ديوان الشاعر عجاب صالح الحنتمي المزيني

حان الرحيل وفارق الصف ابو زيد
له نوخة سود اليالي جملها

الله يبيحه غاب شاعر وصنديد
حماد زيزوم الصعاب وجملها

اللي خذة حماد ترقب لنا الحيد
العبد نفسه مادرى وين اجلها

الرابح اللي لادنت بالمواعيد
سالم من اذنوب العباد وجهلها

مسلم مسالم عن هل الذكر مايحيد
واليا سمع هرجة قفى مانقلها

ترى حقوق الناس ذنب ومناقيد
من لاقضاها حي يدفع دبلها

في يوم منه تشيب روس المواليد
ومافيه نفس الا تلاقى عملها

عجاب صالح الحنتمي

مايحسد الطيب على طيب راسه
غير الرخوم اهل الردى والهواني

عاشو على هدم البخت والخساسه
مابغى لهم سيه ومابغى حساني

مغنيني الله واليالي دراسه
وياكثر من فيها سواتي يعاني

من ذاق من علقم لياليه كاسه
غير المدلل في زمن عقرباني

لكن ماعودتها لطفاسه
مع البعيد ومع قريب وعواني

ماكل يوم العافيه والوناسه
لابد مالعشره تعود ثماني

ملبوس لرجال ماهو مقاسه
منقود لو يصهل صهيل الحصاني

عجاب صالح الحنتمي

الهيل والبن اليماني لنا كيف
نشريه لو سعره مع الوقت زادي

والله مانحسب كثير التكاليف
مدام نجره لنشاما ينادي

وتجمعو حول الدلال المهاديف
بيض الرباب وسود مثل الهوادي

من كثر مايركن على الجمر لضيف
لاطاب نوم مكثرين الدوادي

واليوم ياوقت العنا والتحاسيف
وين البيوت اوين طرقي ينادي

قل التواصل والزمن صاير امخيف
وقلت سلوم اسلافنا والمبادي

فيك اختلف يالوقت حتى العواصيف
وحيان اقول المشكله بالعبادي

عجاب صالح الحنتمي

ياطيب موسى وطيب خليف
وسالم من الطيب شبعاني

على حقوق الخوي والضيف
والربع الاقصين والداني

ياطيبهم مايجيهم حيف
وفعالهم خير برهاني

على المواجيب شذرة سيف
يوصي الاول الثاني

عن المجامل وهرج الزيف
اعدكم مثل الاخواني

ياعل دايم ديركم ريف
وتعلها غر الامزاني

الكيف يشريه راعي كيف
والا السواليف مجاني

عجاب صالح الحنتمي

ياليل ياطولك على مثل عجاب
لاصار مابك لنشاما تعاليل

ونجرٍ يسمونه هل الكيف جذاب
كنه ينادي مرحبا بالمشاكيل

لو الوناسه دونها موصد الباب
من ماجرالي بالزمن من بهاذيل

شايب وفاقد له قريبين وصحاب
ماغير ذكر الطيبن الحلاحيل

دمعي عليهم فوق الاوجان سكاب
مسحة لاما مابقي معي منديل

ينشدني اللي مادرى ويش الاسباب
وليه يواسي من درى بالتفاصيل

لابد ماندفن ونصبح من اتراب
ونبعث بيومن فيه ينفح اسرافيل

عجاب صالح الحنتمي

من بعد فقد الوالدين الحشيمن
لو صار بالدنيا معارف وخلان

لابد عنك يصد حتى القريبين
في منزلتهم مايجي كاينٍ كان

ودي اليا قفى من اليل ثلثين
اشوفهم بالحلم شوفي بالاعيان

عسى لعل تخف نارٍ من اسنين
بقصى حشايه كنها نار بركان

اليا نجرح قلب الرجل تدمع العين
والصبر مفتاح الفرج سر وعلان

وانا صبرت وشلت حمل البعارين
شلته وانا صابر على روس الامتان

ماشكي على حي ٍ مع الوقت فانين
فوضت بامري رازق الذيب سرحان
عجاب صالح الحنتمي

ياحضرة الدكتور ماعندك علاج
للكبر والسكر وقل الوناسه

وعطيك ماملك ددسني واربع انعاج
وكفيل بالباقي من اخيار ناسه

اهم شي ارقد بلا هم وزعاج
وراس شيبه مايقلل حماسه

وحط لي برجين من ضمن الابراح
وقصر المقاول ماتهاون بساسه

مفتوح لمسير وعاني ومحتاج
ومقفول عن راع الردى والخساسه

وان كان ماعندك ترا مابه حراج
ضاري على الحض الردي والتعاسه

اهب ياحضي من الصغر منعاج
وانا رجل مالين الوقت راسه

عجاب صالح الحنتمي

البارحه عيني حداها عن النوم
خبر وفاة اللي عسى الله يبيحه

وصبحت مثل اللي على الوجه ملطوم
والصدر من ماصار يسمع فحيحه

مرحوم ياريف المعاسير مرحوم
ابو سعد صحته ومثلي يصيحه

تفقدك ياغانم بعد موتك قروم
ويفقدك راع الوافيه والصحيحه

ويفقدك مجلس يدهله كل شغموم
لضيف فيه ايطيح راس الذبيحه

يابعد فرق الامس عن صبحي اليوم
ضاقت بعيني كل نجد الفسيحه

ورجع وقول اللي حصل شي مقسوم
الدايم الله والعلوم المليحه

والعبد في دنياه ماهو بمعصوم
والطيب اللي يستمع لنصيحه

عجاب صالح الحنتمي

ياشين طبع اهل الحسد والنمايم
طبيعةٍ ياشينها من طبيعه

على الرفيق يدورون الثلايم
وتفرح ليا شافت عليه الهزيعه

التافهه منها تسوي عاضايم
مخالفين سلومنا والشريعه

رجلٍ على نقل النمايم يهايم
لناقصه يرقب على راس ريعه

ورجال عنها كنه الصقر حايم
ماكل مايسمع كلام ٍ يذيعه

عن مايكدر خطر الناس صايم
عقل ورجوله مايحب الخديعه

ياللي تحبون الخطا والشتايم
ياعلكم للهاويه والقطيعه

عجاب صالح الحنتمي

يالله يارزاق صقر اليماني
صخرله الغرمول من بدت الناس

من بعد ماهو كل ليله يعاني
يرقد بهم ويصبح الصبح في ياس

جاه الفرج بعد الفقر والهواني
سبحان من يجلا عن اعباده الياس

يارب قبل يهل شهر رمضاني
رزقن حلال بدون تحديد وقياس

وابيع ددسن يالله المستعاني
مافيه ورشه مالها رحت عساس

قضت على الراتب ومامن ضماني
من وضعها في تالي الوقت محتاس

كبرت والعشرين صارت ثماني
الوقت عاندني وانا رجل حساس

عجاب صالح الحنتمي