شكوى لغير الله يقين فلسها

هـــــم بروحي ســـمها وافترسها=فرس الجراد المخـضرات الفياضي
ساق وتساقا بالضمير وعـمسها=والحال من جور الهواجيس قاضي
عن بعض هومات المراجل حبسها=ابغى النهوض وصار صعب انتهاضي
يالله ياخلاق سبع بحرسها=ومن مثلهن مديت سبع الاراضي
وارسى رواسيها وثبت اسسها=من خوف ردة فعلها بإنتفاضي
وقدر وزاد اقواتها مابخسها=يعطي ويمنع ماعليه اعتراضي
ارجيه رجوى مخلص ماغمسها=نفسه عسرها للنقا والبياضي
يبدل لنا شهب الليال ونحسها=بأيام تنسينا شقى كل ماضي
شكوى لغير الله يقين فلسها=ومن شك قلبه مابه ايمان فاضي
مشرك ولو كل المناهج درسها=ومغضب ولي الكون وابليس راضي
وعن سنة الهادي دروبه عكسها=وله حياض النار عدة حياضي
يالآدمي دنياك يرهب شرسها=لو تعجبك ماتمهلك بالتغاضي
فكر بها في كل حكمه وقسها=مافات منها للبشر مايعاضي
كم خير منها المراره لحسها=عقب البراد استاقته للرماضي
دنيا دنيه شرها في نفسها=طويل وازماته طوال عراضي
تضحك وتبكي عقب لذة ونسها=منها كوايا العبد دايم نجاضي