ديوان الشاعر/ سعد المحمدي

مع الدايري ياليتني عنك ياهداج
تعديت قبل اصدر العصر ضمياني

طويت الرشا وقفيت وابعدت بالمنهاج
قطعت الفيافي بين ريض وعجلاني

على نور اشوفه في دجا اليل تقل اسراج
من البعد ليه يختفي كل ماباني

على حجاجي الايمن قسمته قبل ينباج
دجا ليل في وصفه تقل ريش غرباني

وصلته وحصلته محيا طلق احجاج
قبل ياخذ علومي من الكيف قهواني

نشدني وعلمته وانا في نوع احراج
وقبل مانتهي قاطع كلامي وناداني

راع الاوله مايلحقه راعي الميراج
تصدر وفاز بكل جوله وميداني

جميلك بناء في داخلي بالزمان ابراج
جرى مع مجاري دم قلبي وشرياني

وانا ماني اللي كل ماقيل تكفى ماج
ثقيل الحمول اعرضه روس الامتاني

يجيني على بعد النظر والديار اخلاج
مثل من على رد المعاريف شفقاني

ذخرت لشدات عدة رجاجيل
وكتبت عند ارقامهم لشدايد

والا انت يامرسل علي المراسيل
الراس حطه فوق زين الوسايد

رقمك مسجل لسمر والتعاليل
غيره سلمت ودمت ماله فوايد

يالله ياممن على الوحي جبريل
يارزاق اللي فوق خضر الجرايد

اجعل لنا من نور هديك قناديل
لالتف ساق بساق والحمل زايد

سلام يامقبل من الراس لراس
مالي وراه الله يسلمك حاجه

غير المواصل في زمن غير الناس
ورد الجميل اللي على الراس تاجه

من لا وقف مثلك والارياق يباس
في يوم تاصل فيه عنق الزجاجه

وقت الرخا لو يحتزم بام ترباس
ماحتاج هداته ومحتاج باجه

بعد ٍ عنه عندي معزه ونوماس
وفيه العوض شغموم يضحك حجاجه

ترى المواقف لرجاجيل مقياس
وماكل جرح ٍ بالمشافي علاجه

يامل قلب ٍ بداخله مثل الامواس
عوب الهموم اللي تخطن سياجه

لانقص مال ولا مخافه ولا باس
الكرب بعده بالزمان انفراجه

بلاه ياريف المشاكيل حساس
ياكثر مايعكر بيومه مزاجه

يابو مشاري كل ماجيت ابا قول
حول الحروف اللي تعذر نقطها
كلام ياسلطان هادف ومعقول
اختار صدق علومها عن غلطها
اخاف يصدفني مع الدرب مهبول
يجهل مخططها ويجهل خططها
يمسي ورا جده ويصبح اسطنبول
سوالفه سبحة عراقي فرطها
اسمع مع الزفه مزابير وطبول
واللي يعرف رباطها ماربطها
لقيت بالحزبين عميان وخبول
ياكثر ماسمع بالعوافي لغطها
يبون دون رسوم جمرك لبهلول
قصرن ٍ كبر شم الجبال ونمطها
لاقلت قبله ياهل الشان ماهول
نشبت بحلقه لقمتن مازرطها
ازريت ياسلطان بالعمي والحول
كلن حصاته فوق راسي قرطها
مسموح يامقبل على شان مقبول
وخبولنا بخبالها ماغبطها
سعد المحمدي
@@@@@@@@@@@@@

يامرحبا مامطرعلى القاع شهلول
وانبت من الدار المحيله سبطها
وتشابك النوار حولن بعد حول
ويوم ازهرت ربي تبارك بسطها
برسالة اللي ماعنه قيل مجهول
شجاع يعرف كان كبرت شططها
ياسعد مرسولك ماهو باي مرسول
ورسالتك عيبن على من سفطها
قريتها وحضرت فكري على طول
وبعدتها عن مبغضن يلتقطها
ومافيه شين ماله حدود وحلول
واهل السقط نكباتها من سقطها
والحجه اللي مالها ثار ودلول
شجره على درب المسافر خبطها
وانته تقول ولك مواقيف وفعول
لاعودت ملح العلوم وسمطها
علمن نقوله ثبت ووصوله اوصول
تاقف على اولها ماهو في وسطها
الناس تدري وش ورا العلم والضول
لو كان تخفي سرها في شنطها
سلطان عبدالله الوسيدي

العام يامحرض علي الشواعير
هذا توصيله وهذا تجيله

تعال مابيني وبينك مشاوير
ارفع نظرك اتشوفني بالطويله

خطه ومنية بالفشل والتقارير
تسربت بين المدير وكيله

لو الرفيق اللي كبر قمة النير
غالي وله تقدير عند القبيله

لاركي على غاربك عوج البواكير
ياهن لو دمي ودمك فصيله

كلام للعاقل نصيحه وتحذير
قبل الزناد ينوش خشم الفتيله

ماقدمكم نزهه ورقص ومزامير
وخشف البنات مشطات الجديله

قدامكم فارس ليا دقو الزير
يقبل على غوج ٍ يروع صهيله

(سعد عواد السحيمي)

ياشعر لاتبخل عليه بالابيات
ابيات ترفعنا لنجم الثريا

ابيات منظومه قويه وجزلات
جزلات في مدح الرجال العليا

وِلْد المحمد مدحهم خص بالذت
بالذت لجل الطيب فيهم تهيا

قبيلةٍ من حرب شيمه وشامات
شامات في وجه الكرم والحميا

انشهد ان الطيب فيهم علامات
علامات في طلق الحجاج المحيا

وزين القبال ومع تحايا جميلات
جميلات. مافيها. نواقص رديا

ومجالسٍ شرحه مداهل. كرامات
كرامات كومات ٍكما الحشو زيا

والعود الازرق مع شواهي ودلات
دلات رسلانٍ تجيب العفيا

فنجالها يجلى العمس كل الاوقات
ووقات هي علاج للي عميا

وسوالفٍ فيها فوايد وميزات
ميزات ماخلت من الطيب شيا

لو هي طويله كنها مرّ. عجلات
عجلات مزنٍ تروي الارض ميا

ماملهم لو يمضي الوقت ساعات
ساعات والا ايام صارت سويا

امن الكرم فيهم قنو حمر سمحات
سمحات طبع وتروي الضيف ريا

وماابغى اطوّل والخواطر طويلات
طويلات والمخزون دايم مليا

وبختصر واقول هيهات هيهات
هيهات تلقى بالمحاميد. سيا

مدحتهم واشعر بفرحه ولذات
لذات لجلي من قبيله تحيا

اهل الكرم والجود مع زود فزعات
فزعات مشهوره ولا به غبيا

واختامها مني كثير التحيات
تحيات من ربعي. ودعوه هنيا

تكفون. زورنا ولا فيه فكات
فكات مانبغى ولا شخص عيا

ويارب تجعنا على الحق فترات
فترات ممدوده بليا نهيا


@@@@@@@@@@@@@@@@@@
سعد المحمدي

البارحه يوم انقطع ضول واصوات
اصوات مابين الفجر والمسيا

جتني رساله دون ذكري وباقات
باقات ورد وحي راعيه حيا

ليه عليها باب واسع وشوفات
شوفات شاعر بعد شوح وجريا

يامرحبا مامطر من الوبل زافات
زافات ماقدمه وقبله غميا

ترحيب مابه ياصوك الراس ثغرات
ثغرات للي بين هاذي وذيا

ياسعد جيتكم من العود نفحات
ونفحات وردن عرق غصنه نديا

الوصل له يامعرب الجد حسنات
حسنات يدركها سواتك ذكيا

ابشر نجيكم دون تحديد الاوقات
اوقات بعض ربوعنا ماتهيا

غالين يالسحمان حيين واموات
اموات يذكرهم من الحي حيا

رجال دنيا ودين هيبه وصملات
صملات من تسرج بنات العبيا

اليا اقبلن بمسطر القوم عجلات
عجلات خلف اقطيهن تقل فيا

مايذبحون الا مجوخ ونقوات
نقوات كر وفر ماهو بشيا

ماقول له عندي براهين وثبات
اثبات والموضوع وقع بليا

لاخطبت الشريفه وانت مانته شريف
قالت البنت مايوافق نسبك انسبي

دونها حطو الجندي بجنب العريف
رحت تركض من الفسقه وجيت اتحبي

قلت لك قبل ماترجع تخثع معيف
كلمة الفاهم اللي مافهمها غبي

عن ثياب العرب يكفيك ثوبك نظيف
صح قولي وماقلته بسد اشنبي

الشاعر تركي المحرول الوهبي

سامع صوت النشاز اللي صدر من قبله
اتمني لو تشيم واستحى وارتاحي

ماتفوه باالسوالف والعلوم الخبله
قبل لاينهي الحديث ويطفي المصباحي

العرب من مايقول اكبودها مندبله
عارفين ٍ سيرة الكبتن من الملاحي

لو تعزوي باالضعيف اللي قصير حبله
واحدٍ مايفرق الحنضل من التفاحي

كثرو اللي هاالزمان يقرقعون الطبله
ماتميز بين مجنون العرب والصاحي

خلو حصان الطراد اللي بوسط اسطبله
واستشاطوا مع وحيد القرن والتمساحي

!!!!!!!!!!!!!!!!!!!!!!!!!!!!!!!
سعد المحمدي
شاقني قاف المحرول يوم ضاقت سبله
من كلام بين رعيان الغنم ومتاحي

غير عج الضين مع وادى طوى والعبله
خلفها عشرين كلب وقدمها صياحي

شاقهم برق ٍ مابل غصون شيحه وبله
والموارد قدمهم وقت المقيض اشحاحي

يالمحرول شايب الحزبين مثله شبله
مايفيد المحزم المليان دون سلاحي

كان ماني فارس عند اللقاء يحسبله
استرحت ومالبست اوشاح غير وشاحي

العرب تال الزمن يابن وهب منهبله
جنبو هاك العدود وردو الضحضاحي

ترى الغرور ومدح مثلك لشرواك
نتايجه عند الحقايق وخيمه

تفكر انك ماش مثلك وحلياك
عن البشر مرقب على متن غيمه

ونسيت يوم العام خصمك توطاك
ذبيت ياشردان عنه الخريمه

بالصدق حدك يالرغاوي ورغاك
بعد التغطرس طحت هيبه وقيمه

وفزعت لك يوم ارتخاء سير علباك
وحسمتها بالفوز بعد الهزيمه

واليوم شيطانك رقص لك وغواك
ووجهة لي شرهه بثوب الشتيمه

تبغى تمشي فيض غيضك وعوجاك
وانا عرفت الذاهبه بالوسيمه

من دون داعي جيت تلهث من اقصاك
اتفكر اني صيد سهل وغنيمه

وانا سلاحي سم هاري وفتاك
ارتاح ابن دومان مانته خصيمه

بينك وبينه فرق عود على انثاك
وحمارك اللي فيه سجل قسيمه

تبغى صحيح القول حقك وماجاك
مسجله باسمه بحقك جريمه

ان كان عندك بعد نظره مع ادراك
لاتقوم تشعب بالمشاعيب ريمه

اللعن ابليس ولا تظلي بعمياك
عن الخطا بالنفس حط الشكيمه

تبغى الكلام اللي يخصك وينصاك
كلام لابان الغريم لغريمه

لاخايفن رمحك والا خفت شلفاك
ماخاف غير الله ورجي نعيمه

نشمي المحمدي
ابنشد العراف واللي لهم شان
واخص ابن دومان عنتر زمانه

شاعر ويفهم بالمعاني والالحان
ماهو غشيم يردد الاسطوانه

وانا تراني تالي الوقت بلشان
باللي على ربعه مطول لسانه

وقت السعة وسط المجالس كحيلان
وان جاء نهار الفعل غير مكانه

ماقدمه الا مخزيت كل شيطان
اعطيه لين انه يكب اللعانه

وهذي علومي كلها يابن دومان
احتاج رايك يارفيع المكانه

؟؟؟؟؟؟؟؟؟؟؟؟؟؟؟؟؟؟؟؟؟
سعد المحمدي

الراي يانشمي فتيله وصوان
اعطيك مضمونه وشانك وشانه

اضرب على الكايد ليا صرت بحلان
بيت الرشيد اللي سمعنا بيانه

راس ٍ تقصه من على حد الامتان
ماعاد يسرج للمغازي حصانه

ويستادب اللي حط الاقراب عدوان
عداوته من حسد مدري عفانه

ابعد عن اللي كيدهم كيد نسوان
ومن يعترض تكفي به الخيزرانه