الله يادنيا .. دنيـه .. غريبة=خليتي الداني على رأس مرقاب

الله يادنيا .. دنيـه .. غريبة=خليتي الداني على رأس مرقاب
العام يخطي قول وآخر يصيبه=واليوم يسخر من طويلين الاشناب
عزاه ياصاحب يخلي صحيبه=ويحط يامال الفناء باب وضباب
أنا أشهد إنه عَقْب ذيك اللهيبة=مدفون مابين الشِّوِيَّة والأطناب
دايم محله في قطار الكتيبة=ولاينحسب له فالمواقيف بحساب
بانرفعه ياربعتي بالقصيبة=تقدير غيره ما في مثله تعجاب
وليا جروحه غادية به عطيبة=لعل ذاك الوجه ماهو لنا باب
وياربعتي ماهي فرية وغيبة=قالوا قديم .. وبعد عدُّوه شياب
ثنتين في الرجال أكبر مصيبة=الغدر والبهتان مابين الأجناب
وثنتين والله عند حرب الحريبة=القن والقانون في كل الأسباب
ياحرب والله مارضيت الغليبة=عندي مكانه بين ناب(ن)ومخلاب
لكن رجاوي يعتني به طبيبه=ويحط له مع الدواء حرز وكتاب
ويربط لسانه والله اللي حسيبه=وإن عاد زفَّت ماعن الدرب مجناب