تركي الشيخ .... عبد الرحمن السمين (( محاورة معنى ))

هذه محاورة قوية جرت بين الشاعرين الكبيرين / تركي الشيخ و عبد الرحمن السمين

تركي الشيخ=
يامرحبا بالسمين اللي يغيـب ويبيـن=لو نعـذره كـل خلـق الله ماتعـذره
احترت باصاحابنا اللي بين خشمٍ وعين=لكـن كـلٍ علـى تقديـره انـقـدره
عبدالرحمن السمين=
لعلكـم للبقـا يـا أصحابنـا الطيبـيـن=وأمـور الأنسـان بيـديـن الله مـدبـره
لا احترت أنا بضمن أن الحب يرجع طحين=لكـن لا تبلـش القرطـاس والمحـبـره
تركي الشيخ=
ماتخطي اعيون تباع الاثر يالسمين=مثلك وشرواك لازم كل يوم اسبره
عساك حصلت في مغزاك كنزٍ ثمين=يومك تلالي مع الفرسان ياعنتـره
عبد الرحمن السمين=
أثرك شاطر وعينك شوفها خطوتيـن=لا تنقر الزيـر ونسميـك بالمنقـره
الحمد لله ليا داحمـت جنبـي متيـن=ماني سوى اللي ليامن راح جاك خبره
تركي الشيخ=
ياطير ياللي تهاجر كل فتـره وحيـن=في كل ديره توقع فوق غصن اشجـره
ما لك على الارض جره ياطويل اليدين=طالب وكلٍ بصم بصمه علـى دفتـره
عبدالرحمن السمين=
يا طير ياللي جناحينك ما تكمل ثنين=الخشم مترين مير الغش بالحنجـره
يا كثر هرجك ولا شفتك ببدر وحنين=العيب للمستحـي والـدود فالمقبـرة
تركي الشيخ=
اصبر تعلمك يالجاهل صدوف السنين=مادام ذي هرجتك مال للعلوم اثمـره
(احياناً اقول شعره ناشبه في عجيـن=واحيان اقول العجينه ناشبه بشعـره)
عبد الرحمن السمين=
اللي براااسه يبنط فوق ظلع القريـن=يستاهل وشاربه بالطيب مـا غبـره
أحيان أقول أنت يلعبك بليس اللعيـن=وأحيان وجهك رضي ويدينك مسمًره
تركي الشيخ=
حيلتك ماعاد تخفى الناس يابا الحصين=الذيب فوق الرجم والصقر في ماكـره
علامة الاعور الدجال وسط الجبيـن=لكن لاطاح في يـد المسيـح احشـره