ارفع سلامي للحضور اللي وقف واللي قعد

احمد الحماد =
ارفع سلامي للحضور اللي وقف واللي قعد=عد النبات اللي تخالف بالفياض ازهورها
الله يوفقنا رضا الجمهور وادروب السعد=واللي قضب راس المطيه يعتلي في كورها
صياف الحربي=
يامرحبا واهلين ياحماد مدري ياحمد=تبغا الليالي والليالي ماعطتك انحورها
انكان عندك سالفه حييت ياهذا الولد=وان كان ماعندك سوالف طلعتك ابزورها
احمد الحماد =
ياطيب حضي يوم جاء صياف مدري وش بعد=حتى نبيع ونشتري والناس من مقدورها
عندي علوم تبهج الخاطر ومجهود وجهد=تجلي على الكبد العليله حرها ومرورها
صياف الحربي=
ياطيب حضك يوم جاك اللي يعلمك العدد=يبقا عليك اتحج مكه والمدينه زورها
انا من البارح اخيل البرق واسمع لي رعد=واثر وراه الحيه اللي طلعت دنقورها
احمد الحماد =
مانيب ياصياف مثل اللي عن النار ابتعد=اشاور اهل المعرفه واسمع بأذاني شورها
والحبل ياصياف كان انه تلوى وانعقد=اللي يحل المشكلات اللي تدور بدورها
صياف الحربي=
انت وردت وفيه من شاف وابيار ولا ورد=وانت اليا جيت العرب تعطيك من ميسورها
نبي تدوس السالفه دوس الرجال الي الابد=اضنها عن داخل الدوسه تصيح اسيورها
احمد الحماد =
الله عليه المتكل والله عليه المعتمد=خذها وعطنيها وصدري من وساع اصدورها
الخيل جددنا حذاها والجلد عان الجلد=اما تبين افعولها ولا تبين عثورها
صياف الحربي=
صاحبك في ليلة عشر مدري صحا ولا رقد=والنار لاشالو حطبها ماتفوح اقدورها
الليله الحماد زود في كلامه واعتقد=يحفر عن اعظام الجنايز وانسدح في قبورها
احمد الحماد =
الحي له عين تشوف الدرب مافيها رمد=مايرحم إلا اللي خلق خلقه وهو مامورها
قبل التجارب ماحدِ يفرق اسعيد من سعد=والناس في ماجوبها ماتذخر مذخورها
صياف الحربي=
لو قلت اكتب سند ماني بكاتب سند=الملعبه تكثر عليك جروحها واكسورها
ترى السحابه كل ماتمطر نزل منها البرد=والجيش تسري واشدته ثابته في ظهورها
احمد الحماد =
انا اللي إلى وعدت ياصياف مااخلفت الوعد=ماعادتي مااصبر على ميل الليالي واجورها
وردن عليك الظاميات ودر بها الابيض جرد=ارو الظوامي غزير اجمامها وابحورها
صياف الحربي=
انكان تعرف سورة الاخلاص قل الله احد=اظنها تكشف لك الدرب البعيد بنورها
بكره تبي تعرف عيال ابدو وعيال البلد=ونطلع اللي يقطع الغبه على بابورها
احمد الحماد =
مافيه مسلم مايعرف ان الله الصمد=مانيب من ناس تضيع افكارها واشعورها
ماعادتي مادخل يدي بين الحيايا والرصد=مايسلم اللي يحارش الديبان جوف اجحورها
صياف الحربي=
ارفع حجاجك فوق وانظر لابن ادم والهدد=الناس لاهزت مبانيها تطيح اقصورها
الصاحب اللي نعرفه حتى الشهاده ماشهد=ياليت راعي الفاطر الوضحا مايكسر كورها