ديوان الشاعر مساعد الجليدي

الســلام عليكم .. ورحمة وبركاته



أتمنى أن تحوز على رضـاكم ..

يالله يا مـــنجي مــن النـــــاس راهــــب=من ظـــــلم عاهر والـبلى فـــــيـه حـلّـي
يا الوحـــــــد المعــبود يا خيـــر واهـــب=تامـر سحـــاب الغيـــث وبــــلـه يــهـلّـي
هــتّاف وكاف(ن) عــلى القـــاع ساهب=غـــثوه عــــلى روس الشـــجر يستقلّـي
عـــــقب الجـــدب والعـــج والحر لاهـب=الأرض تخـــــضر والفيـــافـي تــســلّـي
تلـــقى الزبــيدي مـع مسير المساهـب=من ســج رجــــله بالفــــضا مـا يملّـي
وإنْ حـــرّك الفــــكسار للـــبيـد ناهـب=يطـــوي بــعيد الدار طـــي الــــسجلّـي
شـكله يشابه ليــــث سـود الـــغياهــب=وإلاّ إقـــطامي (ن) على راس تــــلّـي
واثنين والــثالث وسيـع الـــــمذاهـب=والكـل مــنهـم مـــذهـــبـه جـــايزلّـي
ما حسّــــبوا لهروج غـافل وغاهـب=الـلـي ورا لـــذّات وقـــتـه مـــــولّـي
والمال لو يـــكثر مع الناس ذاهـب=لابــــد مــن رِجـلٍ قــدمهـا يــــزلّـي
مـتعة زمان وفــارغـات المزاهـب=والرزق عـــند الله وغــيـره مقِلّـي
قبـل الصلاه الفـجر فـنجال زاهــب=يَجلىَ عماس الراس لين اسفِهلّـي
هذا هواي وجبت نـظـم المواهـب=يا مـــن نـقـدها لـو تكرمـت قـلّـي

التوقيع / نديم الجود .. مســاعد الجليدي

الســلام عليكم .. ورحمة وبركاته



هذه قصيدتي وهي تعبر عن نفسها وأتمنى أن تحوز على رضـاكم ..

الله من قلب ً زمـانه دغثلــه = مرً من العلـقم عـلى فـكة الريـــق
في كاس ما يوجد مع الناس مثله = في حـد مقضابه نقوش وزباريـــق
مـا ينعـزل صـافيه مـن كــثر بثلـه = لاذيـــق مشروبـه يجــث المعالـيــق
وانا وغـيري بالهــوا ذاق حثلـه = كاس الهـوا مـره فـــراق العشاشيـق
كم واحـد مثلي جريــح و حــدثله = هــــم وزمان اليــوم مــا فيه تبريــق
متـخالطه نبتات سدره مــع اثلـه = وحــارس نحلهــا دجــنوه المخاليـق
ومصيبتي بالحيــل صعبه وجثله = والعلــــم يا مشكاي مــا فيه تلفيـــق
قلبي كما المسباح في خيـط كثله = يومي كما تومي عشوب الصعافيق
ساقت زمـاليقه وعرقه حـرثله = عـجً مــن الغربـي يحـت الزماليــق
على عشيرً بالضماير بحثله = جــرحً قديـم وفتـق القلب تفتيــق
عين اشقرً هدوه صبح وعبثله =في جول برقً يتبعن المداريق
لمـــن دلهـت أيـام يمــي بعـثلــه= نـــاسً تجــــدد للمـوده مــواثيــق

التوقيع / نديم الجود .. مســاعد الجليدي

السلام عليكم ورحمة الله وبركاته
اهدي لكم هذه الابيات عسى ان تحوز على اعجابكم

يا بدر يا بدر الحويفـي بـلاوي=بـلـوى بلتــنـي لا بلــتـك البـليـة
زرع الضماير راح نصفـه ذلاوي=والبــير غايـر والنوامـي ضــميـة
واصبحت ادوج بالشعيب السناوي=واحترت افـــكر بيـن هـذي وذيـة
والمســك والعنبر ثمين وغـلاوي=والمال هاجر للـــكفـوف الصخيـة
شــي(ن) يحيــر يالعديـم النـداوي=والوقــت هـذا مـا عـــرفنـا نويـة
وقت(ن) ميوله للبخيل الغنـاوي=ومن قـــل مالـه حملـوه الزريـة
يمكن يسمونه عن الدرب غـاوي=الله يثــبـّــت يالقـلـوب التــقـيـة
يا الله بدعوة من بربه رجـاوي=عود(ن) كبير ومقتدي في نبيـة
كسبه حــلال ولا دخل به رشـاوي=يســجد ويطــلب يـا الـه البــريـة
يا الله بنو(ن) يوم ينشي ضحاوي=من حــد الاردن للجنـوب العذيـة
وبله على راس النبا والمهـاوي=ما فـيه وادي مـا تــطبـه شــغيـة
والناس لجّة بالفرح والحـداوي=كــــل(ن) يبشـر بالكنـاود خويـة
حسبـت ثــلاث ايام نبــتـه زهـاوي=وحسبت ثمان وخمس يشبع طلية
وحسبت تقاريب الشهر بالحراوي=عــوج الرقــاب مبركـه بضحويـة
والكيف طـــاب وللتـمشـي حـلاوي=في خايع(ن) ممطور وارضه مرية
من فوق لندكـــروز لونه سمـاوي=تـــــوه جـديـد مــحــركاتـه قـــويـة
واثنيــن والثالث بعيـد الهــقـاوي=كد ما رسو بالوقــت روحه وجيـة
واخلاقهم وقت الرخا والقسـاوي=حجان تضحــك والقلـوب برحيـة
هـــــذا مـــنـاي وليتهـا بالمنـاوي=وحسن الخواتم يوم وقت المنيـة

التوقيع / مساعد الجليدي

السلام عليكم ورحمة الله وبركاته
اهدي لكم هذه الابيات
عسى ان تنال اعجابكم

دك السـحاب ورذرذة ديــــم مـع بـرد=وقــــمت أتذكر ناعس الطـرف وينـه
وهب الشمال وفاح بالطـــيب والـورد=وريـــح النــفـل بفـــياضهـا خــابرينـه
مدهال خشف الريم وأصنافه الشـرد=ماحــدته عــذفا علـى أطـراف ليــنـه
أنـا بــلايـه واحـــــدٍ مــنـفـــرد فــرد=بالزيـن مايـوجــد مـع النـاس زينـه
حرام مايوجـد مع البيض لـه حـرد=عـــندي وكـل معـجــب فـي ضنينـه
فرقه كما فرق الجديده عـن الجـرد=أركــت على كبـدي عراقـي مزينـه
ماهي قصير ولا طويله من السـرد=ماهي دقاقـه حــيـل ماهـي متــينـه
عليه من دمـة هـل الشـام والكـرد=وعــليـه مـن ريـم التهاتيـه عـينـه
الله يجيره من غثا الأنـس والمـرد=وعسـا العمـى لعيونهـم حاسدينـه
شفته على عدٍ علـى جالـه الـورد=تكثر ويملا راعـي الصنـف عينـه
من دونها فيحـان وسهالـه الجـرد=حـالة ظـروف الوقـت بينـي وبينـه
وجدي عليها وجـدمن طاح والطـرد=حامي وطيـسـه والمكاسـب ثمـينـه
وصاحت مزايين البني حامي الحرد=خـــوذو بثـاره مـوت مـثلـه غـبـينـه
وياناس شاب القاف ماينفـع السـرد=وأنا هـوايه شـوف موضـي جـبينـه

التوقيع / مساعد الجليدي

الســلام عليكم .. ورحمة وبركاته




ممـــــا راق لــــي ..

ياما نهيت القلـب يامـا عذلتـه=عن طرد خشف الريم يوم استذارا
لشك عـذره يـوم جابـه قبلتـه=سويتهـا ويــاه رد اعتـبـارا
عسيت روض(ن) بالشمال ونزلته=واخذت به مرباع وقت الخضـارا
نسيت همي يوم جيـت وصلتـه=دهم السحايب في سماهـا تبـارا
وبل(ن) يرذذ واكثر النـو خلتـه=شرق وجنوب وصوب سيد العذارا
جبت السلاح وفوق متنـي نقلتـه=حزت طلوع الشمس قص الاثـارا
والصيد في روس المفالي ختلتـه=بارض(ن) بها ربله وعينة صفارا
طير السعد وافي على الكف شلته=سوه على جول القطـا والحبـارا
متعت زمان ومـا تمنيـت نلتـه=هاك النهار وقبل شمسـه تـوارا
مريت خلِّـي بالطريـق وسألتـه=وقفت انـا ويـاه تـال النهـارا
هرج(ن) على وضح النقا ما خذلته=بيني وبينه عهـد والنـاس تـارا
قدره على عرش الضماير حملتـه=يسوا قناطيـر الذهـب والتجـارا
اللي بعضهم مايسـاوي اصخلتـه=ون مره المحتاج عنـه استـدارا
مسك الختام ومـا توريـت قلتـه=لهل الوفى والطيب قـدر اوقـارا

التوقيع / نديم الجود .. مســاعد الجليدي

السلام عليكم ورحمة الله وبركاته .
.اهدي لكم هذه القصيده الغزليه

عــــزاه ياعيـنٍ لها تسـعـــة اعـــوام
والدمـــع ينزف مثل وبــل الغمامـــه

دمع المحاجـــــر تنـثره فوق الاكمام
دمعــــة يتيمٍ ضاهدينـــه عمــــامــــه

على هنــــوفٍ كــل ماقــلـت ابانــــام
صورة خياله قـــدم عينــي علامـــــه

عــليه من عين الوحش عين غشام
وعليه من عنق المهــــا ريم رامـــه

وعليه من شــبه الكحيله اليا قـــــام
شقرٍ نسفها فــوق مفــصـل حزامـــه

ادعج غــنج يــزها الخلاخيل وزمام
وخلقه من الخالق على الخد شامـــه

مدهالها بيــن الرديــفــــــه ولـــــزَّام
والبعــد ما يمحـــا غــلاه ومقامــــــه

لشــك مدري ويـش تخفيه الايـــــــام
وخايف من الفرقا نشوف الندامـــــه

وجـدي على لاماه في شرع الاسـلام
وجد السجـــين اللي نحيله عظامـــه

بين الرجا واليـــاس محـكوم بعـــدام
جدواه بالعبـــــره وعظــــة ابهامـــــه

امــه عليـــه من العـنــا تـرزم ارزام
وان جات تدله ذكّرتهـــا حمـــامــــه

اتلا ضناها مالقـــت فيـه من قــــــام
واضفت على ربوعه رواق الملامه

هاذا وجــودي للغـــلا تــرف الاقـدام
اللي ثمــانه يــــوم يبـــدي كــلامــــه

مثل البرد لاطاح باوقــات الاوســـام
لـــولــو تلالا خلـف طرقـــة الثامــــه

مانساه لو يرحل جبل طـي للشـــــام
والا طــميـــــة تنــتقـــل للمنــامـــه


التوقيع /مساعد الجليدي

اهدي لكم ولجميع زوّار ملتقى حرب
هذه الابيات القديمه
وهي رد على قصيدة شخص عزيز علي
ولاكن قصيدته لاتحضرني الاْن

يامــرحـــبا عـداد طـلـع المهــانيع=غـيدً عــلى الرييـــن مـحـلا نباته
بهجـرالحسـا تشرب زلال الينابـيع=وخــلاصـه التــربه تـزيــد بحـلاته
بابيات جـتني مـع ارساله وتوقـيع=من واحــدٍ يشــكي مــبادي حـيـاته
يشكي مـن الفـرقا اهمومه تناويع=بعض الهمـوم مشاركه في صلاته
النـاس يانــواف حــطــو مـشـاريع=والكل منــهم مـهتـني فــي ســباته
وراع الهوا حـافي كــثيرالمـطاليع=يشفق على صــعب المراقي بـذاته
يوم الهوا صــافي هـبـوبه ذعـاذيع=وكــلً عــلى شـــفــّه تـقـوده بــراته
وقـــتً مضى لعـفـار وبـدور وفـديع =وقــتً على الماضـيـن محلا طـراته
ماغـيّـر المـلبوس مـوضه وتشجيع=ولتـابـعـو دش الخـطـر وقـــنـــواتـه
على النـقــا لوكان فــيهـم طـمـاميع=مافـيه كـذب ولا ســوالـف شـــماته
ارجــــال فـرّيـس ازحـولً قــواطــيع=لجـاهــم المــحــتـاج يــلــقا غــنـاته
هـذاوانا بـهـديــك عــــدة مـواضـيع=يامـن عــيـونه بالـهـوا مسـهــراته
والحـب بـــلـوى ماذكـربه مــنافـيع=مـن طـب فـي بـحره قـــلـيله نجــاته
كـم واحــدً ذاق المـراره قــراطـيـع=مغــتر فـــي قــرطــوع سـكـر نباته
عــنــدك خــبر مـرار عــد الـناجيع=صـار العــوض بخـوه شقّة عــباته
ونـواف ذكّــرني بســيــد المـــتاليع=اللي عـلى قـلبي تـقـافـــت اهــواته
راع الثـمان الضيـّـقـات اللـوامــيع=بـه ميـزة ًعــن كــل جــمــلة خـواته
عــز الله انّه مــزّع القـلب تــمــزيع=تــمــزيــع حــرً جــايــعً فـــي ادلاته
ودّي بشـــوفـه مـار دونه مــوانـيـع=والوقــت يامشـكاي رافـع عــصاته
وجّـــه عــلــي ولالــقـاله فـراريـــع=وانا بركـــت بحـملـتي فــي نــحــاته
وحســب كلامـك بابعــيـد المـراميع=امــر عــلي وصـامـل العـلـم هــاته
امـرعـلية حــاضر اليـوم ومـطــيع =مــعـــروف مـادوّر وراكـــم جــزاته
ابا اجــتهد بالحيل وانــخا الفـززايع=مــن شـان ابوراشـد تحـقـق امناته

التوقيع مساعد الجليدي

مليون شكر لجميع من ساهم بتنسيق هذا الديوان
ولمن شاهده اومن عطره بالردوده الجميله

لكم مني اجمل تحيه وتقدير

ليله مـضـة مـاهـي بـكـل اللّيـوله
فيها شربت من اشـقر البن فـنجال

مـن كـف مزيونه هـجـاج وخـجـوله
مكـحـولة الطرفـين متـوشّحه شـال

فــزّيــت فــزّة نـــادرٍ صــوتــو لـه
قـصّــرِ عــلـوفـه مـدة ايّـام ولـيـال

من ماحـدثـلي والرمـوش الكـسـوله
منها اختلفـت وقـلت ياسـاتر الحـال

تـرا الـكـلام يـروح قـصره وطــولـه
عطني صحيح العلم عن كل الاحوال

قالت صـحيح النـفـس يمـّك ميوله
وابطيت ماشـفتك ولاجـان مرسال

واخـذت انـا ويّاه بالــحـلـم جــوله
باالـحلم صـادفـته وانـا رائق الـبال

صحيت من نومي وانا شوف زوله
واثـره خـيـاله قــدم عـينـي ولازال

خـلٍ ثمـان اسنين مـادجـت حـوله
ادراه عـن هرجــة مقــاريد وانذال

واصبحـت كــنّي مالكٍ كـنز دولـه
بس اتـخيّل وقـفته سـمح الاقبـال



التوقيع مساعد الجليدي

	صح لسانك __________________ «®°·.¸.•°°·.¸¸.•°°·.¸.•°®»«®°·.¸.•°°·.¸¸.•°°·.¸.•° ®» __________________