عن عيون المشفح يارفيع الشان مخفيها

الشاعر يوسف بن عبيد الفريدي

الا يا هاجسي حضر جنونك والعباد رقود

بقى لي كلمةٍ وحده ولاني عنه مخفيها

يابن دومان بعض البيض صارت فالحقيقه سود

ومثلك عارف الدعوى وش اللي حاصلن ٍ فيها

خبولٍ الناس قامت تفتري والمسلمين شهود

وربك يعلم النيه وظاهرها وخافيها

ترى الخرتيت طابخها وعيت فالقدور تجود

وحنا نعرف اللي كان طابخها وشاويها

رحمك الله ياوقتٍ مضى ليته عليك يعود

به الشيبان واهل السلم ليت الله يحييها

*****************************
سعد المحمدي

يعيش الشاعر اللي يعرف الحاوي من المردود

عليه اهل التحايل والمهايط ماتمشيها

سكوته من ذهب واليا تكلم للكلام حدود

ولد عود ٍمع اهل الطيب ياخذها ويعطيها

يايوسف خلها تبرا مع الديره هذاك الذود

مسرحها الصباح العصر مايقدر يضويها

وسيع العرف مثلك يعرف الغايات والمقصود

وقليل العرف لاجاب السوالف مع مثانيها

لقيت الورده اللي وسطها حط الغبي عبرود

على شرواك مايقدر مع العجه يمشيها

عطيتك من ملخص سالفتنا مثل ريح العود

عن عيون المشفح يارفيع الشان مخفيها