ثلاث ماودك بهن للغالي =لو اليالي ماشيه عكسيه

مع التحيه والاحترام لكل من شرفني بالتواجد
املي ان تنال رضاكم

يقول منهو لا بداءالقافيه =ماتاه فكره بين ذيك وذيه
يسوقها سوقن يسر السامع=تلايدن متوارثه جديه
تارد على البحر الغزير الراهي = ونحمد الله دايمن مرعيه
اقولها والله عليم وشاهد =ويعلم بغيب اصدورنا والنيه
سبحان من ينشي السحاب وساقه =ويحيي هشيم القاع بالوسميه
امنت به وايقنتبه وابدابه =ساعة تهيض خاطري عصريه
يابدر هذي دار عمي حامد = هذي منازل راعي البريه
الي دلاله في وجاره تشهد =وضون يبشر بالعشاء الطرقيه
وهذي منازل من يضد العايل =حمدان لاثارت جموع الهيه
راحو وخلوها ولحدن دايم = والموت سنه والبشر مقفيه
العمر سكه والابنادم عابر =واقدارنا بيامنا مخفيه
مريت فيها والهجوس اقفتبي = ياوي قلبي يابدر ياويه
والله يسلم من بقى بالحله =والرجل يبقى دام ناره حيه
ويقول منهو لاتضايق غنا =وعاف الدروب الضيقه الملويه
امر مرن في حياتي شفته =لا حدك الطيب تزور العيه
لكن على شان الرفيق الطيب =نحلها لو انها مثنيه
من شان عين نقول تكرم ديره =ولا نهدم احصون الوفاء المبنيه
انا اليا شفت الرفيق الوافي =امشي على حسب المبادي زيه
والله ماخيب هقوته لا جاني =لو انها ما مورتن منهيه
هذي وصايا من تبعت ادروبه =ياحي من ذكره ينومس حيه
ابوي قبل ايموت كد وصاني =يقول تكفا قدر الجاهيه
الرجل لامن الرجال اطلبته =يعطي طناخت راس والا حميه
وبعض السوالف ماتبرد جاشي =لو انها بحلا العسل مطليه
اقيسها وامشي واميز دربي =واخذ حسابي لو لها حوليه
وان شفت ماعفته نخيت اجناحي = وخليت دار الي يحك رحيه
يموت غيض اليا سفهة الجاهل =واعطيه حقه واحفض الي ليه
ياكثر من غر العيون بشكل =لادق بسامه على الطاقيه
لكن اليامنه لاتكلم باين =يبين لك ماتخفي الشخصيه
وثلاث ماودك بهن للغالي =لو اليالي ماشيه عكسيه
الاوله طيبن يحدر الوادي =لامات محصول الوفا بقنيه
والثانيه لاصار جرح جنوبه=من اخر الي يمسك الجنبيه
والثالثه ياالي قريت حروفي =حاجه ورا الي نظرته دونيه
وايامنا نوبن تزين وتعطي = وفيها نعيش احلامنا الورديه
وياشين صكتها اليامن صكت =ومنها بشمطان اللحى ماريه
ويارب يالي ماسجدت لغيره =اعوذبك من زلتن عفويه