الشيخة اللي تستحق البياضي .

بسم الله الرحمن الرحيم


هذه القصيدة قلتها بمناسبة تعيين الشيخ عبدالله بن طعيميس
رئيس لمركز الذيبية خلفاً لوالده رحمه الله

يا الشعر عن واجبك ما فيه مدراق=اليوم لك ماقف وواجب وحاظي
لي سنة مشتاق واخيل براق=بين القصيم وبين ضلع الرياضِ
يسوقه الغربي وللشرق ينساق=ومع سكرة الغربي على نجد ياضي
اشكر صحيفة حرب من كل الاعماق=ممثلة با الأخ بدر العياضي
زفت لي البشرى وانا كنت مشتاق=اقرأ قرارٍ ما عليه اعتراضِ
تعيين شيخٍ له بالامجاد معلاق=معلقٍ بالمجد حاضر وماضي
ولد رباح اللي على الطيب سبّاق=شيخ الشيوخ مقضفين العراضي
شيخة فعل ما هي بما شيخت الاسواق=الشيخة اللي تستحق البياضي
ينقذ بها معسر ويعتق بها اعناق=ويحذي اللي يشتكون الرماضي
ومبروك يا معشوقةٍ عند عشاق=انشهد انك من بناتٍ حظاظي
حزتي على شيخ المكارم والاخلاق=وغيرك عليه تضيق سبع الاراضي
شيخٍ لمدحه تتفق كل الاذواق=مافيه بيتٍ عنه ماهو براضي
مدايحي يمه سريعات وسباق=تارد لأبو نواف ورد الحياضي
ومني لعبدالله تحية وميثاق=وتدوم ياللي للمراجل تحاظي