أنا رهين الهوى وش عاد لو تنصحوني

يا أحباب أنا يوم أغني من فضلكم سامحوني =خلوني أبوح ما كنيت عبر اللحونا
خلوني أنثر دموع الوجد من ماء عيونـي =و أقول يا عاذلي ما قدر الله يكونا
أنا رهين الهوى وش عاد لو تنصحوني =من قبل ما طعت قول اللي عنه ينصحونا
عز الله اني من الفرقى غميق الطعوني =مستدخلن علتي و الناس ما يعلمونا
أحبابي اللي على الشهد المصفى غــذوني =شالوا و قفت قوافلهم عقـب ولعونا
راحوا و لا باقي إلا اللي ورايه و دوني =صفحة عهودن مع الذكرى تزيد الشجونا
ياليتهم قبل اودع من شف بالي عـطوني =بس اتركوني مع الفرقا رهين السجونا
حسبي على اللي على درب المخاطر حدوني =على رماح الفراق اموسعات الطعونا
تكفون يا أهل النجايب على الركاب اردفوني =خلوني اشوفهم بين السلف و الضعونا
و ان مت يا أهل الركايب قدامهم شيـعوني =نوحوا عليه و قولوا هذا قتيل العــيونا
قولوا يقول المحب اللي يموت امغبونـي =حيل الله اقوى و حسبي على الذي فرقونا