قصيده في حفل زواج الشاعر..خالد الحصني

يالله جملني وروح مجمل = بين البعيد وبين كل موالي
حيث الجماله عد جمه راهي = عليه مايارد قصير احبالي
وأنا حبالي تاصله باذن الله = متنوش دلوي لا وقفت الجالي
من الحجاز اديار ابوي و جدي = ماجيت لشهره وجمع المالي
ماجابني غير الوفاء والرفقه = بحفل زفاف اللي علينا غالي
خالد خوي الجنب نعم الخوه = قرم ِمعرب بين جد وخالي
مبروك ماسويت جعلك تسلم = عسى السعاده والهناء لك فالي
امين ياسامع دعاء من يدعي = يعالمٍ بالغيب والاحوالي
وعود للحفل الكبير الهايل = مدام لي مخرج ولي مدخالي
سلام يالحضار كلن باسمه = مغلفٍ من ورد غصنه مالي
لاذعذع الغربي وحرك غصنه = يشم ريحه كل طيب فالي
سلام فيه إنعم ماخصينا = كل الحضور الجالسين اقبالي
على شرف راع الوفى والجيره = الله جمعنا والعلوم اجزالي
في ليلة ٍ ياطبيها من ليله = ياهل الكرم جينا كريم اسبالي
الطيب لاهل الطيب دايم عاده= نقولها وغيري لها من قالي
خالد ولد موسى عريب المنسب = دايم صحونه لضيوف اثقالي
ربعه لهم قدر ومقام وهيبه = بالوقت الاول والزمان التالي
نعم بهم حتى تقوم الساعه = اهل المواقف والمقام العالي
مدلهين الاجنبي عن داره = صحيح مابه شك والاجدالي
الدهمشي قدام اقوله قاله =كلام من كل الشوايب خالي
ليه ذكر قصه لجده ظاهر = فيها يسولف في محل ارجالي
عن ماذكرلي جبت روس اقلامي =ماهي سوالف خايب ٍمحتالي
وان جيت مع باب الكرم والشيمه =حصنان فيهم تضرب الامثالي
وقت الحرايب ضد للحرابه = تركي على الخصم العنيد الصالي
يتلون منور والنعم في منور = راع الكرم للكايده حلالي
شيخ ٍمحله لنشاما منصى = بالطيب معجز والصحيح يقالي
حفيد شيخ يوم قاد الغاره = خلا الجنايز مالها شيالي
فارس يهابه بالمواجه خصمه = والخيل من فعله يجيهااجفالي
لو كل مسمع بالقلم سجلته = الشرح في بعض الحقايق طالي
ماقل دل وما ذكرته موجز =عن سيرة أهل الطيب والابطالي