب ينبع لا فاخــــــــت ربيعه
صياف:=
فتش صحنك المغطى ثم تلقى خبز وإيادم = والتمر وســـــــــط العيابه الثانيه تسمع قريعه
لعل قسم العتيبي صار من خيرات الأقسام = المســـــــــــــلم تحده الأيام ومحمد شفيعه