محمد الربيقي و سفر الدغيلبي..

هذه المحاوره جرت بين الشاعرين محمد عبيد الربيقي الحربي
و سفر الدغيلبي

=محمد عبيد الربيقي:
يا مرحبا بالرجال اللي تسد اللزوم..=..أقولها والمعزب بالوفاء قالها
مادام معنا سفر موجود لازم يقوم..=..واللي يقرب حمول البدو يشتالها
=سفر الدغيلبي:
دام البقاء من هجوسن كل ليلة و يوم..=..تلقى كثير البيوت وتأخذ جزالها
سفر حضر عندكم في حفلكم و معزوم..=..ما هو بسلعه تروج عند دلالها
=محمد عبيد الربيقي:
إليا تخيرت أبا أخذ من خيار العلوم..=..واللي على فالها تسري على فالها
يابن الحلال انتظر حنا نعرف السلوم..=..السالفه ياطويل العمر يبغالها
=سفر الدغيلبي:
لو كنت تقدر تصير ادفاع ولا هجوم..=..ألبس غترتك البسام و عقالها
سمعت لي كلمةٍ مالي وراها لزوم..=..لا عل من حطها فالارض يشتالها
=محمد عبيد الربيقي:
حنا غنيين عنك ولانبي لك هدوم..=..يارب تستر على ناسٍ هذا حالها
مالك ومال الكلام ارتاح وأنت مخدوم..=..بعض العرب لأوحت الهرجه يورالها
=سفر الدغيلبي:
غناتكم من غناتي جعل عمرك يدوم..=..طيب الروادي من الموجات وأرسالها
ودي صحيح اتريح من كثير الهموم..=..مار العرب تبلش الحمله وجمالها
=محمد عبيد الربيقي:
خلك بحد البسيطة لا تعود تحوم..=..ماكل ما تطلب الناس إيتهيالها
يبى يسافر سفر والعافية ماتدوم..=..اثر شاعر عتيبة و خيالها
=سفر الدغيلبي:
أحوم و أطلع على سطح القمر والنجوم..=..وأنت النجوم العوالي مالك و مالها
ترى الحكم للعدل والسيف وانت محكوم..=..ياللي لاشفت الطراقي قمت تبرالها
=محمد عبيد الربيقي:
طلع لسطح النجوم وعاد ميرمهزوم..=..مدري سفر ويش سوت له وسوالها..
ترى العلوم الردية من نصيب الرخوم..=..و ارجع على اللي يجيك المال من مالها..
=سفر الدغيلبي:
انا رجل ما ألحق الغلطان شرهه و لوم..=..عاقل شبابه ما يشره فوق جهالها
أنته ربيقي و أنا أعرف حرب ناسٍ قروم..=..لكن بهم ناس فال الله ولا فالها

وتحياتي للجميع...

الله على الإبدااااااااااااااع

صح لسان الشاعرين ... و الحقيقة أن حرب غفلت كثيراً عن هذا الداهية .. ألا وهو الشاعر
محمد بن عبيد الذي يشرف حرب في جميع المحافل ,,, نتمنى له التوفيق0

و شكراً لك أخوي / فهد الفريدي

صح الله لسان الشاعر الكبير محمد
وعسى الله لايهين سفر
بيض الله وجهك اخي الشاعر القدير فهد المحسن
قواك الله لا عدمناك

مشكور يافهد
والحقيقه ان الشاعر محمد عبيد الربيقي
شاعر ويستاهل من يشجعه
ولكن مع الاسف بعض شباب القبيله
يشجعون مستشعرين وليسى شعراء بما تعنيه الكلمه
ونرجو ان يفرقون بين الشاعر وبين من يصف الكلام وياكل من المناكح ولايدرك ما يقول وما يقاله

محاوره قويه ورائعه

الله يعطيك الف عافيه يالغالي

بيض الله وجهك
أختيار موفق
محاورة رائعة ، وجميلة وممتعة
ومحمد عبيد شاعر بمعنى الكلمة

صحيح والله أنه داهيه صح لسانك يامحمد وعزالله مكمل براعته الشعرية دماثة الأخلاق مشكووووور يافهد المحسن ...

بيض الله وجهك يالفريدي


الشاعر/ محمد الربيقي شاعر لايشق له غبار


وفاهم كثير بالمحاورة وماهو جديد على المحاورة


ولا هو من اللي يترززون قدم الكاميرات بكل حفلة

وهذا تدل شاعريتة وعدم تنزيل نفسة للمستويات المتدنية

الاخوة الاعزاء..
فارس عوف
البلادي
فارس الفرسان
بن فرهود
الحميدي المخلفي
العطري
عبدالله السليمي


أشكر لكم مروركم العطر

صح لسان الشاعرين مشكووووور يافهد المحسن