والا يا شعر حضر لي جنودك بنزل الميدان

عبدالمحسن الجابري =
والا يا شعر حضّر لي جنودك بنزل الميدان=أنا من عزوةٍ وقت الملاقى مـا يهابونـه
بعد ما غاب نجم سهيل والمرزم بعد ما بان=لعل الجدي يبقى كل خلـق الله يشوفونـه
محمد البدراني=
أنا والله مالي نفس اغنيها على القيفـان=كمن الذيب يالنشمي نهب له قرم بالسنونه
اظنك مانويت تركب الحبه على النشيـان=لكن انك ماكذبت سهيل غاب وقفت ضعونه
عبدالمحسن الجابري=
ترى ما أحدٍ غصبك انك تجر الصوت بالالحان=لو ان الذيب ثورت السواري باوسط عيونـه
ابكتبلك رسالة دام ما انته قـارئ العنـوان=لابد يطيح يم الغـرب نجـم انتـم تعرفونـه
محمد البدراني=
تشوف الناس ذاك اليوم مافيهم احد طربان=تشوف أن فارس بن دليم بالوالد يعزونـه
أنا ماقرا رساله ياولد جابر بـلا برهـان=رساله من طرفكم ياطويل العمر مديونـه
عبدالمحسن الجابري=
عسى الله يرحم اللي مات ويجازيه بالغفران=انا ما اعرف فارس بن دليم اللي تطرّونـه
أنا ما ألومها لا جنبت عن دربها العميـان= عاذرك فيها والوجيه البيض مصيونـه
محمد البدراني=
نبادل لك الدعاء والله يبعدنا عن الاحـزان=لكن العلم طافك ماعرفت حساب مضمونه
الى منك بنيت البيت ملزوماً على السيسان=ولا أنا عاذرك بالفاضيه ومعيض تعرفونه
عبدالمحسن الجابري=
والا يا بن عويض قالوا انا بالعدود اخوان=اقوله والعرب يا صاحبي مثلي يقولونـه
أبينلك هدفها وأنت تنكس يا رفيع الشأن=أحسبك توصله لكن اثرك تطيح من دونه
محمد البدراني=
وردت لك عدودن مير شفتك ياولد بلشـان=كما انك من رجال الكيل يامحسن يزيدونه
يقولون الرجال أن السفينه في يد الربـان=وأنا اقول أن بعضهم بس يومي له بغليونه
عبدالمحسن الجابري=
بعدضاع الهدف بالثانيه ياربـي العقـلان=ياليت ابن عويض ينشـد كبـاره يدلونـه
عرفت اللي وراك وبسترك لاتدري العربان=على شانك ولد عمي ما أبا العالم يسبونه
محمد البدراني=
اجنب عنك يارجال مابغاها علـى الذرعـان=وابا اطلب من جماعتنا بني جابـر يدسونـه
عطيتك معي فرصةً وانت شقرا بأخر الفرسان=وانا لو التفت لك رحت عصفـورن بكرتونـه
عبدالمحسن الجابري=
ترى رجلاً يجنب عقب ثار الملح والدخان=يسمونه سمي الطير ذاك اللي يسمونـه
فتنت الناس كلن لدلـك يالقايـد الفنـان=وانا لو التفت يمك عصرتك عصر ليمونه
محمد البدراني=
حشمت الربعه اللي من وراك ياطايش الفسقان=قعود أجرب عن المرحان خلـق الله يعدونـه
حسب ماشوف منك اليوم تبغاها على الحجان=ألا ياسرع ماجاتـك تشيـل الـراس بمتونـه

	المشاركة الأصلية كتبت بواسطة طامي

	ياسلاام ياسلااام شعااار وافين ووطارق نياااااري تعجبك الشرااسه بس انتبهو اتماسكوون ترى خــلي مــافيه فرااعه هههههههههههههه

هلابك طامي يالله حيه

ما عليك زود

لكن تكفى حاول تصير حولنا لو ما انشوفك حتى تفرقنا لو تماسكنا هههههههههههه

وهات معك من الربع اهل الاجسام اهم شيء يقدرون يمسكون عني محمد ههههههههه

شرّفنا مرورك الغالي

	المشاركة الأصلية كتبت بواسطة محمد عويض البدراني

	والله ياخوك صادق لكن انا مطمن اقول مايدري وين انا لكن يقولون ان بعضهم يركب كيمرا على الجهاز ويصورك ويحدد وين موقعك والله اني خايف لكن انا داخل على الله ثم عليك ياطامي فكني منه انكان محدد موقع وان كان ماحدده ازهله

هههههههههه الله يرجك

اقول محدد موقعك من قبل ابدا بالطاروق وصورتك في وزارة الداخلية

اخوي محمد ليت تعدل اسمي في الردود اللي جمعتها انا مدري وش جاب احمد ذا ولا اعرفه

تحياتي

	المشاركة الأصلية كتبت بواسطة عبدالمحسن الجابري

	هههههههههه الله يرجك اقول محدد موقعك من قبل ابدا بالطاروق وصورتك في وزارة الداخلية اخوي محمد ليت تعدل اسمي في الردود اللي جمعتها انا مدري وش جاب احمد ذا ولا اعرفه تحياتي

اخوي ابشر من يعدل اسمك احمد هذا جابري مخوفني قبلك ولاعاد انساه وانت زدت الخوف خوف لو يلعب احد معي بعدك ابكتب عبدالمحسن الجابري

ابناء العم عبدالمحسن الجابري ,,, ومحمد البدراني

بيض الله وجيهكم وطاروق رائع بين شاعرين جميلين

وفقكم المولى لمرضاته

	المشاركة الأصلية كتبت بواسطة متعب العمري

	ابناء العم عبدالمحسن الجابري ,,, ومحمد البدراني بيض الله وجيهكم وطاروق رائع بين شاعرين جميلين وفقكم المولى لمرضاته

بن العم متعب حياك وشرفنا مرورك بارك الله فيك