عسى لساني دمت انا حي ما انعاه

قصيدتين ردية حول وعكة صحية المّت بالأخ حسن ،
البدع من حسن والردّ مني محمد:

مريض يابن العـم من قبل مـدة
و ما جاء من الله يامحمد قبلناه

و اليوم بن عمك طريح المخدة
يشكي على الله من كثير المعاناة

عسـاه ياجي بالفـرج بعـد شـدة
و يبدل اللي صار بالعفو و رضاه

يــا رب بـاب الـشـر عـنـا تسـده
و افتح لنا باب الفرح و المعافاة

وان جاء القدر ياشيخ ماحد يرده
راضيـن فيـمـا قـدر اللـه و هَيّـاه

يـالله لا تـقـطـع حـبـال المـودة
بيني و بين اللي على قلبي اغلاه



الــرد

جـتـني رسـالـه من رفيـقـن نـعـده
مثل الذهب في مصرفـه من غـلاه

فالطيـب و المعروف ما فيـه قـده
يـاللـه تـشفـي بـو علـي من بـلاه

يـا وارث المعروف من عهـد جـده
ما واحدن في الجِمْـل ريتـه تعـداه

واطلب من الله في الرخا وأيّ شده
انـه يـعديـك المـرض هـو و بـلـواه

يـالشهـم ياللي وافيـن كـيـل مـده
عسـى لساني دمت انا حي منعـاه

اما المرض يا خـوك ما حد يصده
لـو كـان راجـل و اللـه آنـا اتحـداه

.