الطيب طبع ولايجي بالصناعه

هرجٍ هزيل ولايجوز استماعه = لو يزهمك راعيه لاتقول له هاه
يلحقك شره عند قوم وجماعه = كان استمعت لعلم تنقص مزاياه
يامدعي بالطيب عندك مناعه = مهما تقول العلم تطلع خفياه
قد قلت لك يوم المواقف شجاعه = الطيب قدمك وانتبه لاتعداه
الطيب طبع ولايجي بالصناعه = ولا كل من وده على الطيب سواه
كم واحدٍ يعطيك هرج القناعه = وفي ساعة اللازم ترى تهاب يمناه
ايبين علمه في مضاريف ساعه = عرق الردا تله على وسق علباه
لو طال عمره بالزمن ماستطاعه = عنده خلل في داخل القلب يحداه
الطيب يعطى مع حليب الرضاعه = يربابه المولود في حزة صباه
يبقى مع الرجال مثل الوداعه = أحدٍ يحفظ العهد واحدٍ تنساه
واللي حريصٍ منزله بالرفاعه = عند العرب كلٍ يعده وينصاه
يصبر على جور الحمل والمجاعه = مايترك النوماس لو جاه ماجاه
واللي يبيعه مثل بيع البضاعه = هذاك طيبه حسب تصريف دنياه
يومٍ شرى بالطيب يومين باعه = من وين ماهب الهوى شال دعواه
الله وكبر لو تذيع الاذاعه = مايبلش الرجال في صوت الأفواه
كان انقطع حبلٍ يعز انقطاعه= وإلا وردنا عد راهي على ماه