7 رسائل و7 ردود

سبع رسائل وصلتني على الجوال من بعض الاصحاب وقد تكون من منقولهم ولكن تجاوبنا معهم وردينا على كل الرسائل وعرضت الرسائل والردود على بعض الاصحاب وكل منهم اعجبه موضوع ونادر مايتفق اثنان على رسالة واحده وردها على انها هى الافضل وهذا يدل على اختلاف الاذواق والتوجهات
وها أنا اعرض لكم الرسائل والردود وارجو ان تطلعوني أي الرسائل والردود راقت لكم اكثرولكم مني تحية...
الرسالة الاولى
ناس على قل الوصل حيل تغليك***وناس مقابلهم عمر ..يكرهون
بعض البشر مهما هملته يراعيك***والبعض لو تعطيه عمرك يخونك

الرد والمجاراة

ناسن تودك حيل وناسن تعاديك***شين وكاد مشاهداته عيونك
لاشك لا تجعل همومك توديك ***واليأس ريحه لا يكسر غصونك
خلك مع الله دايم الدوم ينجيك***وعلى الوفا والطيب ناسن تعونك
وليا حداك الوقت والناس تجفيك***خل الصبر مفتاح عالي حصونك

الرسالة الثانية

نفس الضعيف تورده للمتاهات***اهم شيء انه يحقق هدفها
صداقته تبقى شريحة بيانات***متى ما تقضي فائدتها حذفها

الرد والمجاراة

بعض العرب فقده مابه حسافات***والنفس يمه لا تكثر أسفها
أحرص على اللي طيب الذكر والذات***فخر الرجال اللي تعلى شرفها

الرسالة الثالثة

اختر خويك من وسط ألف رجال***والعود الاصلي ينعرف لاكويته
بعض العرب ياخوك مظهر وتمثال***والبعض الاخر لا بغيته لقيته

الرد والمجاراة

بعض العرب تصاحب الجاه والمال***لو كان راعيهن تردى بصيته
وبعض العرب مافيه هرجن ولا جدال ***الله يعمر بين الاجواد بيته
احرص على الطيب ياطيب الفال***اللي ليا ضاقت عليكم نصيته

الرسالة الرابعة

مايعيش السبع من صيد الضباع***لو زمان السبع ماهوب اجودي
ودي ارفع للزمن كف الوداع***لاتردى صاحبن ماهو ردي

الرد والمجاراة

الضيع يعتاش من صيد السباع***وينعرف بالناس ذا الكف الندي
والوفا والطيب يوخذ ما يباع***ولا يقال الشين للطيب لدي
واعرف ترا الطيب عزيز الاطباع***والطيب للطيب عسى عمره مدي
والا الردي الله يزيله عن القاع***ومن صاحب الغادي تراه يغدي
خلك على ماقيل بالطيب طماع***وصيتن اوصيك فيها يابعدي

الرسالة الخامسة

الله يزيد الخير في ديرة الخير***وعسى السحابه من وراها سحابه
ليل ومطر واخبار خير وتباشير***يالله عسى دعواتنا مستجابه

الرد والمجاراة

سلام مني عد ماغرد الطير***يامرحبا في صاحبي مع جوابه
عقب السموم وعقب لفح المعاصير***الكل يفرح بالمطر ياهلابه
والناس تفرح بالمطر وين مايصير***شين على ماقيل مابه غرابه
وحنا فرحنا كان جونا مسايير***شرواك ياللي فيك طيب وحبابه

الرسالة السادسة

ماهو ضروري كل تافه تعاديه***ولاهو ضروري كل طيب صديقي
على الردى والطيب يبقى لراعيه***وانا على دربي وعارف طريقي

الرد والمجاراة

ماهو ضروري كل طيب تخاويه***ولا هو ضروري كل قولن حقيقي
احدن يعز الناس والناس تغليه***النادر اللي بالمراجل وثيقي
واحدن على ماقيل ماأحدن يدانيه***مكروه من ربعه واقرب رفيقي
واحدن يسلي خاطرك كل ماتجيه***واحدن يضيق خاطرن مايضيقي
الله يعز اللي عزيزه مباديه***اللي على طيب المراجل سبيقي

الرسالة السابعة

الشيب ماهو عيب يامعذرب الشيب ***الشيب في رأس الولد له سبايب
اما كريم شاب يبحث عن الطيب***والا شجاع عذبنته المصايب

الردوالمجاراة

احدن يصيب الطيب واحدن فلا يصيب***حتى ولو انه كبيرن وشايب
واحدن على ما قيل عرفه مكاسيب***كلن يوده من بعيد وقرايب

رسايل ومراديد جميلة
صح السانك لاهنت

الرساله الرابعه جميله
مجاراتها خرجت عن البحر والمعنى وابياتها مكسوره كان بودّي ان تكون هكذا
الوفا والطيب طبع/ن مايباع
والردي ماهوب للطيب لدي
يلعب النسناس خفّه بالشراع
والرواسي ثابته مثل الجدي

كذلك الرساله السابعه جميله دون الجاراه

صحت السنتكم
والله يـعـطـيـكم الـعـافيـــــــــــة
بيض الله وجيهكم

	المشاركة الأصلية كتبت بواسطة الكحيلة

	رسايل ومراديد جميلة صح السانك لاهنت

الكحيلة

صح بدنك
وكل التقدير والاحترام لمرورك المميز

	المشاركة الأصلية كتبت بواسطة حمد الشراري

	الرساله الرابعه جميله مجاراتها خرجت عن البحر والمعنى وابياتها مكسوره كان بودّي ان تكون هكذا الوفا والطيب طبع/ن مايباع والردي ماهوب للطيب لدي يلعب النسناس خفّه بالشراع والرواسي ثابته مثل الجدي كذلك الرساله السابعه جميله دون الجاراه

الاخ /حمد الشراري

مقدر مرورك وشاكر لك اطلاعك على الرسائل والردود
ولكن ماذكرت لي اذا شىء اعجبك من الردود السبع او لا مافيه شىء اعجبك
والرسائل تأتى سريعه ويرد عليها بسرعه وقد تكون هناك بعض الاخطاء ولكن نحن هنا بصدد ماأعجبكم وليس يصدد الاخطاء...ومافيه شك لو عرضت الرسالة على عدة شعار لن يردوا بنفس الطريقه والنهج والمعنى والفكره ...

	المشاركة الأصلية كتبت بواسطة الحب الباقي

	صحت السنتكم والله يـعـطـيـكم الـعـافيـــــــــــة بيض الله وجيهكم

الحب الباقي

صح بدنك ووجهك ابيض
وكل التقدير للمرور ونبيل الشعور

صح لسانك واعتلا شأنك

اعبتني المجاراة ( الخامسه )

سلام مني عد ماغرد الطير***يامرحبا في صاحبي مع جوابه
عقب السموم وعقب لفح المعاصير***الكل يفرح بالمطر ياهلابه
والناس تفرح بالمطر وين مايصير***شين على ماقيل مابه غرابه
وحنا فرحنا كان جونا مسايير***شرواك ياللي فيك طيب وحبابه

وهي جميله جداً
ولو كان صدر البيت الاول جاء ( ترحيب مني عد ما غرد الطير )
وفي عجز البيت الاخير لوجاءت آخركلمه (رحابه ) بدل ( حبابه
في نظري المتواضع تكون افضل .
وهذا لا يعيب المجارات كلها فأنت شاعر بدون مجامله

اسجل اعجابي وتقديري

اخوك نبع القوافي

صحــت السنتكــم
دمتم برعاية الله وحفظة

صح الله لسانك
ولاهنت