اشوف في بعض التغافل عباده

*علي دين وجيت سداد لدين*

*حول السنه وانا اتحرا سداده*

*والحمد للي يسره ياحمر العين*

*ياطيب الرفقه قوي الاراده*

*العام ياصالح طليق الحجاجين*

*زرعت زرع وحان موعد حصاده*

*وانا على رد الوفى للوفين*

*حريص جعل ايام عمرك سعاده*

*سيفن تحده ياصعوط المجانين*

*مواقفن تحتاج صبر وجلاده*

*سلام من سكر نبات ورياحيين*

*صدق المشاعر والمحبه قناده*

*يعم بالمحفل جميع المراوين*

*مافيه نقص ولا يجيبه زياده*

*اهل السطر ومرجحين الموازين*

*لاسل مسنون الشبا من غماده*

*اكرام وابناء اكرام قومن عزيزين*

*يستاهلون الوافيه والاشاده*

*ابيوتهم مثل الجبال المعايين*

*مزبان في حر الزمان وبراده*

*في ظلهن بعد السهر ترقد العين*

*عين الدخيل اللي بعيده بلاده*

*يامن تبي مني دليل وبراهين*

*عندي لخطلان الايادي شهاده*

*مصادري فيها من الشعر بيتين*

*من مصدر الاحداث قولي وكاده*

*ماجيب غير اللي عليه المضامين*

*وماكل ماسمع به يتم اعتماده*

*صادق وماليه مع الناس وجهين*

*واشوف في بعض التغافل عباده*