صياف الحربي و لاحق الزويهري

تحيرت ياصياف مدري وش ابطاك=تحيرت ياصياف وش ذا المغيبـه
انا ربي أعطاني كما ما الله اعطاك=ومن هو يجيه الخير يعطي صحيبه
انا ما تحير يابن الاجواد لـولاك=وشهوات الأنفس يالهذيلي صعيبه
إليا أعطاك ربك عز دينك ودنياك=وطالع بعينـك للديـار القريبـه
أنا عارف إنك تبدي للخير يمنـاك=وهذي على الأجواد ماهي غريبـه
نزلت البحر والله من الموت ناجاك=ولا زم تصدق من عروض المصيبه
أنا أشوف في جيبك ثلاثين مسواك=وهذي مع العربان قصـه عجيبـه
نزلت البحر قدام دورات الأفـلاك=وجهزت للمخطي سهـومٍ عطيبـه
أبعطـي ذاك المسـواك والحـظ يبـراك=ومـدت صحيـب لصاحبـه مــا تعيـبـه
أنا شفت مسراح وأنا شفت مضـواك=ولا أدري ويش شفت من ذا الكسيبه
عليك الله اكبر كلهـا مـا تعـداك=ولكن إنك الليله قاضبلـك قضيبـه
عدوك رماك برمح صابك ولاأخطاك=ولكـن دور لـك طبيـب وطبيبـه