لقاء مع الشاعر حمدي الفقيه

هذا لقاء مع شاعر المحاورة والنظم حمدي حميد الفقيه المخلفي الحربي وهو منقول من منتديات مخلف ، أتمنى أن ينال استحسان الجميع//


بسم الله الرحمن الرحيم
والصلاة والسلام على أشرف الأنبياء والمرسلين ، نبينا محمد وعلى آله وصحبه الطيبين الطاهرين أما بعد:-
أحبتنا أعضاء منتديات قبيلة مخلف يسر إدارة منتديات قبيلة مخلف أن تقدم للقبيلة الكريمة لقاء مميز وحصري مع علم من أعلام القبيلة يعرفه الكثير ، شاعر حكمة يمتلك قوة في الأسلوب وجزالة المعنى له باع طويل في مجال شعر النظم والمحاورة ومتحدث مثقف يأسرك بحديثه حينما يتحدث استقبلنا بكل حفاوة وترحاب وتقدير منا لمكانته كان لقائنا معه على مجلسين شاعرنا هو الشيخ :-
( أبو حميد)
حمدي بن حميد الفقيه الشلياني المخلفي

بعد تركه لمجال المحاورة قال أحد الشعراء:-
من يوم حمدي طب سوق التايبين **** باقي الحروب أقبل بها وأقفي بها
--------------------------------
نترككم مع سيرة شاعرنا المختصرة ووقفات من حياته وقصائده متمنين لكم المتعة والفائدة :-
ولد في ضواحي المدينة المنورة في عام 1356هـ والده حميد الفقيه رحمه الله من أعيان القبيلة أشتهر بلقب الفقيه لمعرفته الواسعة بالدين وكان مرجعاً للقبيلة في زمانه ، وقد تأثر بوالده كثيراً وورث منه الشعر في جزالته وقوته ،أنتقل إلى الوظيفة وكانت بدايته بوزارة الدفاع عام 1376هـــ وتنقل في وظائف عدة ومناطق كثيرة أستقر في منطقة القصيم وكان آخر منصب حكومي تقاعد منه عام 1416هــ هو : ( مدير الإدارة المالية بشرطة منطقة القصيم )ومن ثم مستشار مالي بعد تقاعده حتى عام 1421 هــ تفرغ بعد تقاعده لأعماله الخاصة والاهتمام بالزراعة بوجه خاص ، له مساهمات كبيرة ومشهودة في بذل المعروف جزاه الله خير الجزاء.
--------------------------------
س – كم كان عمرك عندما قلت أول قصيدة ؟
- تقريبا كان عمري عشر سنوات تقريباً والقصيدة التي قلتها لها مناسبة طريفة .
س - كم كان عمر الشاعر حمدي الحربي عندما بدأ شعر المحاورة ؟
كانت بدايتي بالمحاورة أكثر من النظم وأول محاورة لي كان عمري أربعة عشر سنة تقريباً.
--------------------------------
س - شعراء مخلف الذين تحاورت معهم ؟
الذين تحاورت معهم من القبيلة وخارجها كثر لا أحصيهم ونسيت الكثير منهم وأذكر : حميد بن رزيق المصدري ، وكان أيضاً قبله مرزوق بن الجعيل و نايف المخلفي ومستور بن دخيل ربه ، وعوض أبو شيبه ، ومفوز القرص وحمدي القرص ولكن لم أدركهم.
--------------------------------
س – من الذين تذكرهم من شعراء النظم القدامى من قبيلة مخلف ؟
هناك العديد من شعراء النظم وشعراء المحاورة أما شعراء النظم فكان منهم معيض الهذيمري ومنور الهذيمري بالإضافة إلى رجاء الدرعاني الخزي هؤلاء هم شعراء النظم ويقال مرزوق الهذيمري ، أما منور الهذيمري فأنا أذكره لوقت قريب رحمه الله وأما معيض الهذيمري فهو شاعر محاورة أيضا ولكني أذكره عندما كنت صغيرا حينما كان يأتي لوالدي رحمة الله وقد توفي عام كسوف الشمس وكان شاعر زمانه في ذلك الوقت، ولقد قصد في مخلف عندما تم عمل سباق للهجن في نهار العيد بين مخلف أهل الحجاز ومخلف أهل نجد وكان نمس أهل الديره أنهم غلبوهم عندما وقع حويفظ الشرقي رحمه الله عن ظهر بعيره ،وكان مخلف أهل الحجاز عندهم حر الأمير وكان لابن مروي ولكن الذي يركبه لم يستطع الركوب عليه فأناخ البعير .
--------------------------------
وقال فيهم معيض الهذيمري هذه القصيدة:-
وآبوي يا علم (ن) عن الربع جاني**********علم(ن) لـفـوبـه صادقيـن الطـراريـش
ركبوا على حسبة ثمـان وثمـاني **********مـصـلحـات وكــل أبـوهـن مــداهـيـش
قعود ابن موزه سبوق(ن) عماني********** مورش(ن) لـمـلاعـب العيـص توريـش
من صبـح ليـن انـه صقـع بالاذانـي**********والمـال حـايـف والعـذارى مـشـاويــش
وحر الامير اللي سواة الحصاني********** غطم حسب ريمان قوم الحفافيـش
طـش حويفـظ والله المستعانـي ********** عمامتـه والثـوب بالـوادي أبا الهيش--------------------------------
س- من أبرز من حاورهم الشاعر حمدي الحربي من خارج القبيلة ؟
الذين تحاورت معهم لا أحصيهم ونسيت أكثرهم رحم الله ميتهم وعفى عنا وعنهم
ولكني أذكر : ناصر بن سرحان الشيباني رحمه الله وناصر المشرافي و أحمد الناصر الشايع وكذلك : شليويح شلاح المطيري ومحمد بن شلاح المطيري رحمه الله وعبادي المالكي رحمه الله وغازي المعنى البقمي وهلاّل الطليحبي المطيري وطلق الهذلي وعطا الله الهذلي وحراب المطيري وضيف الله بن بيان المطيري وفايز المعنى البقمى وعبدالله بن هديان البقمي وعبدالله بن ضيف الله بن خريص البقمي وسمار البقمي والحميدي الذيابي ومنير الحافي العتيبي وعبد الله بن خويتم العصيمي ومحمد بن خويتم العصيمي ومقبل السليس وغيرهم الكثير .
--------------------------------
س - هل حاورت الشاعر: صياف الحربي رحمه الله؟
الشاعر صياف رحمه الله كان في ذلك الوقت صغير في السن ولم أحاوره ولكنه كان يذهب معي في محاورات الشعر.
--------------------------------
س- هل صحيح أن الشاعر: صياف الحربي تعلم منك الشعر؟
- يقولون إنه يقول في مقابلاته للناس تعلمت المحاورة من حمدي الحربي .
--------------------------------
س- هل يحفظ شاعرنا شيء من محاورته مع الشاعر أحمد الشايع الناصر؟
- أذكر قال لي في أحد المرات: -
روح أمّا ورى والا تعال ******** ما ينعرف وجه بيتك من قفاه
فرديت عليه :-
كيف مع جرتك ترمي النعال **********بيـن سـوق الثمـيـري والصفـاه
اطـلـب الله صــلاح لـلـعـيـال **********عقب اصابتك في رجلك حصاه
--------------------------------
س- الشاعر حميد بن رزيق المخلفي كان له معك صولات وجولات في المحاورة هل تذكر لنا بعض ما تحفظه منها؟
أذكر ردي في المحاورة على حميد بن رزيق المخلفي عندما كنت عسكري أعمل في الخرج فقالوا لماذا تذهب عنا وبودنا لو تبقى عندنا فقلت لهم - :
جيتكم كل اللغات السبع يطلعها لساني *****دارس(ن) بالانـقـليـزي وبـالحـروف الأبـجـديـه
إن بغيتوني مترجم واني أصلح ترجماني******وان بغيتوني طبيب اصلح مع أهل الصيدليه
--------------------------------
س- نريد أن تسمعنا بعض محاوراتك مع الشاعر ناصر المشرافي ؟
في أحد المرات قال لي الشاعر ناصر المشرافي الله يذكره بالخير هذا البيت :
أعرف أنك حمدي الحربي وشاعر **** مير شوف النار في راس الفتيله
ورديت عليه وقلت:
أعرف أن مطير حمران النواظـر **** مير غض الصوت حرب(ن) لي قبيله
إن بغيت الشر خذ حاضر بحاضر **** وإن بـغيـت الجـود حمدي لــه دلـيلـه
--------------------------------
س- هل تذكر محاوراتك عندما كنت في البدايات ؟
هذه القصيدة كانت عندما كنت صغيراً جداً وفي بداياتي حيث أتى شخص يدعى حويظر الله يرحمه وقال لي:
يا ورع ليتك تريّح عن عقاب(ن) طحون ***** والعنز تربض ليا جاء الطق في قرونها
فرديت عليه :
حليتكم يا حويظر والعرب يسمعون******خرفان تاجر توالي السوق يصغونها
ومربع العام يوم إن العرب يدهرون*******ولين ردتهم الخــوصه يذكونــها
فقال لي حويظر:
والله يا دايــم يالصبيّ حليل ***** وأثر وليّد الطن طنيّهفرديت عليه :
الـعـب ولـيـلــك يــا حـويـظـر لــيــل ********* حــمــدي يعالج كل جنــيّه
وإن كان ما نوفى الخصيم الكيل********** وإلا ماني ولد الخشيميه
--------------------------------
أما هذا الأبيات فكانت محاورة بحضور الملك عبد الله بن عبد العزيز حفظه الله قبل توليه الحكم وكانت في الرياض بيني وبين قبيلة البقوم ومنهم ( فايز المعنى ) وكنت أمثل قبيلتي مدافعاً عنهم وقلت:-
يا سلامي بجابه **** قلتها بالنيابه
عن قبائل شبابه**** واسمعوا يا قبلانا
عداد الحيا اللي من معالي مزونه
أمهلوني شويّه **** لا تعجّـل عليه
خل هذي بذيه **** وارحلم للشديدي
ولايعرف الرجال أكود الرجاجيل
فوق راسي عصابه **** ضلع في جوف لابه
خيّلي يا سحابـه **** دم نـار حربانـا
وراس الفتى عزه تـرى مـن متونـه
من نواني بسيه **** جبتلـه سـم حيـه
ثم أزيده بكيه ****فوق كبـده تزيـدي
وحنا لكم عدواني جيل بثـر جيـل
* لم يتمكن الشعراء في ذلك الوقت من الرد على هذه الأبيات.
--------------------------------
ومن محاورات شاعرنا مع أحد الشعراء:-
اللهيبي :
يا سلام الله عليكم ردت(ن) حلوه ومره
حلوت(ن)مثل العسل وأمر من شري الدحال
ورديت عليه :
يا هلا يا مرحبا بك مثلها عشرين مره
بالحلاوة والمرارة مثلها في كل حال
--------------------------------
وهذه أبيات من محاورة أخرى:-
عبد الله بن هديان البقمي :
الصف ما به صف والشاعر قعد**** قعد ينقض لحيته وغزولها
رديت عليه :
دقني معي والا أنت دقنك بالبلد **** الله يخلق الدقن وأنت تزولها
يا بو خديد(ن) مثل خد أم الولد **** حلياك حلياها وطولك طولها
-------------------------------
وفي محاورة أخرى مع ناصر بن سرحان قال:
شيّبتك الليالي وشيّبنّي *** واحلالاه يا عصر( ن) مضى لي
رديت عليه :
قبل حتى سنوني يظهرنّي *** عارف(ن) مكسبي من رأس مالي
( من قصائد النظم لشاعرنا الشيخ حمدي المخلفي الحربي)
س- ألقيت قصائد في العديد من المحافل فهل تذكر لنا بعضها؟
- هذه القصيدة ألقيتها أثناء حفل حضره الملك سعود بن عبد العزيز رحمه الله
قلت فيها:
مرحبا يا ملك فخر الملوك********** يا سعود السّــعد للمسلمين
وارث المجد عن جدك وأبوك******** أهل المجد من طول السنين
يا ملك فيك ما جانا شكوك ********** محيي العدل تاج الصالحين
وآهني من له أخو(ن) مثل أخوك******** فيصل اللي يكيد المعتدين
والقصيدة أطول من ذلك، وقد أمر الملك سعود رحمه الله بإعطائي مكافأة نقدية وهدية عينية.
--------------------------------وفي مناسبة أخرى ألقيت قصيده بحضور الملك سعود رحمه الله لا أذكرها كاملة:
يا هلا مرحبا يا بو فهد********** دام حكمك وعزك يا سعود
عشت ويعيش فيصل للعهد********** والي العهد له فعل(ن) يسود
--------------------------------
س- أبو حميد نريد أن نسمع منك قصيدتك في الثقال من عتيبة التي اشتهرت وذاع صيتها ؟
هذه القصيدة مناسبتها :
عندما ذهبت بعد صلاة العصر من بريده متوكلاً على الله إلى الحج ووصلت إلى عرفات وجدت مجموعة من الرجال عزموني للقهوة فلما نزلت في مجلسهم وجدت حسن الاستقبال والضيافة وبعد السؤال قالوا نحن حبرديه من عتيبة وقلت لهم أنا مخلفي من حرب ثم أصروا علي للغداء معهم وقلت لهم سأبحث ربما أجد أحد من ربعي فلما ذهبت وعدت لهم مره أخرى وجدت استقبالاً أفضل من الأول.
وبعد تناولنا للغداء أصروا علي أن أرافقهم وبالفعل عند إلحاحهم رافقتهم فكانوا نعم الرفقة طوال أيام الحج فلما انتهينا من الحج وطواف الوداع قلت لربعي سأذهب الآن واستودعكم الله وكانوا كثر وبرفقتهم عوائل ولم أرغب في مضايقتهم وعند وصولي لمنزلي وجدت هاتف المنزل يرن وإذا به أحدهم وهو: ساير العتيبي يقول فقط أرغب في الاطمئنان عليك هل وصلت أم لا فقلت هذه القصيدة فيهم :
ياراكب(ن) من فوق سبع وثمانين******* جمس(ن) وعود الهند وحده زهابه
يلفي لبوخالد معشي المجيعين***********(خلف) ربيع اللي نزل في جنابه
كبير ربع(ن) بالمواقف مديحين*********من روس دسمين الشوارب عتيبه
قالوا ثقال وقلت ما هم ثقيلين*************ثقالة(ن) تضفي عليهم مهابه
يلقى بمجلسهم دلال وفناجين**********وسوالف(ن) ممزوجة(ن) بالحبابه
جمّاعة(ن) للعرف والعقل والدين**********وجيوبهم تشبه صدوق السحابه
ينّزلون الضيف منزل سلاطين**********والجار ما قاموا عليه الطلابه--------------------------------
- كثيراً ما يوصي شاعرنا أبناءه ويحثهم على الاتصاف بالصفات الحميدة ومن القصائد التي أتحف مسامعنا بها :-
- هذه قصيده ونصيحة قلتها في ابني حميد عندما تم دعوتي للمشاركة في برنامج البادية الذي كان يذاع في الإذاعة بداية تأسيسه عام 1386هـ
وكان من الذين أصروا على مشاركتي آنذاك الشيخ : جلال الفرم رحمه الله ومنديل الفهيد والبحر.
قلت فيها :
سلام مني يا رجال الإذاعة**********يا للي سعيتوا بالكرم والشجاعة
تدعون للمعروف في كل ساعة**********يا ركن السعد والكل حياك
والثانية يا الربع عندي وداعه **********إن كان ليّه يسمحون الجماعة
الآدمي له في حياته ولاعه**********حميد تســمّع لا عدمناك
ألأوله يأبني وداعتك دينك**********حافظ على فرضك وربك يعينك
عسى كتابك تآخذه في يمينك**********ترى الله عن الزلات ينهاك
اطلب من الرب الهدى والسلامة **********عسى تنال الفوز يوم القيامة
تسلم من أهوال القبر والندامة**********ودينك لا تبتاعه بدنياك
والجار لا ترضــى عليه الجفوه**********من دون جارك ذود في كل قوه
خلك لجيرانك سريع المروه**********ترى الله على الجيران وصّاك
قلّه يا جاري دون كل القرابه**********لو أنت من خنذف وانا من شبابه
وصّى عليك المصطفى والصحابه**********لعل الردي واللاش يفداك
والضيف لو أنّه من أقصى قبيله**********حاول عشاه إنه يكون الجزيله
ترى الردى بالضيف أساس الفشيله*********حذر لا يروح الضيف يشناك
ترى الفتى مفتاح قلبه لسانه**********رحّب بضيفك قبل يأخذ مكانه
إن الذي عليك حده زمانه**********حذر لا تلقّي الضيف علباك
وخويّك اللي معك يمشي بسيره**********انصح معه فالبيّنه والسّريره
لن كل(ن) رايح(ن) له بديره**********وتذكر خطاياه وخطاياك
وأظن حفظ المال ما هو بمنقود********إن كان في حاجة جماعتك موجود
تكسب به الطاله وتسلم من السود**********ويغنيك عن هذا وعن ذاك
وإن كان جاتك زلة(ن) من قريبك**********حاول رداه انّه يداويه طيبك
تكسب رضى ربعك وتزعل حريبك**********ترضّه لو انّه ما ترضّاك
واحذر عدوك لو دونه مية باب**********تراه يأتي لك على كل هنداب
يضحك بسنه لك ويلدغ كما الدأب********عدوك لا يدري عن مدى أقصاك
وولدك قبل الورث فكّر بخاله**********إن كان شفته حيلته دوب حاله
خله وتلقى بين جيلك بداله**********ترى كان حبلك رمث ما أسقاك
ومصادق الأنذال لا تغتريبه**********ترى الصحيب النذل ينكر صحيبه
لو زان مدّه ما يطوّل بطيبه**********ينشّبك با لدعوه وخلاك
وإن كان جاك اللي يريد النصيحه********اشرح له الدعوة بكلمة فصيحه
حذراك لا ترضى عليه الفضيحة**********ترى لو مايثق فيك ماجاك
واللي بلاه الرّب حذرى تناحيه**********وعليه يفرحك القدر يوم يأتيه
إن الله اللي بالمقادير باليه**********ويقدر عنه يرفع ويبلاك
قلته ولا أدري وش بقى من حياتي**********لكن هذي يا حميد وصاتي
إن كان قدمك لحفوني عباتي**********أمانه معك يوم إنّي ألقاك
وصلوا معي يا للي سمعتم كلامي*******على نبي (ن) ما مشى با لحرامي
اخير من صلى لربه وصامي********** محمد نفعنا الله بدعواك
--------------------------------
- تعددت القصائد التي قالها شاعرنا في أخيه عبد الله ومن هذه القصائد :-
-هذه القصيدة قلتها في أخي عبدا لله( أبو علي) عندما ذهب للخليج :-
يا علي ما عينت لي طيب الفال **********اللي سرق روحه وحنا قعدنا
لكن بعده يا علي خبث البال**********من يوم عنا غاب غايب سعدنا
لو أن أبيّك يا علي خطو الأنذال**********عليه والله ما نسمي ولدنا
وجدي على لماه لو حسبّت ليال**********قبل المنايا لا تفرق عددنا
لو كان مادامت لمحسن وجلال**********اللي عليهم كل طيب حسدنا
إن كان ما تأخذ لزومك وتكتال**********كل(ن) يقلك لا تشوه بلدنا
--------------------------------
وأيضاً هذه الأبيات قلتها في أخي أبوعلي عندما أنتقل إلى المدينة المنورة:-
جلال وابعداه من من بعد عمك ******** اللي نقل عنا توال المدينه
عز الله إني شلت همي وهمك ******** ويا بعد أبو حصه علينا غبينه--------------------------------
وهذه القصيدة قلتها في أخي عبد الله ( أبو علي )عندما أنتقل إلى مدينة الرياض ومنها:-
اغلي الرياض وزاد عندي غلاها ******** من يوم شدو يمها ناس غالين
أبو عبيده يا حميد نصاها ******** نازل بخشم العان شوفه من يمين
--------------------------------
وهذه أبيات من قصيده في أبوعلي :
وا سم حالي كما سم الحديد الركب الكير
وإلا كما البدره اللي شربم الرعيان ماها
أبو عبيده سكن بين آل ثاني و المنــــاصير
ارتاح باله وانا عيني تزايد في عنــــــاها
وهذه مجموعة قصائد لشاعرنا متنوعة الأغراض والمناسبات :-
هذي قصيدة في جاري الدليقان رحمه الله عندما وضع لوحة على عمارته يعرضها للبيع ويريد أن ينتقل للرياض وقد كان قبل ذلك من سكان الرياض قلت فيها:
الله يلوم اللي يلوم الدليقان ******** أعلن هروبه فوق باب العماره
قال اشتروا وأبيع لو كنت خسران ******* ملزوم أبيع بربح والا خساره
يبي الرياض ديار ذرفين الأيمان ******** فيها المروه والكرم والتجاره
--------------------------------
- وهذه القصيدة قلتها في زميلي زبن العنزي عندما أخذ الجريدة من مكتبي:-
يا زبن يوم انك أخذت الجريده******** لعلها يا لوايلي من فداياك
ما هي خسارة عندكم ياخو عيده******** أبيك من عقبي توصى باخوياك
انا لارديت ليه قصيده ********انخى على المعروف يازبن شرواك
رفقة خويي كل يوم (ن)جديده******** ذا طبعنا جعل المنايا تعداك
ولاشهرت اردى العدود البعيده ********ماني بمثبور يطنفس على ذاك
--------------------------------
- هذه الأبيات قلتها عندما قال لي البعض : ( كبرت- شبت):
الترفه والتنعم للحبايب******** والخشونة للرجل مثل الأصيله
وإن بدى بي شيب من نطح النوائب ********يوم بيت اللاش يخطيه الدليله
--------------------------------
- عندما كنت أعمل في الخرج واشتقت لربعي ومنازلهم قلت هذه الأبيات :
لا واهني من شاف نزل الشلاوين ******** قدام كثر الدمع يعمي عيونه
أقيم إن قالو ا ترانا مقيمين ******** وأشد وأنزل وادي (ن) ينزلونه
- وهذه القصيدة لها مناسبة أقول فيها :
يا سعود لا تفرح علينا المساكين**********أهل النمايم والهروج الدقاقه
يا جاهل(ن) فينا ترانا الشلاوين**********ربعي مقاود ناس ماهم علاقه
يوم الشدايد واختلاف الموازيين**********والحق من عند الأعادي شفاقه
--------------------------------
- و هذه القصيدة قلتها عندما قرأت قصيدة غزلية في الجريدة لأحد الزملاء اسمه دبيان الله يذكره بالخير ورديت عليه :
يا بنت شوري عن دبيان نيري **** **** مالك ومال اللي يبثون الأسرار
الياجلس والياه ما هو نظيري******** واليا مشى مثل الرقيعي ليا طار
واليا رقد فالبيت جاله شخيري ******** يذيك وأنتي عنه بمآخر الدار
عليك باللي يبعدون المسيري ******** وصحونهم يشبع بها الضيف والجار
اما لولد الحارثي واستخيري ******** وإلا لابوجلال والا أخذي ذعار
--------------------------------
- كنت في مكتب جلال الفرم رحمه الله بعد تركي للمحاورة وقال :
لو البحر الآن يبي يرادك محاورة ترد عليه؟ وكان المؤذن يؤذن وكنت مستعجلاً فقلت هذه البيتين ثم خرجت :
نبي نزبن الله ثم نزبن على جلال***كبير الفروم معرّب الجد والخالي
ولد محسن اللي مايحسب بغالي المال *** وخيّالهم ينطح ثمانين خيالي
--------------------------------
وهذه القصيدة قلتها في محمد ابن رجا المحمدي الله يذكره بالخير :
يا بن رجا مالك تخلي بناخيـك ****** الظلم في كبدي سواة الحريقـه
والله لو إني في مكانك ما خليـك ****** أقلّ ما سـوّي لأقـول الحقيقـه
ما يكتبون اسمي علشاني اذيـك ****** طريقة يا شينهـا مـن طريقـه
انا أتشرف كل ما مر طاريـك ****** وأتابعك بالثانيـه و الدقيـقـه
ودي بدل قولة سعـادة معاليـك ****** ابن وطن ومن البيوت العريقـه
على جبين المجد بصمات اياديك ****** اخذت به صك وعنـدك وثيقـه
--------------------------------
- هذه قصيده قلتها في ابني محمد: -
يا محمد اسمع وأصغ لبوك بالك**********وأوصيك واحذر لا تغرّ الوصايه
دينك هو مكسبك هو رأس مالك **********حافظ على دينك وأزيدك دعايه
واحرص على المعروف وابذل حلالك********وقل الكلام إن دل فيه الكفايه
إن صرت مثلي حي فالي وفالك**********وإن زدت عني ذيك غاية منايه
عز الله إني مجتهد في خوالك **********وأخذت من عود العريني عصايه
--------------------------------
- هذه الأبيات قلتها في ابني زياد :-
يا زياد رحّب بي ليا صرت أناديك ********ربيع قلبي يوم أناديك يا زياد
بلاك طير(ن)مرهي(ن)بالعشاء فيك ********الخال أبو منصور والعم حماد
--------------------------------
- وهذه الأبيات قلتها في ابني سعد:-
أنا كن مابي ياسعد والهموم تزيد ******* بعد صرت في ديرة وانا صرت ديره
ليا جيت عندي ياسعد مثل يوم العيد ******ولن غبت غابت راحة البال والخيره
وأنا اطلبلك اللي ياسعد يرحم العبيد ********يسهل لك ياطيب الذكر والسيره
--------------------------------
وهذه الأبيات أيضاً قلتها في ابني سعد :
أنا كل ما نادم سعد قلت يا لبيك ******** احسب المنادي يا رحيم يناديني
ترى ان المراجل ياسعد ماتهيى هيك **** لكن انتبه واحرص على المال والديني
أنا كل خط (ن)من تواليك احسبه شيك **** حيث إنّك على برك ووصلك مضريني
وهذه الأبيات قالها شاعرنا في سعد عندما ذهب إلى عمله في أبها آنذاك:
طيّر سعد لأبها وقلبي معه طار*** ودي تعاجيبه وبأخذ علومه
ياعاذلين القلب كأنه على نار *** وأظن من يعرف سعد مايلومه
--------------------------------
ومن الطريف أثناء اللقاء سمع أصغر أبناءه ذو الأربعة أعوام قصائد في بعض
إخوانه وطلب من والده أن يقول فيه شعراً بطريقته الخاصة فقال :
( قل معاذ قل معاذ ) وكان له ما أراد فقال أبوحميد هذا البيت :-
يا صباح الخير يا حلو العماره ******** يوم أشوف معاذ يمشي في فناها
--------------------------------
وهذه الأبيات قالها شاعرنا في أبنه فيصل :
أوصيك يا فيصل وهذي وصاتي **** لاجوك شيبان الجماعة مسايير
اذبح لهم الحيل والرزق يأتي*****قدّم لهم صفر الدلال المباهيـر
والعود الأزرق فوق بالمجبراتي *****هذي تراها من صفات المشاهير
معربين أصلك بكـل الجهاتـي***** أبيك ذيبٍ في الليـال المناحيـر
وأحفظ سلوم الربع بالموجباتي*****وخلك معا ربعك على كل تقدير
وأوصيك يا فيصل بحفظ الصلاتي****هذي أمانه يا فتى وكلها خير
--------------------------------
وهذه القصيده قلتها في ابني فيصل: -
سميت فيصل على فيصل وأبيه يصير رجال
إن كان ما صــار طيــب مـثـل فـيـصـل عـزتـالـي
يا فيصل اسمع كلامي يا عريب العم والخال
ما يـدرك الـمرجلـه من صـار يركـن للظـلالـي
وتراي أبوصيك وأحفظ كلمتي يا طيب الفال
احرص على الدين والمعروف والرزق الحلالي
هذا وبنصحك ثم أنصحك حذرى قرب الأنذال
تـرى الـردي لـو صفـا لـك يـوم يمكر بك ليـالــي
--------------------------------
أما هذه القصيدة فقلتها لعاتق البلادي المؤلف والمؤرخ المعروف معاتبه فيها عندما أغفل عن ذكر أحد مشايخ قبيلة حرب الشيخ سعدي الذكري عندما ألف كتابه نسب حرب قلت فيها:
يا بن البلادي يا ذريف اليميني**********من لابة(ن) تبــرز نهار المثارات
خليت ذبّاح الخروف السميني**********مورد الهّياب حوض المنيات
سعدي عقيد الربعة الغانميني**********إن جاء نهار(ن) مثل يوم القريات
يا ما عطى من مقرعات الحنيني********ويا ما كسب من خيل أصايل وخلفات
مثلك تعده في أول الطيّبيني**********ما ينترك ستر البني العذيّات
--------------------------------
أما هذه القصيدة فقصتها أنني استعرت قلم من احد الأشخاص ويدعى أبو سعد وكان يقول أن خوالي حرب، وكان ذلك أثناء الدوام فنسيته معي وذهبت للمنزل ولما عدت من اليوم الثاني أعدت القلم له فأتى إلي بعد فتره وقال سامحك الله
يابو حميد تأخذ قلمي وتجعل أبنائك الصغار يعبثون به وتعيده إلي لا يعمل فقلت:
اذهب واشتري مثله وقيمته علي فلما ذهب وعاد قال لم أجد مثل قلمي ولكن ادفع قيمته فقلت له :كم قيمته فقال: خمسون ريالا، وكانت الخمسون في ذلك الوقت تعادل ألف ريال تقريباً ، فأخرجت المبلغ وسلمته له وقلت هذه القصيدة:
يا بو سعد جعل القلم رأس مالك**********غرمتنيه بغير حكم الشريعة
تـخــربــه وتقــول لــي من عيــالــك**********وانا الوفى والجود ليّه طبيعه
لو هو حلالي مثل ما هو حلالك*********حالف ما أدور عندك إلا الصنيعه
يا ليت ما حنّا جماعة خوالك**********أخير من تبع الردى والقطيعه
--------------------------------
وهذه البيتين قلتها عندما كان أحد الزملاء معي بالعمل يكتب قصيدة غزلية ويقول فيها يا لمزيونة يا لجميلة ...إلخ . ويقول لي كمل يا بن حميّد القصيدة لي ، وكنت أرفض وبعد إلحاح قال لي :
يا بن حميّد ليه ما تبدع القاف **** وانا أحسبنك ماهر(ن) با لقصيدي
فقلت له :
ما يا صف المخلوق غير الذي شاف *******وأنته تطرويلك غزال (ن) بعيدي
واللي تحبك يا سليمان تنعاف ********** لو أنها تشبه لظبي الفريدي
--------------------------------
- سألنا شاعرنا عن الرثاء وهل كتب فيه شعراً فأجاب :-
هذه القصيدة قلتها رثاء لـــ عمي محمد بن حـــامد الشلياني رحمه الله واسكنه فسيح جناته وقد حزنت لفراقه كثيراً .
أنـــا ما لوم الذي يبكي على عمه **********إن كان عمه مثل عمي كحيلاني
كبيرنا والصغيّـــر شايل (ن) همـه*******كنه وصي (ن) من أبويه وجداني
الجــار ما خاصمه والضيف ما ذمه*****وعزيز نفس(ن) عن القاصيين والداني
لعل قبر(ن) ثراها يا سعـــــد ضمــه**** يمطر عليه من السماء رحمه وغفراني
يقوله اللي عساه بحل من يمه**********وان كان له سية تجزى بالأحساني
------------------
أما هذه فهي أبيات رثاء قلتها على عجل في أبني جلال عندما توفي رحمة الله بعد سؤال أخي عبدالله قلت فيها -:
يا للي تنشد أخيك وش الحال**********أثرت شي(ن) في ضميره يكنه
وش خانت الدنيا بعد مات جلال**********ابن السعد لو المنايا أمهلنه
يا ليت من يفديه بالحال والمال**********وأسكن عنه فالقبر والموت سنه
هذي ثمان سنين ما ارتاح لي بال**********والحال مني يا بسه تقل شنه
--------------
وهذه أبيات رثاء في أخي أبو إبراهيم مطلق رحمه الله وأسكنه فسيح جنانه أقول فيها :
يا علي وين أهل الكرم والمروات ******** اللي رحل والنادر اللي دفناه
يا علي ليت أبو إبراهيم ما مات ******** حتى يشرف قصرنا اللي شريناه
وقبل أن نختم حوارنا سألنا شاعرنا عن بعض مايحفظ من قصائد والده حميد الفقيه رحمه الله فأسمعنا هذه القصائد : توجد قصيدة لوالدي من أجمل محفوظاتي وكانت بخصوص بندق تخص الوالد حميّد الفقيه رحمه الله حيث جاء إليه شخص يدعى صنت الوصّي الم
طيري وأراد شراء البندق فرفض والدي بيعها وبعد مفاوضات وإصرار من صنت الوصّي رفع والدي سعرها إلى ثمن باهض ولم يكن ينوي بيعها فقال صنت الوصّي : شريت و تباركت بالله فقال والدي هذه القصيدة يتوجد على بندقه وذكرياتها معه في الصيد وغيره :-
وآبـنـدقي يا نـاقـلين البارودي**********اللي ليا مديتها تشرح البال
اسري بها واصبح علو الحيودي*********وأذبح بها صيد(ن) جهاجيل اجوال
كم ليلة(ن) حنيت منها العمودي**********من دم(ن) أشقر يوم أحلّيه شلال
يا زين ضرب اسهومها فالعضودي*********واليا وقع في سدهن جنّي اقبال
وإن جاء نهار(ن) فيه مثل الرعودي *******نخلف بها راي المعادي ليا عــال
يوم إني اذكر بندقي وا وجودي********وجود من يحـدى عـن المـاء مع اللال
وجود من غاروا عليه الجرودي**********وأمسـى مخليـنـه فقيـرا بـلا مــال
ارجي من المولى ثمنها يزودي**********واجتاب من سوق الغلا لي معدال
ما مونت(ن) مثل الرفيق الركودي**********لاهو بدباج(ن) ولا هو بزعال
- وهذه قصيدة أخرى بعد أن أنتقل إلى الصويدرة (من ضواحي المدينة ) وفي
قصيدته يتوجد على ربعه ودياره ويفتخر بهم ويثني عليهم:-
لجلج ضميري مثل لجلاج مضروس********عينه لذيذ النوم عــيـّـا يــجيهــا
وإلا كما ذيب(ن)قنب براس قانوس********يجذب سباع(ن)بالخلاء يحتريها
لي ديرتن من دونها حزم مرصوص**********ماحـوم السـيّار والبقـس فيها
ربعي مخلّف تحتمي مال وغروس**********دحّــامة العـدوان لا تـهـتـميهـا
يا ليتهـم يـمّــي يريـدون بعــسـوس**********حتى تميز ديرتن صـرت فيـهـا
إما أرغبوا واطيـب لو كنت مـانـوس*******وتصبح شعيله ممري الذود فيها
وإن كان عافها زاد همي بهاجوس******* وأخلي الديره لمن يحتـميـهـا
دار الـسـحـيـمـي فـيـه غـايـة ونـامــوس*******لعل همال الحيــاء يغتشـيــهـا
--------------------------------
- بعدما أنتقل والدي رحمه الله إلى الصويدره أرسل حامد ابن نويجع رحمه الله المخلفي هذه الأبيات :-
عامين ناحي والضروس تحداني ******** وأبو سعيّد ماقفه مايخليه
ما يعتلي قصر بليا بواني ********ولا يعتمر بيت تخالف بوانيه
ورد عليه والدي حميّد الفقيه المخلفي رحمه الله بهذه الأبيات:-
من عقب ياهليل بديت البياني ******** طفر علي الدمع وأزريت لاصغيه
والقلب مابين الحواني شواني ******** شوي الشويط اليا سهى عنه راعيه
وده بلاما محتمين الوداني ******** اللي منازلهم على حيد واديه
ياراكب(ن)حر عليه الأواني ********مكلفينه والسفايف تباريه
منصاه ربع(ن)ماتجي فيختناني********طراف الأكحل والعويدي تحاذيه
تلقى منازلهم تجي في البياني********والكل منهم وده الضيف يلفيه
سلّم وقل وش حالكم هالزماني ********ردد سلامي لين الاقصين توحيه
وإن سالم عنا الرجال الذهاني ********قولم بخير وطيّب الكيف نشريه
في ديرت (ن)منزالها ماجفاني********بديار حرب اللي عسى الغيث يسقيه
مطلق بن غريب اليزيدي من أهل حجر نزل في ديار مخلف في الحجاز وقت الربيع وأعجبته
( المحرمة) وأهلها وتمنى لو تنتقل معه إلى ديرته فقال هذه الأبيات :
العفو يا لمحرمه ليتك معي بكره تشدين ******** واتجين بأم الثمام اللي عليه القابليه
وإن كان عيا فرح نرضيه من مال الدواحين ******وإلا الجعادين ما من مالهم سبلا هديه
ويا ليتني من مخلف من مرجحة الموازين *******وأنزل شعيب الفوآد اللي مشاريبه عذيه
وإن كان قالوا حضني نشتري منهم قراحين***** والمال بالمال والخطوة مع الخطوه جريه
* فرح : هو فرح بن مروي رحمه الله أمير قرية الأكحل في الحجاز.
رد عليه الشاعر حميد الفقيه رحمه الله:
هيض علي الكلام اللي تغنيه المساكين ********اللي تغني ولا تعرف الصواب من الخطيه
يالمحرمة من كلام ابن غريب لا تخافين ********حنا حميناك قبل الدين يوم الجاهليه
يالمحرمة كان مطلق جاك نادي ياشلاوين *******وإن كان ماسال دمه فيك مشروهك عليه
وإن كان بغى الفوآد ومنزله حنا معيين********مادونه إلا أم خمس اللي مضاربها قويه
وانا احمد الله ترانا عن حضاناكم غنيين ******** ريح حضاناك للخربان والدار الوبيه
--------------------------------
بعض ما قيل في شاعرنا من قصائد مدح وثناء :
ونشكر سعد بن حمدي على تزويدنا ببعض ما قيل في شاعرنا من قصائد النظم وهي كثيرة اخترنا لكم القليل لكي لا نطيل ومنها :-
الشاعر: ( علي بن ناجم العلوي) يقول: فيها :-
الطيب لك عادات يا منقع الطيب******* ولا أنت بحاجة مدحي ولا احتريته
مادحك ربك يا حصان الأطالــيب**********وتستاهل البيضاء على ما جنيتـه
يوم الردي بيته بطون الأشاعيب**********بيتك على رأس النباوه بنيته
متبيّن (ن) للي يبيله معازيب**********يوم الردي طمّن عن الشوف بيته
أبـو حميد ياعريب المناسيب**********غبني بصندوق الضماير كميته
وأثر بلايه ملحقين المشاهيب**********اللي يحبون أكلة الناس ميته
حطّوا لي بدربي كثير المناشيب**********وطّوني بجرم(ن) وأنا ماوطيته
ولا عندي بنفسي لا شك(ن) ولا ريب*********يحميني اللي تنحر الناس بيته
يحميني اللي يعلم السر والغيب**********اللي ليا ضاقت عليّه رجيته
--------------------------------
- وهذه قصيدة قالها شاعر بدراني كان يرغب في نقله من مكان عمله إلى مكان
قريباً من أهله ولله الحمد يسر الله لبو حميد نقله حيث أراد ويقول في قصيدته- :
البارحة كنّي على النوم محدود **********ليل الشتاء كله على رأس كوعي
قالوا لي العذال ما بالسهر زود********** ملزوم تخضع للأوامر خضوعي
أشكي على حمدي ذرى كل مضهود*********واليا نخــيته مايصك السموعي
حيثه فهيم ومنسبه من هل الجود********من عقب شيبان (ن) تضد الجموعي
نسمع خبرهم والفعايل لها شهود**********ذيب(ن) لا شاف المعادي بتوعي
يابو حميد ماعن الحر مجحود********** أجيك لا قلّت علي السنوعي
أهلي بعيد وشوفهم عندي كود**********وإجازتي عطلة خميس وربوعي
شيبان والشيبان ماعنهم صدود**********يرجوني رجوت سحاب الرجوعي
اليا ذكرت اثنين والثالث العود**********قامت تهل من العيون الدموعي
--------------------------------
- وهذه قصيده من الشاعر مفلح بن علي البدراني موجهه إلى الشيخ حمدي بن حميد الحربي:-
يا راكب اللي كل ما زيد لـه زاد********جمس(ن) لحزات الطلب ينعديبـه
لادق سلفه وأرتفع كل عـداد**********ما حط بالطبلـون لازم يجيبـه
وليا مشى من بلاد ناص(ن) له أبلاد*******يسبق اسهوم(ن) وجهـن لظريبـه
ملفاه شيخ(ن) من صناديد الأولاد**********عز الرفيق و عز مـن يلتجي بـه
أبو حميد لاحصل كيـد وعنـاد**********يشرب من الموت المصفى حريبـه
ابن الرجال اللي لهم حظ و شداد**********زحول الرجال اللي تحل الصعيبه
أفعالهم تذكر قديمات و جـداد**********وكلاً يجيب للي يحوشه نصيبـه
يا بو حميد جيت من غير ميعـاد**********وجيّاتنا ما هي عليكـم غريبـه
لا مسنا حاسوس جينـاك رواد**********يا سناد من طالت عليه الغليبـه
لـي لازم (ن) مابيـن صـادر ووراد**********واللي مثل شرواك لازم يجيبـه
- كان هناك شخص قد تم سجنه وقد منعت عنه الزيارة فحاول بكل ما يستطيع الخروج أو السماح لمن يزوره بمقابلته ولكن دون جدوى.. فأنشد هذه الأبيات إلى الشيخ حمدي المخلفي التي قال فيها:
يا ليت "أبوجلال" عنــدي قريبــي********يومـ(ن) عني يمنعـــون الزيـــارات
نعم (ن) بأخو سعدة شجاعه وطيبي********يا ليت مثـله واجد(ن) بالجــمـاعات
ولما وصلت هذه الأبيات إلى الوالد أخرجه و لم يبت ليلته في السجن.
وهذه القصيدة قالها جاره الشاعر متعب بن عويض المشيعلي الحربي بمناسبة انتقاله إلى بيته الجديد :-
يا سامعين الصوت صلوا على النبي**********الـهـادي المبـعـوث النـزيـل
رحمـه مـن الله مرسلـه لعبـاده**********يحطـم الأصـنـام والتضلـيـل
يـا الله ترزقنـا شفاعـة نبيـنـا**********يا حامي الكعبة مـن أهـل الفيـل
يـا رب ترحمنـا وتغفـر ذنوبنـا**********وتلطـف بنـا يا لواحـد الجليـل
مـن بعدهـا يا سامعيـن المثايـل**********مثايـل ٍ مـا هـي بقـال وقيـل
نظمتهن ما هو طرب ضيق خاطـر**********من واهـجٍ بيـن الضلـوع نزيـل
الله مـن طـرف تكـدر منـامـه**********العيـن تسهـر و الفـؤاد عليـل
بأسباب جار(ن) شد و اقفت رحايله**********قفـت ضعونـه منتـوي رحـيـل
جار(ن) لك الله ماشتكى منه جاره**********ولاكـل جـار(ن( بالجـوار بديـل
يا بعد فرق الناس ياجاهل(ن) بهـم**********وهبه مـن اللـي بالعبـاد وكيـل
جار(ن) ربيع الجار ساعة رحيلـه**********وجار(ن) تمنى لـو يقيـم طويـل
عز الله إنه شـد جـار(ن) نعـزه**********معـزتـه بقلوبـنـا بالـحـيـل
حمدي رحل وأعلـن رحيلـه عنـا**********وشفـت المواتـر قربّـت للشيـل
جنبـت ما جيـتـه ولا ودعـتـه**********مابي على لحظـة وداعـه حيـل
وأرسلـي الـوداع مـدت وافـي**********صوغة ذهب صافي عيـار ثقيـل
أبيات من شاعر بعيدٍ عن الـردى**********شاعـر جـزل مايقبـل الهـزيـل
فيهن ذكر بعـض فعايـل ربعـي**********أولاد مشعـل مـزبـن الدخـيـل
سلم (ن) لأهلنا يا نظيف الجيـره**********متوارثينـه جيـل يتبـع جـيـل
عاداتنـا للضيـف ذبـح الحايـل**********وقصيرنـا ماعمـر جـاه الميـل
ودون الخوي نحمل شهادة بيضاء**********راية نقـاء تلـوح مثـل سهيـل
لاشك أنـا أباعـد بعـض فعولـك**********موجز وسامحني عـن التفصيـل
اللي عرفتـه عنـك طـول المـده**********ماقلتـهـا نـمـه ولا تمـثـيـل
فيك الوفا والدين والصدق والكـرم**********بيضٍ دفوفـك مـا تمـل الشيـل
من لابة(ن) تعرف بوقـت الشـده**********إليـا قـدح خشـم الزنـاد فتيـل
نعم(ن) "بأولاد الخشيمي" مخلـف**********ليـا قـرب العمـيـل للعمـيـل
عز الرفيـق وشـر مـن عاداهـم**********وفي كل حـال يرجحـون الكيـل
من غير قاصر في جميـع القبايـل**********كلـن علـى حقـه مـداه طويـل
الناس مثل الناس بالطيب والـردى**********ولايستـوي هرجـن بـلا دلـيـل
تمت بذكر الله وصلوا على النبـي**********عـداد مـا زاح النهـار اللـيـل
----------------------------------------
في نهاية لقاءنا وجهنا سؤال للشاعر حمدي المخلفي الحربي نطلب منه نصيحة للشعراء المبتدئين والقدامى أجابنا؟
نصيحتي للشعراء ولغير الشعراء أن يجعلوا تقوى الله نصب أعينهم وأن يتجنبوا الظلم وأن يبتعدوا عن السب في قصيدهم ويحاولون قدر الإمكان الترفع عنه.
--------------------------------
هذا وفي ختام لقائنا نتوجه لشاعرنا الشيخ: حمدي بن حميد و ولأبنائه بجزيل الشكر على حسن الاستضافة ورحابة صدورهم ونعتذر من الجميع إن حصل خلل أو تقصير
وصلى الله وسلم على نبينا محمد وعلى آله وصحبه أجمعين
إعــــــداد :-
وليد بن محمد الهذيمري --- مطلق مناور الشلياني
بدر معوض الهذيمري --- بسام صالح الشبعان
وليد بن عبد الله الصرير --- عبيد بن جزاء المخلفي
ناصر نفاع النباتي
..................................................
تـفـريـغ:-
وليد بن محمد الهذيمري ---- مطلق بن مناور الشلياني
26/5/1430هـ
انتهى
منقولhttp://www.mukhallaf.com/vb/showthread.php?t=25471 من منتديات مخلف

ونعم ونعم ونعم
والله يـعـطـيـك الـعـافيـــــــــــة
بيض الله وجهك

ماشاء الله

الله يطول بعمره


هذا شاعر ماهو بسيط حسبي الله على الاعلام

مشكوووووووووور يابو محمد على النقل الرائع عن الشاعر / حمدي الفقيه

الله يعطيه الف عافيه
ويطول بعمرة اللهم امين

الحميدي المخلفي بيض الله وجهك على النقل الرائع

واشكر من قام بهذا الاعداد واشكر الشاعر على الاستجابه

والله ونعم والف نعم

شاعر بهذا الحجم وهذه الجزاله لم يخدمه الاعلام

عرفتنا على شاعرنا وبيض الله وجهك

عسكر البارود
حمود الغيداني
فواز الوسيدي
رفيع المقام


لك كل الشكر والتقدير على المرور والتعليق .

شكراااااا لك

بيض الله وجهك يالحميدي على نقل اللقاء
سلمت ياغالي وتسلم يمينك

وصح لسان الشاعر حمدي
والشكر لمن اجرو اللقاء

لقا رايع


وشاعر جزل
يالت شعرانا الكبار يسوا معاهم
لقاء
لنشر ابداعهم
لاهنت ع النقل