قصيدة (روعة في جماله) الشاعر/مبارك بن سالم المصلح الحربي ابن دهيم

(روعة في جماله)
كتبت عن ماشفت ابياتٍ جزاله
في اللي فتني وشوق القلب تشويق

شوقٍ يخدر بالنظر من خلاله
خلاني عاجز لاقدر أصحى ولا افيق

ابوصفه وصفٍ يليق ابكماله
والوصف مايوفيه لو فيه تحقيق

خدٍ وعين وعنق واحجاجٍ اهلاله
مليان مربوع لا متينٍ ولا دقيق

العنق عنق اللي جفل من ظلاله
ريمٍ يقود الصيد وقت المشاريق

سبحان من بث الحسن في جماله
الواحد المعبود رب المفاليق

مكسي حلا مع روعةٍ في دلاله
ماله شبيه إلا المها دون تفريق

من شاف خصره قال زايد هزاله
كدلة الرسلان في وسطها ضيق

ومن شاف ساقه قال وعزتاله
أشلون يشيل اردوف أثقال ٍ مفاريق

والصدر بارز للعيان ابحماله
قطع ازراره وشقق الجيب تشقيق

نيشن على قلبي بعينه وشاله
زاله من أقصى الجوف بين المعاليق

أدفع ما أملك ساعةٍ في وصاله
ولو علقوا بحلقي احبال المشانيق

قبل أشوفه كنت سالي وداله
شفته وعيني اليوم للنوم ماتطيق

من لامني باللي جرى ماجرى له
قولي صحيح ما يجي فيه تلفيق

طرد الهوى اطري أنا في اعتزاله
واليوم وهقني به الترف توهيق

ازريت ما لي طاقة ٍفي احتماله
كن بيني وبينه اعهود ومواثيق

حظه عظيم اللي غدا الزين فاله
واللي ما ناله مايشوف التوافيق

ليته ترك لي فرصةٍ في سؤاله
خايف جوابه يزود الجرح تعميق

ان كان ما لي حيلةٍ في مناله
اي والله اللي حرق القلب تحريق

ليته يسوي بي إحسان وجماله
يسقيني من ريقه على فكة الريق

يشفي سقيم الحال عقب اعتلاله
وتعكير مزاجه يجيه صفوٍ وترويق

عيني تقول للقلب أنا فدا له
ليتك تفك الصدر ياقلب وتويق

وقلبي يقول للعين يا همالاله
عاشق أحب الزين في طبعي ارقيق

دك الهاجوس والقاف حضرفي نزاله
وحلقت بفكري في فضاء الجو تحليق

صلوا على من جاٰنا بالرساله
شفيعنا بيوم الحشر يامخاليق

إعداد من هلل وصلى وجآ له
بالحج زاير وعد نبت الزماليق


الشاعر/مبارك بن سالم المصلح الحربي (ابن دهيم)

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

صح بدنك مليون يردف مليون ووجهك ابيض والله يعافيك وتسلم طال عمرك تقبل تحياتي وتقديري

صح لسانك مليون على القصيده
بيض الله وجهك

لاهنت وصح السانك

تقبل التقدير والاحترام

وفقك الله

صح الله لسانك
ولاهنت
وسلم فكرك وبنانك
دمت برعاية الله وحفظة

السلام عليكم ورحمة الله وبركاته شكرا جزيل لكم جميعا من الاعماق على الردود والاطراءالجميل الذي ان دل فانما يدل على دماثة الخلق والذوق الرفيع تقبلوا فائق تحياتي وتقديري