ديوان الشاعر عامر عمران الشدادي

يغر بعض الناس حاجه بسيطه = كلٍ تعداها وكلٍ وصلها
مير الذي عقله صغيرٍ محيطه =يضيع قدام الوعر مع سهلها
قبل يروح بعيد تسمع فحيطه = ماشافله ناسٍ بعالي جبلها
ردات عقله في غروره وسيطه = عزاه من بعض البصاير لهلها
ما فرقت بين البحور الغويطه = وبين الرسوس وبين مويا ثملها
ما تبعد الشوحه شبوح الربيطه = والمطلقه تبعد ويتعب حولها
وشمل المرام وشملها ما يخيطه = الا حبالٍ تتعب اللي فتلها
ولو كان فتالٍ عظوده نشيطه = يمكن جهوده ما يوفق عملها
ما كل ما تحطه ابالك تحيطه = ولاكل من خطط بيوتٍ نزلها
والعافيه مكسب وفيها غبيطه = والا ترى الدنيا سريعٍ زولها

اعماس كيف ولا بهاراً بثومي

عقب العساسه عن هاك الدرب خيرت= اعماس كيف ولا بهاراً بثومي
اليابغيت امشي على الدرب نورت=وعرفت وش قدمي بليلا ً كتومي
واليا عرفت اللي على الدرب واسفرت=وقريت لوحاته وشفت الرقومي
اما معه سافرت ما عاد شاورت=والا جلست ولا السفر بمحتومي
اوشفت اخيراً منه غيره وغيرت=حتى لو اني كد دفعت الرسومي
ارجع مدامي غادياً لو تخسرت=والعرف نوب من الخسارة يقومي
ولصافي الرفقه من الناس دورت=شبلاً سنافياً حكيماً فهومي
لن جيت له سرك ولن جاك سررت=عندك حشيماً وانت منه محشومي
بمرافقه كنك لحاجتك وفرت=اصفى ذهب واغلاه عما عمومي
دامه حزامك لشواهيق شهرت=حراً ولد حراً حريراً سمومي
ما هو الذي لا قست عقله وعايرت=لقيت مسكيناً لنفسه يزومي
الرجل لا ما اوحيت قوله وفسرت=الثوب ما ماليه غير الجرومي
لا تنخدع بجروم ناساً تكابرت=نوب ترى الجوهر يصير معدومي
ماكل من شفته لعنتر تصورت=قبل الدلايل لا تصدر احكومي
لا تقول وانت من الزلل ما تحذرت=تصبح على قولك وعلمك ندومي
تراك لا ما اثبت قولك وبررت=فتحت باباً للخطا والخصومي
ورجعتك ما هي هينه لا توعرت=ولو احصلت ماهي على ما ترومي
وش عاد لاونك عقب جيت غادرت=لأفضل انك ما تجي بك وهومي

كشف الحساب مبينن لي رصيده

يا مسندي باقي مع الخمس خمسي = وتمرني واقرا عليك الجريدة
اقرا عليك اخبار قبل امس وامسي = عندي قديمه وانت عندك جديدة
زال الضباب وزال وهمي وعمسي = وبان الطريق من النقاط البعيدة
يبين ريح البن من عقب حمسي = كم واحد قبل اللوازم وليده
ما كل من يصبح كما الزير يمسي = الغيب يظهر والحوادث بريدة
شيً يشاف وشي ملموس لمسي = من ما يزيل الشك والا يزيدة
عند الذي ما يطمعه كل نمسي = حراً يحفظ الدرس لو ما تعيده
قلبه صحيح ولا تعرض لطمسي = وهذا الذي درس التجارب يفيده
وانا الذي واجهت ليل وشمسي = وكشف الحساب مبينن لي رصيدة
وقنعت بالمقسوم وابعدت رمسي = ولا زهدت الا بدنيا زهيدة
ان اقبلت بجهار وان كان همسي = ما هي بدايم يالسنا في جديدة

الصحبه اللي بالرخا صمموها

الصحبه اللي بالرخا صمموها=ولا راعوا بتصميمها ساعة الضيق
على وصوف الطيبة رهموها=وغشوبها الانذال ربع(ن) مطاليق
واذا الظروف القاسية واجهوها=ربي فضحهم وانكشف كل تلفيق
كل العلوم الاولـه غيروها=وعن غشهم قامت تطيح المساحيق
ياشين صحبتهم ولو لمعوها=اخساس ناس (ن) ينقضون المواثيق
صحبتك لاحتاجوا فزعك ادعوها=ولياغتنوا ماهم عليها مشافيق
اليا اقبلت دنيا الفتى سابقوها=وان كان قفت يقطعون المسابيق
صحبة مثل هالناس ذولا لبوها=ياما من العلقم على ضوها ذيق
وياما وياما من رجالاً شكوها=بالوقت هذا والسنين المعاتيق
كد انهم مروبها وعــرفـوها=وتطـرقـوهــا قبلنا بالطواريــق
وتحاذروها بينهم واحذروها=يوم العرب تصبح وتمسي على الريق
وفيها كدا ابدو رايهم ووصفوها=ولاابقوا لمن بقو من الناس تعليق
عبو نماذج والاسام اتركوها=شواغراً تركب على النذل وتليق

مرثية بشاعر الخليج : صياف الحربي رحمة الله

الادمي عمره مقدر ومحتوم = مهما يكون مغادرا للمكانا
له ساعة تحسب وله تربه ويوم= الله يرحمنا اليا جاء سرانا
ويا شاعر الميقاف والقاف مرحوم= الله يغفرلك ويجبر عزانا
عساك جار اللي عن العيب معصوم= بظل من الله في نعيم الجنانا
فقدك علينا كايداً مير مقسوم = ما تمشي الدنيا على مبتغانا
اربع عقود بعالم الشعر زيزوم= ما يوم صياف السحيمي توانا
شاعر خليج وللجماهير معلوم = ايتابعونه من قديم الزمانا
يشبع شغف من عنده الشعر مفهوم= الفتل هو والنقض له فيه شانا
يعرفه الادنا والاقصاء من القوم = اسمه دخل حتى بصم الاذانا
حراً يحوم اليا صعب بالسماء الحوم= وصل المكانه مثلت مستوانا
ويبقى بقلب الذاكره دايم الدوم = يا رب تغفر له وتقبل دعانا
وعنا على دنيا غرابيلها كوم = ياكثر ما قامت تعاكس هوانا

((( عقب الفضاء مسلوب اراده ومكبوت )))

عزي لطيراً ذاق مر البلاوي= عقب الفضاء مسلوب اراده ومكبوت
اصبح بحكم اللي من العرف خاوي= ماقبله احداً صار طيره بلا صوت
قطع حبال الصوت من دون ياوي= خلى طبيب الطير يشوتهن شوت
واليا كفخ قال انت ويش انت ناوي= وسلقاه بالماء لين يقبل على الموت
يبيه صورة طير لروح تاوي= ويجوز يصنع له مع الوقت ريموت
ويمكن يحطه في قفص ببغاوي= ولا تامنه لو يعلف الطير بسكوت
والطير ما يبغاء غشيم عماوي= ياللي ظلمت الطير والظلم ممقوت
خله لمن مثل النداوي نداوي= بحاضر ومستقبل وفي فايت الفوت
وبالعرف ابو سلمان باعه رهاوي= كم مشلحٍ مع مشلحه ماتجي كوت
وله بالقنص والطير شعرا فتاوي= واصدر دواويناً ماهي خمسة ابيوت
قيل الحويفي لاتكلم نقاوي= كنه من الواحد وعشرين منحوت
وان وصف النادر على الجول هاوي= عيشك واقع دونه اميال ووقوت
وبالبرد نوم البر عنده يساوي= النوم في خمسه نجوما ابيروت
لامسوي (ن) مثله ولانته بقاوي= مع ربع دربه سير وتعود مبهوت
لو حدرك الفكسار ماهو عراوي= والقارمن يعطيك توجيه ونعوت

صفق ياجمهور المصالح الشاعرك = اللي بتصفيقك خدعته وصدق
ياللي لمصلحتك توظف مشاعرك = وغرت ضعيف (ن) بالضعيف إيتشدق
قام يتوعر يوم صدق توعرك = وطير عيونه في حضوك وحدق
وهو لو انه بالمواقف يسعرك = طاحت دروعه قدم شلفا المشدق
تنح عن درب العرب وانح اباعرك= موط الاذاء عن الطريق وتصدق
قبل تحصل واقع الامر ذاعرك = الدرب ماهو دايم (ن) لك محدق

ياشلع قلبي شلعة ًمالها اشباه= غـيرالذي شالت وحالـت طـميه
على غزالا ًماقوى القلب ينساه= غـرو (ن) تولى خافقي بضـحويه
واهني من حصل قباله هـنـياه= لاواهـنيه بالحياه الهنيه
مع واحدا ًمحد (ن) مع البيض حلياه= لوالذي ماشاف يزرى عليه
يـزرى علي اللي عيونه مغطاه = واللي سلم ما واجهه في مجيه
يرى الحديد يذوب ويقول وش جاه = مستغرب (ن) ما شا ف نارالـظيه
ماشاف من ظيق المخـيله ثناياه= عـنق اللي الأطرش حشم به حليه
عين اشقراً روس الشواهيق مرباه = حرا ًكـفوفه للحباري منيه
والجيد ذيل اللي لثارن معـذاه= من يوم ولدت لين صارت ثنيه
وهي على عزاً وتحت المراعاه= فيها العداء من كل باب محسيه
تعب لها اللي ناويً بالمـثاراه = حاس ( ن) بها راعي جوادً رهـيه
يوم العرب كلن بسيـفه وشلفاه = ولايشرب الفنجال غـيرالدهيه
واليوم امان وراعي الحق يلقاه = بشرع ونظام وراحـت الجاهليه
كلن ورى حقه أيديـنه مكفاه = مرتاح (ن) الفارس وبنت العبيه
في ظل حكام الشريعه هل الجاه = اشيوخ نجد مظللين الرعـيه
ميرالذي ذكرعلى القلب واشقاه = غرون غريرن نظرته سـم حيه
حلوا ًحلن منه النحل لو تحلاه = ماعاد صاريهوش دون الخليه
كان العسل قدمه وخذ من خلاياه = تغير الواقـع محى الغايريه
ظني وناعـيني عـن الناس مغظاه = ماسك حدودي ميريجنا عليه

اليا حصل لك عافيـه وش تبي غير = اشكرعليهـا خالـق الخلـق مولاك
شكرالنعــم يزيد من خيرها خير = خير يتـقدم لك وخيراً بدنياك
والنفس لاتسـوقك لبعـض التدابير = ليا منها طاشت وشيطانها حاك
كم من تـدابيرا ًوراها تغابير = وكم هيناً سلكـه للدراك هلفاك
وخلاك تندم بين ورد ومصادير = لانا طحـن هـاذي والا. لاحقاً ذاك
وعـرف ترى بالعلـم شرحاً وتفسير = لمـورحايط بك جهلهـا وتخفاك
وترى الجهل غـبة ظلام ومعاصير = ويلقا بـه الشيطـان باباً وشــباك
وإشــارة الفاهـم تفكك مشاوير = وخطى الجهل فرصتك فيها تخطاك
وفرصتك ماتعطيك مهلـه وتاخير= غـنمتهـا والاتـعــدت ولامــداك
وصارت عليك ابعد من طويق عن كير= وأضـحى التفاتك لاتنبـهت جدواك
وعرف ترى رفقـة هـل العرف تنوير= تنـوير لـدروبك وللخـيرتـقداك
سيرة مسيرتهـــم توضح لك السير= ونتــه مريـح ومستريحه مطاياك
اخــذت فكره ماخـذت منـك تفكير = ولـبسـت لك درعاً بحيـل الله اذراك
وليــا طلبت اطلب ولـي المقادير = اللي غـنياً عنك حـتى اليغـناك
وليـا سعــيت اترك علــيه التياسير = علام يالمخلـوق بامرك ودعـواك
اللـي لــه بخلـقه مراداً وتدبير = خلاقهـم رزاقهـم مجرالافـلاك

حرب الذي جنابهم ما يملا = وتاريخهم ما تنحصى معجزاته
ماهو ضحا ضيحً ضحا تضمحلا = مثل الجبال الراسيات بثباته
صنعت رجال بفعلهم يستدلا = مثل نويشي يوم تذكر سواته
حرباً اثراء دخيل ما يخلا = وارواحهم ترخص مقابل نجاته
ومن ضافهم لقاء الكرم وسفهلا = هلا وهيل وحيل من واجباته
وقصيرهم لاشد لدمع هلا = يبكي عليهم طـول باقـــي حياته
وحلالهم لا ربع الخوف فلا = لو ريف دار القوم كثرو حماته
عن الربيع اجموعهم ما تجلا = يرعى دبشهم لين يقضي نباته
وكم هازهم من جمع قوماً وذلا = عقب الطمع صارت نجاته مناته
وكم راس شيخاً من متونه تدلا = اسيــــوفهم بيمانهم ناتفاته
ما يذبحون اللى العقيد المحلا = شيخ الجهام اللي يقدى عباته
يوم العرب فوق الرمك ما تسلا = والسيف تاكل بالجماجم شباته
هذي فعايلهم وهذا السجلا = فعلً تراقب من خلقها رواته
وانا ماذم الناس حاشا وكلا = مالي بسيات البشر وحسناته
واليوم امان وخير والشر ولا = الامن عم الشعب والشر فاته
لكن تبلتنا الخبول المبلا = خشاش خبلن خلف شاشة قناتة
ايفكرون الدرب مفروش زلا = للمبتهت مهما يكون ابتهاته
لاوالله الا ثم لا والله الا = مايضيع حق اخوان نوره قضاته
ومجدن سماء يم النجوم وتعلا = صعبً على المبغض تطوله اهواته
لو قال مهما قال واخطاء وزلا = نجاس هرجه ما يتعدى شفاته