ديوان قصائد الشاعر(بخيتان البشري)

يا الله ياللـي اطلبـه دوم وا رجيـه=يالخالـق المعبـود يـا ذا الجلالـي
إنك تثبتني على الـدرب لا اخطيـه=من قبـل يـوم فيـه مـر وحالـي
شفت الزمن صورة لقاضي واداعيـه=ومن خصمه القاضي بلـش بثقالـي
اخترت لي فالعز بيت(ن) ابى اؤيـه=والعز ربعـي حـرب درع وظلالـي
والطيب عند الناس ينشـاف راعيـه=مدام مشيـه مـع وجيـه الرجالـي
والطيب امده واخـذه دوم واعطيـه=ولا ابديت قولـي اتبعـه بالفعالـي
ولي نظرة(ن) فالرجل واعرف مواريه=يقلط على الماجـوب بعـد الدلالـي
وربعي لهم واجب ولا بد ما اوفيـه=هم مكسبي لو اعتلـى رأس مالـي
ودلوي بلا ربعـي تقطـع عراويـه=لو يـارد الجمـة صـدر بالحثالـي
وبوجودهم دلوي تصل به رواشيـه=آرد واصـدر عـد عـذب وزلالـي
والرجل يبعد عـن كثيـر المشاريـه=لـو الزمـن يقبـل بسـود الليالـي
ومن فارق ربوعه محد يلتفـت فيـه=يلقى مـع المقفيـن عم(ن)وخالـي
ونهايـة المشـوار تظهـر خوافيـه=وينكس لهم لو الزمـن بـه يطالـي
وعزاه مـن مالـه يحسبـه مقديـه=مايدري إن ريـال يصـرف ريالـي
وعزاه يالي واجـب الربـع طاويـه=هـذا فراشـك تفـرشـه للعيـالـي
راع الوفا والطيـب وثـق مباديـه=شتـان مابيـن القـرض والثمالـي
وجهٍ خلا شمس الحياء ماشرقت فيه=يصبح ويمسـي يغتسـل بالرمالـي
ورجلٍ لبس ثوب الردى وصار زاهيه=حطه علـى يسـراك بـه لا تبالـي
وناسٍ احد فنجال مـا يرتـوا بيـه=ولا ينتـرك مـرة مثيلـه حفـالـي
و احدٍ كماالقمـرا تفـرح مساريـه=و احدٍ سوات الليل يكسـى الجبالـي
ياهيه جاك العلـم لاتقـول ناسيـه=شرحت لك درسك من هجوس بالـي
وإعداد همـالٍ نشـا مـن مناشيـه=صلوا على المختـار فـأول وتالـي

ســـنــيــن العــــــــــمـــــــــــر=
مرت من سنين العمر اربعينـي=والله يعلـم كـم بـاقـي بقـيـة
اربع مراحل مامضى من سنينـي=منها الطفولـة آخـذه الأسبقيـة
طفولتي فقـدت فيهـا الحنينـي=واقـول ليـت الأم ياليـت حيـة
هذا وياكم من مرض محتوينـي=والوالـد اتعبتـه بكثـر الشكيـة
والوقت قاسي والعرب مدهريني=وابوي بحمولـه يقـود المطيـة
ذي مرحلة من لغز مدفون فينـي=وضحتها حسب الذي قيـل ليـة
وذي عشر لافرحان ولاني حزيني=شبـاب ومراهـق بليـا هويـة
وقتي يضيع وماش هم(ن)يجينـي=غيرالأكل والشـرب وإلا الاذيـة
ذي مرحلة فيها الجهل يعترينـي=ليت الزمن يرجع لهـا لوشويـة
والآن نبدأ وقت هـزل وسمينـي=متخالط(ن)طيبه وخبثـه سويـة
لاشفت طيبه قلت ربـي عوينـي=وخبثه لياجانـي عزومـي قويـة
انهيتها و الحال طيـب و زينـي=ياليت طيب ايامهـا لـه مجيـة
وذي مرحلـة ايامهـا حاكمينـي=من جمرها في داخلي الف كيـة
احزانها همـي وذاتـي حزينـي=من وين ماجيهـا عليـه عصيـة
وردت عد الماء وغيري مهينـي=لي الشموس وله من البيت فيـة
لاصار واحد كيف احسبه ثنينـي=ولاصار ميه كيف ماقـول ميـة
وياكيف ببكـي حـي فالميتينـي=والوقت بالاحزان خـط الوصيـة
نبشت بعض وبعض باقي دفينـي=تحت الضلوع العوج عنكم خفيـة
هذا العمر وإن كان باقـي يبيـن=الله يعوضني علـى كـل سيـة
دنياي ضاعت مابقى غير دينـي=يالله تثبتـنـي لـيـوم المنـيـة
الحـظ عاثـر والليالـي تعينـي=وشربت صافي مرهـا حنظليـة
من عادتي مبدي لغيري ونينـي=واجامل الجلاس مبـدي خطيـة
يسراي ماشافت عطيتـة يمينـي=ويمناي تعطي دون رجوا عطيـة
ياليت وقتـي للعـرب يشتكينـي=ونهي معاناتـي بحـل القضيـة
يالله سألتـك ياعظيـم اتهدينـي=يارب تقبلها مـع اخـلاص نيـة
ياللـي قريتوهـا ويالسامعينـي=معناي لي وحدي ولكـم التحيـة

خسرت مكسبها=

ياعابـد الدنيـا خذتنَـي تراحيـب=واليـوم ياعابـد وحيـد لحـالـي
صدقتها يـوم أقبلـت بالتراغيـب=حسبتني فيهـا مـن الهـم سالـي
وشفت العنا منها وشفت التعاجيب=خسرت مكسبها علـى رأس مالـي
مرة تودينـي ومـرة لهـا اجيـب=وإن رحت والا جات فالكـل خالـي
لعبت معي فالعمـر كـل اللاعيـب=واليوم ياعابد بـرا الهـم حالـي
خلت دموعي فوق خدي مساكيـب=ماكنـي الا فاقـد أعـز غـالـي
خاويتها منهـا بجيـب المكاسيـب=وأصبحت في غربة مع النفس جالي
تاهت بي الخطوة بها والمحاسيـب=صار الهدف مجهول والدرب طالي
سكة سفر فيها جميـع المتاعيـب=ومحملتنـي بالحمـول الثقـالـي
رحال فيها والهـدف دايـم يغيـب=طالت بي الرحلة وبعـد الوصالـي
شيبت ياعابـد وشفـت التعاذيـب=من جورها صرت اطعم المُر حالي
عايشتها عمري وعشت التجاريـب=مرارهـا مـا تقصـره لرجـالـي
ترفع مقام اللي حوتـه العذاريـب=وتنـزل اللـي محتمـي بالفعالـي
اسقت رخوم القوم صفو المشاريب=ويا كم ذلت مـن كريـم السبـال
يا كـم شفنـا فعلهـا فالأقاريـب=وقطعـت فيهـم وثـوق الحبالـي

يالله يا والـي علـى كـل والـي=يالخالق المعبـود فـأول وتالـي
يالعالي الهـادي عليـك اتكالـي=رجواك يامن من ترجـاك ماخـاب
مشيت في دربي ولا أنظر ورايـه=وعيونـي اثتيـن نـور ومرايـه
والعقل في رأسي علم لـي ورايـه=ولا لي عن دروب المقادير مجناب
عقلتها مـن قبـل والأمـر كلـه=في يد مـن يعلـم بكثـره وقُلـه
والله ليّـا وفـق لشـيٍ تُصـلـه=واللي غشاه برحمته ماله حسـاب
مشيت فالدنيـا بطـولا وعرضـا=وضلعٍ نعدي بـه وننـزل بأرضـا
والحال هذا كان مفـروض فرضـا=فوقي سما والأرض من تحتي تراب
ليه هدف بـس الهـدف ماتحقـق=قابلـت رجـالا وثوبـه مشقـق
والله لطف بغيـت معـه اتوهـق=آثره حظي والقـراده لـه ثيـاب
قلت انت وش جابك ورايه ورايـه=قال إنت يالمجنون ما بـك درايـه
لو رحت وحدك اعتبرهـا زرايـه=ولابى اتزرا فيـك واروح فعتـاب
قلت انت متعبنـي سنيـنٍ طويلـة=ولا فيك خير وشيل مثلـك حفيلـة
لاكن مالـي فـي مثيلـك وسيلـة=غير الصبر والصبر ياكيف ينجاب
طال الجدال ولا لقينـا لهـا حـل=اليا عقدت العلم جنبي لـه يحـل
اقول له بالله عـن وجهـي تحـل=يقوم يضحك قال عارضك ما شاب
من جلستي تكيـت كـان يتمـدد=وانـه يعاندنـي وبــي يتعـنـد
قال استمـع علـمٍ جديـدٍ تجـدد=لو انسدح ادخلك في جوف سرداب
قلت العذر ياحظ وش ناقص العلم=اللي حصل يكفـي ومنـك اتعلـم
لا تنسـدح واقعـد معـي بنتكلـم=لا طبت ياحظي ولا خاطري طـاب
بكيت لين الدمـع غـرق عيونـي=عن حالتي يانـاس لا تنشدونـي
الحلم صحانـي وقمـت امغبونـي=والعلم مفتاحه مقاسه على البـاب

ليه الجفا بين المحبين نزعة = يبدأ شرارة عقبها ينقلب نار
الكل منهم صار مافيه جزعة = الكل للخافي غدا يعزف أوتار
الطيب والمعروف للود فزعة = تجمعوا في قلب حاير ومنهار
دام الجفا فالدار مبذور زرعه = من يتفق والآ بيسمع للأشوار
كان الستر ضافي بحشمة و وزعة = واليوم صاروا للملأ حكي وبهار
ترى الفراق نهايته دوم قزعة =قزعت شتات ولالهم بعدها خيار
بالأمس فيهم همسة الوصل شمعة = لا تنطفي زيدوا على نورها انوار
ونسوا ليالي احتوت شين سمعة = ورموا وراكم كل لحظة بها أمرار
دام الخوي تاجي ميه منه لسعة = ونسامحه فيها ولو صار ماصار
كيف الحبيب اللي له القلب طمعة = ونسوق فنجاله من الدم بوقار
نال الغلا والكبد مدلول ولعة = له الف زلة مايجي دونها اعذار
ادين ثم العرض اثنين جمعة = والباقية جبر الخواطر لها اثمار
هذي رسالة والبشر ناس لمعة = وناسٍ يمين وناس تلقاهم يسار

هموم الوقت وجروح الأحبة والسهر والليل = اترجمها لصورة تحكي إحساسي وجداني
بكيت ولا شكيت الواقع اللي صدق هد الحيل = اداري عزتي بأقسى حزن من فرح عدواني
انزلها حمول ثقال وارجع للحمول اشيل = اشوف الناس حولي مابهم من جاء و وآساني
عرفت إن الحياة كفاح والخطوة تساوي ميل = وحثيت القدم ما ودي آقف وأنظر احزاني
اشوف إن الحياة دروب لاشمعة ولاقنديل = كسها من ظلام الوقت قطعة تحرق اشجاني
حياتي ! قصة اللي منوته مرة يشوف السيل = وجاه السيل شاله منهو المجني من الجاني
حياه اللي يحللها يلاقي دقة التفصيل = بها يحتار والحيرة تحير كل حيراني
لقيت الفكر يازن فالمعاني والخيال إكيل = وميزان العقل مابينهم كاسب وخسراني
رجعت اقيس في بعض العلوم المعضلة واخيل = ولا ياوجد روحي والخبر لاجاء ولاباني
وصلى الله على المختار عدد ماينطق التهليل = وعدد من طاف حول البيت في تاريخ الأزماني

إن قلت ياعمري قصيدة نظمتك=وش الذي تختار لأسم القصيدة
ماودي إني باختياري ظلمتك=مالا تجيده ماطلبتك تجيده
انقش بحرفي يابحر عمر عمتك=فصخور غبك لي سنينك شهيدة
وبريشة أيام الأماني رسمتك=صور خيالي لك ملامح عديدة
الصوت نبرة ترتوي لا زهمتك=ويضمأ صدأ صوتن عليه تعيدة
في ناظري باقي على ماوصفتك=وإحساس مغرم والمشاعر تزيدة
تقدر تقول العمر كله حلمتك = حلمي معي عسى حلومك سعيدة
هذا انت حاكمني وأنا ماملكتك=شاعر لقي زولك بداخل قصيدة

حذراك تسمع من منافق ونمّام = إن كنت ذيب اللي تشوفه تقوله
أسمع من اللي فالمجالس له وسام = له عِرف تشهد له كمايل فعوله
ومن يلقف الهرجه ويأتي بها شمام = عقله خفيف ولو زهى الطول زوله
ترى الرخوم رخوم لو حظها قام = ومن يتّبعهم مايعرف الرجوله
يمشي يمن مقفي نهار الهدف شام = نفسه عن ثقات الرياجيل عُوله
يرجع وراء ويشوف مشيه لقدام = ويزيد بالأيام حدرة نزوله
دام الحياة أعراف وأقنان ونظام = خلك كما اللي ماتعثره ذلوله
إبعد عن دروب المذلة والأوهام = والرجل يتِكي لو ثقيلة حموله

يامطول الغيبة عسى ماشي خلاف=غيبتك طالت والوعد طاف عامين
العلم جعله خير يازين الأوصاف=ارسل وريح شاقي القلب والعين
لي منتظر عامين بعد الوعد طاف=ولازلت في رجو ى حنينك ليا الحين
لو شفتني واقف على راس مشراف=ما غير نسناس الهبايب يسلين
وإن كان علمك يالغلا فيه محراف=ترى العلوم اللي بها غش بتبين
كان المفارق في نظركم هو انصاف=ابشر طلبك يهون وإحنا كريمين
ماني على المقفين يازين لقاف=لك داخلي كلمة تكون بحرفين
الفاء ويكتب يالغضي قبلهاالقاف=قف يا أمل ما نتبع اللي مقفين
رح في طريقك والزمن لو غدا جاف=تكفيني الذكرى من احباب غالين

ياصاحبي مادري جروح المقادير = او هي جروحي قبل لايتهمونك
يمكن كذا او هي كذا جت مخاسير = تاهت بك دروبي وتاهت ظعونك
مدري وتدري كم ليالي معاثير = لو ما سمح ظرفي ظروف يعضونك
عذري وعذرك في سجون المعاذير = واوصوا بعد شكري لهم يشكرونك
على جهودك يوم صغت التبارير = قدامهم واعلنت عرض لفنونك
ماعاد باقي للعنا والمشاوير = وتلقى مع الأيام من يفرحونك
يبقى الغلا 0 يبقى الوفا 0 والتقادير = في داخلي لين اندفن يحتوونك
انت الغلا مهما تطول التفاسير = وانت الذي تبكي دموعي عيونك
وانت الذي فالقلب مانته كما الغير=تبقى لك الذكرى وابى أصبر بدونك