يازين كلن في شقا القلب مكلوف

يازين كلن في شقا القلب مكلوف=مقسوم والمقسوم مافيه حيله
الولف مرسومن على القلب بحروف=والنفس عيت تنتهي مستحيله
من يوم شفتك بالمريدي على الشوف=كني على يازين حام المليله
يازين تقل أني عن الدرب منسوف=بعاصوف قدام الحقوق المخيله
مثل الحذيف اللي مع البير محذوف=في بير ولا من علو الطويله
ولا الهليك اللي على ند ناطوف=لاريب عنده بنقطاع العقيله
ياغض سرب شوف عيني ولا شوف=صوبت قلبي بالعيون الضليله
ياغض لاتضيع مع السرح معروف=ياغض مردود الجميله جميله
شبيت في صدري من النار سانوف=من واهجن من نار نارن شعيله
ياغض كيف أروح والقلب مخطوف=راجع دليلك يوم تاخذ دليله
وأقول ليته مقضي الحال منصوف=وتصير حالك مثل حالي نحيله
وليا ذكرت أصغير الصدر وردوف=وصفن شعا قلبي وضيع دليله
لاضره الله ناعم العود غطروف=مازون ماثقل مدقن يشيله
ياعنق ريمين على دربه أخشوف=سرعه يخم أذريعه من جفيله
عين أشقرن يدعى على راس شغنوف=متفهق الجنحان عوق الجزيله
ياصغير النهدين والوسط ملهوف=ملهوف منك القلب واعزتيله
صبري قضى وصبح على نفسي الخوف=بصدري مثل سيلن تسكر مسيله
أقول وسمعلك عسا بحالي أتروف=راع الهوى ألمن حبله يشتكيله
لون بسلوم الهوى صارت أصدوف=قامت هباهيب الهبايب تهيله
وماعاد بالدنيا بقي غيركن نوف=ماشوف غير مغذيات الجديله
ويازين فكر وفهم الصح ليطوف=لا تصير ساري ليل ماينوميله