لاجيه دام سبوت رجلي معافاه

*هاجد ولد نايف دعاني محبه*
*وجيته غلا من طيب راسه ومجناه*

*والله لو دونه من اليم غبه*
*او حال من دونه صحاري ومضماه*

*مع كنة الجوزا وحامي مهبه*
*لاجيه دام سبوت رجلي معافاه*

*سلام يابلسم جراحي وطبه*
*مالاح براق الحيا ونتثر ماه*

*اخترت لك من صادق الهرج لبه*
*بجزل البيوت الهادفه والمقفاه*

*يامحزمي بيامي المشلهبه*
*الياعطاني وقت الاهوال علباه*

*والزيت جا يامسندي من يصبه*
*من فوق نار ٍ تاكل العود والحاه*

*وبان الصديق وبان راع المسبه*
*طاح القناع وبان وجهه وشفناه*

*يسامعين القول دق المنبه*
*في مدح من مدح الرجاجيل يزهاه*

*اجيب نبذه صادقه مستحبه*
*الصدق دايم للرجاجيل منجاه*

*راعي كرم للضيف فاتح مشبه*
*لامره الطرقي قلط ماتعداه*،

*وعن واجبه ريع الخلا مايذبه*
*للكايده كلن بجنبه تمناه*

*رجال في غيره حشا مايشبه*
*لين جناب وتفعل الطيب يمناه*

*ماخالف سلومه والا دين ربه*
*نهجه سليم الله يعزه وياقاه*

*من عزوة ٍ كم راس تطحن لحبه*
*يوم الاصايل للمعارك محذاه*

*اهل المليحا من قرينه لعبه*
*تدفن له الركبه نهار المثاره*

*يقبل من الفسقه هديره يقبه*
*ويرجع يلج ارغاه وادي تمثناه*

*واليوم كل اوضاعنا مستتبه*
*الامن سايد والرخا والمساواه*