ديوان الشاعر / خالد عبيد بن معتوق الاحمدي ( صقر المراقيب )

( ياجيشنا الباسل )

اسقيته العدوان سمّك فالقتال =ياجيشنا الباسل على حدّ الجنوب
ورّيتهم قوّ العزيمه فالرّجال=ورّيتهم كيف الشّجاعه فالحروب
دافعة عن دوله لها قدر وجلال=هي مركز الاسلام فالازم تنوب
دولتك دولة عز تسقيك الزلال=تستاهل انك لجلها تاطا الكروب
ومنها المدد ياصلك لاحمي النّزال=ايجيك من يفزع على خصمك غضوب
انته تدافع عن عقيده والمنال=توحيد ربّ البيت هو نور القلوب
اضرب على العايل وصيبه بالعضال=حتّى الذي وصّاه في فعله يتوب
وطيّار يامغوار من فوق الجبال=ارمي حمم فوق العدو توقد شبوب
رمي الأبابيل المسوّم يوم طال=روس العدا جاها الخطر ينزل صبوب
واليا نهيت امهمّتك رح لشّمال=واهديلنا نصرك على النّذل الكذوب
ياجيشنا ياعزّنا فيك الامال= ماخيّبة والنّصر هبّة له هبوب
الشّعب يتضرّع لربّه ببتهال=يطلب لكم نصرٍ بلا غبن امحسوب
انتم رجال العزّم متهاب الآجال=ياجندنا منكم نرى العزم الدّؤوب
تحت لواء العدل رمز الاعتدال=ذروة سنام الدّين قمتوبه وجوب
من مات منكم نال عزه والمئال=إلى حنان الخلد والدّار الرّحوب
واللي يصاب امعوّض بحالٍ ومال=يبشر بلطف الله وتكفير الذّنوب
هنّيت فيكم رمز محمود الخصال=وهنّيتكم باللي عن الشّين امحجوب
مليكنا ياعزّنا للوقت مال=ياناصر المستضعفين امن الشّعوب

الشّاعر/ خالد بن عبيد بن معتوق ألأحمدي

(بمناسبة اجتماع الصخارنه من الاحامده في ثالث ايام عيد الفطر1436ه)

كلّ عام اتعاد عاده يوم عيد=وجمّل الله حال مين ايعيدها
اجتماع النّاس فالعيد السّعيد=يبهج الارواح ليلة عيدها
ليلةٍ مدّ الوفا فيها مديد=والصّفى والانس في تجسيدها
كنّها بنتٍ حلاها في مزيد=عقدها من الماس زيّن جيدها
عند شيخ امتاز بالنّهج الفريد=كاتب اكتابه ويدّه بيدها
لادعا جينا نلبّي مايريد=واجب الاجواد توفي سيدها
وياحضور اليوم عدتوا من جديد=ذكريات العام في تجديدها
مرحبا ترحيب يسمع من بعيد=ياصل اهضاب الدّير مع بيدها
وياهلا كلمه تذوب للجليد=وتسعد الحضّار في ترديدها
بسم ابو فيصل على العلم الحميد=قلتها وآعيدها وآزيدها
شيخنا للضّيف ناره تستقيد=في مليلتها على ترميدها
ورّثه مطلق من السّاس الجويد=ورث يعطي سيرته تمجيدها
الكرمّ واللين والعلم المفيد=حتّى لقا من عزوته تأييدها
ومن ولد عثمان للعايل عنيد=نعم ذيك النّفس في تعنيدها
ياالله انك تنزله منزل شهيد=وجنّة الفردوس له تخليدها
ورّث محمّد من المجد التّليد=حكمة العقّال نال امفيدها
مايجيك براي ماهو بالسّديد=عرفه اسلاحه عداه ايكيدها
ومن رباح الفود منّه نستفيد=مشيخة جدّه جدير ايجيدها
فيصل المحبوب ولمطلق حفيد=زاد دار المعرفه تشييدها
همّ مشايخنا وعنهم مانحيد=ونطلب الوالي لها تسديدها
والولا لحكامنا فيهم شديد=والعلاقه زايدٍ توطيدها
تحرص بلمّ الشّمل ضدّ المريد=شعبنا واحد فذا تشديدها
شعب سلمان الحزم عيشه رغيد=ومايهاب اعداه في تهديدها
ياالله انك تنصره نصرٍ اكيد=واليمن ترجع على منريدها
والوطن يبقى على العالم يسيد=وحرّر ارض القدس من تهويدها
وصلّ ياربي على الهادي وزيد=وكثّروا ياصحابنا ترديدها

الشّاعر/ خالد بن عبيد بن معتوق ألأحمدي

( الوطن )

خالد بن عبيد بن معتوق ألأحمدي=
النّصحه من رفضّها ذاك ماالله امهديه=واستمـع هـرجٍ يفيدك وافتهم لي ياحسن
طيع نصحي يالحجيري ياعزيزٍ منتقيه=انهج النّهج السّليم وخلّ في ايديك الرّسن
الوطن لنّك حميته تستحقّ العيش فيه=وكان منت بحاميٍ له شدّ دوّر لك وطـنّ
لاتسمّع في هروج اللي يحرّضّ وازدريه=ماهو راعي طيب كانه قام يدّور للفتن
لو صدق بالهرج معكم لايغرّك ما حكيه=كم كلمة صدق فاحة طيب باطنها عفن
الوطن هذا وطنّا لازم انا نحتميه=مانشتّت شمل شعبه مانجرّه للمحن
اكثر النّيات فيها خافيٍ محدنٍ بغيه=علمها يعلمه واحد بامره سرور وحزن
القبايل كلّها متحالفه بيض الوجيه=لو رقص شيطانهـا مخزي ويبشرّ باللعن
وانت يالقرم المحنّك لاتراعي للسّفيه=عادة الرّجل الموقرّ عنده لهرجه ثمن
وكان شفت الميل ناره في ضميرك تكتويه=شوم واصبر صبرنا مـن دون لتّ ولاعجنّ
الوطن والرّبع والجيران ياالرّجل النّزيه=انت لاتقسى عليها لو على شخصك قسن
حسن بن علي البشري=
يا حروفي سجّي احصان القريحه واِمتطيه=وجاوبي خالد عبيد بكل طاروق و لحن
وعلميّه بكل صيغه يوجّـه الحرف أحتويه=لو يلغمّها ما نغديها عن الوجه الحسن
النصيحه مثل صقر اللي جهل به يشتويه=ما رفضها الا سقيم العقل لو صحّ البدن
خصّ لا جات النصيحه من نبيه إلى نبيه=ما تركناها ونجهر بامرها سرّ و علن
الوطن ماهو بضاعه نبيع فيه و نشتريه=ولا هو مجرد ملاذ و سقف وأرضيّة سـكـن
الوطن مثل الأبو مهما قسى نقبلّ يديه=الوطن صدر أم من ذا يعقّ صدرٍ له حضن
الوطن ماهو نبي حلوه ومرّه ما نبيه=الوطن منّا و حنّا منه في حيل و وَهَن
مثل ما يرجي صـناديده ترانا نرتجيه=ما نخيبّ له رِجى ، ولا عاش منهو له غبـن
دون ذرّه من ترابه واشقا بسوء منتويه=منتوي شبرٍ من أرضه عدّه ف شبرْ اِندفن
لو شكينا منه ضيم ، بضيم ما نرضى عليه=ما سمعنا فيه زيف ولا نصدقّ فيه ظن
الوطن لو قلت بعيالي و مالي أفتديه=ما وفيته لو أقدمّ لجله الروح بكفن
الله يديمه و يدحر كيد منهو يعتديه=وانتم و حنّا سيوف ، ف يد حكّامه سطن

( آل النّحيت )

ضاقت سبل حضّ البناخي وقلنّا=يبقى الامل بالله ماهي صعيبه
ثمٍ يجي دور المشايخ واملنّا=بشيوخ حرب اهل الصّدور الرّحيبه
آل النّحيت امنشّطين المطنّا=واللي نخاهم كفّ عنّه طليبه
اسره تمثّل حرب فينا وعنّا=تاقف بوجه الكايده والغليبه
وآخص منهم شيخ طيبه تبنّا=كلّ العلوم الغانمه والمثيبه
عبدالله محمّد وصيته يرنّا=ولا قالوا العرّيف هذي غريبه
اللي كسب له صيت شاع بوطنّا=الله عطاه الجاه واعطاه هيبه
طرفه عن الطّالات مايرجهنّا=واليا بغاله علم حتماً يجيبه
عبدالله انته بالمعزّه تغنّا= ونجمك تزعّم بالنّجوم الرقيبه
وانته زبزن المرجله ماتثنّا=قدّام ميلادك وهي لك خطيبه
وعند القياده قدركم ماتدنّى=تحضى بمنزل غيركم ماهنيبه
يابن نحيت اليوم منك انتمنّى=فزعه تردّ البسط بعد المغيبه
منها البناخي يسعد بحسن ضنّا=واللي نخاك امحال بيشقّ جيبه
كلّية الضّباط فيها ايتهنّى=ويخدمك يادار السّعود الحبيبه
ومشكور يااللي باللوازم تعنّا=نسل الرّجال اهل السّلوم العريبه
نطلب لك اللي باسمه احنا استعنّا=يطول عمرك ماتجيك المصيبه
وف يوم فيه الشّمس منّ تدنّا=تسلم وذاك اليوم تكفى لهيبه

الشّاعر / خالد بن عبيد بن معتوق ألأحمدي

( الشيخ / عبدالله محمّد بن نحيت )

الشّيخ عبدالله محمّد بن نحيت=كسّاب قولة نعم رمز المرجله
اللي دفاعه دون ربعه مستميت=هو راعي الوقفات محدٍ يجهله
ياللي نخيت ابشر وصلت لطيب صيت=الشّيخ عبدالله يحلّ المعضله
لاقام لك حيّاك وتقلّه بقيت=وفمدّة الفنجال علمك تنقله
مايقدّم المعذار مايقلّك عييت=ايبشّرك بالخير واجب يكمله
وايريّحك من همّك اللي به شقيت=اللي مسبّب شيب راسك تزهله
قدّ صار لي ميقاف قبلك مانسيت=تثمين جهد اللي لزومه يعمله
يالشّيخ عبدالله على العليا رقيت=الله عطاك البخت بعلى منزله
كمّ من ضعيف تعين كمّ اللي تقيت=امن الخطر والضّيم باصعب مرحله
وفغيرها يابو محمّد ماعنيت=الطّيبه فالماضيه والمقبله
يابن نحيت العرف في راسك يبيت=ان غاب عن روس العرب ماتهمله
قريت فالتّاريخ فسطوره لقيت=شهادة التّاريخ فيه امسجّله
يادار ساسك عزّ بالعزّه بنيت=ماينهدم مبناك لو بالزّلزله
وآقول هذا العلم وآنا به رضيت=والجزل قدره عند رجلٍ يجزله
الشّيخ عبدالله محمّد بن نحيت=كسّاب قولة نعم رمز المرجله

الشّاعر / خالد بن عبيد بن معتوق ألأحمدي

( عاصفة حزمنا )

ماأمنت العقوبه واسأت الأدب=ترتجي مبتغى بالوهم زمت فيه
مادريت انها بين عين وهدب=دولةٍ عزّها شعبها يحتميه
جيشها جاك من كل صوب وحدب=مايعوّد إذا ماهزم من يبيه
عاصفة حزمنا خلّت ارضك جدب=وانهدم مجدك اللي بها تدّعيه
وبعد خوفك من الحرب فالقلب دب=عفت حلفٍ عملته بسود الوجيه
صرت نادم وترجف وترسل ندب=تطلب الصّلح ماهو ضميرك نزيه
وكل مخرج فعينك معوّد ردب=جاحد الطّيب يستاهل اللي يجيه

الشّاعر/ خالد بن عبيد بن معتوق ألأحمدي

هذه القصيده بمناسبة ترشّح
الاستاذ/ محمّد بن داخل ألأحمدي
في الانتخابات البلديّه

لبّيت دعوه جاتني قبل ساعات=من شخص يغليني وانا مثله اغليه
راعي وفا ومجرّبه فالصّعيبات=واجب عليّ ارضي جنابه ووافيه
وفلازمه ماني بجيب اعتذارات=اليوم جيته في لزومه وبرضيه
وانضمّ ياجاهي مع اهل الوجاهات=واللي يدوّر فزعتك لاتخلّيه
الزوم ربعي قدمه فالمهمات=وحضرت محافلهم سرورٍ لي ابديه
وفي محفلٍ يحضى بطيب العلاقات=جيته رضا منّي وانا مقتنع فيه
داعيه عزم الفوز فالانتخابات=يوم ان كلاً يجتهد في تحدّيه
ولمحمّد التّصويت يطغى بالاصوات=حتّى يفوز ويهتني في تمنّيه
وليه العجب فالامر ليش المخافات=مادام ابوه امسانده ويش يعييه
ابوه داخل شهم جزل العطيّات=اللي لدرب الطّيب منشيه مهديه
دعمه سخي طبعه حليف النّجاحات=الله رفع قدره ولحدٍ موطّيه
ويابو محمّد لاتجي فيك ريبات=ابنك حضوض الفوز قامت تباريه
فالك وفاله دايماً بالبطولات=واعطيه صوتي والله انّه يهنّيه

الشّاعر / خالد بن عبيد بن معتوق ألأحمدي

هذه القصيده بمناسبة فوز
الاستاذ / محمّد بن داخل ألأحمدي
في الانتخابات البلديّه

عند الرّجال الطّيبه قدري رفيع=وحبل الوفا بيناتنا ماهو قصير
لامن دعوني جيت فالوقت السريع=يصعب على رجلي توانا فالمسير
وقت اللزوم آقوم قومات الشّجيع=وآسرّهم في طيب معدوم النّظير
واليا دعا داخل يوافيه المطيع=يامر عليّ امره على اخوه الصّغير
واجب عليّ آطيع فالامر النّفيع=دعوة كبير الجاه للسّيف الشّطير
رجّال يجمعنا على طيب الصّنيع=في فرحته بالفوز لاّ لبن الكبير
اللي وقف وياه بالصّيت المشيع=وصخّر معاه الجاه والمال الوفير
حتّى ظفر في سطوة السّيف البتيع=ساعة وصل للمنصب اللي به جدير
وامن اجتهد فالوقت جهده مايضيع=وهذا بدون اقصور فالجمع الغفير
كلاً بذل فالواجب اللي يستطيع=اشيوخنا والجبر ماقفهم شهير
اللي جهدهم بان كالسّد المنيع=وهذا الامر ينبيك ياالرّجل البصير
الفوز لمحمّد يسجّل للجميع=حنّا يداً وحده على العلم المنير
وذي دبرة الله خالق الكون الوسيع=والفضل يرجع له فالاوّل والاخير

الشّاعر/ خالد بن عبيد بن معتوق ألأحمدي

( النّفس )

عند الله النّفس بيّن لك مراتبها=فكتابه آيات فسّرنا تلاوتها
امّاره بسوّ.لوّامه لصاحبها=والثّالثه مطمئنّه في نهايتها
خلّك مع الثّالثه واغنم مكاسبها=وان قلت لي كيف امشّيها بسكّتها
اقول ذا دور صاحبها بواجبها=يجعلّ لها الدّين دستور فربايتها
اجلسّ مع النّفس حاسبها وأنّبها=افرح لحسناتها وازعلّ لسيّتها
وحارب هواها ليا تبغى تهذّبها=ترى هوى النّفس هوّ اسباب علّتها
وانأى بها عن مواقيفٍ تعيّبها=والنّفس من عزّها نزّه ملذّتها
واصنع لها هيبه من الله تهيّبها=لايجرح النّاس كبرتها وزلّتها
وقلّ الموافا مع الاجواد ذاربها=وطيب الوفا ماهو منقّص مكانتها
وقرابتك لو تضرّك لاتحاربها=ادمح لزلّاتها تكسب مودّتها
لاتغرّك القوّه ان كبرت مضاربها=مردّها النّقص في قمّة كمالتها
دنياك فحوالها مكثر تقلّبها=لوانّها سرّتك ماادّوم فرحتها
الجاهل اللي ورى دنياه خايبها=والعاقل اللي كسب للنّفس عزّتها
يجلس معاها يحاسبها وينّبها=يفرح لحسناتها يزعل لسيّتها

الشّاعر / خالد بن عبيد بن معتوق ألأحمدي

( رحمة الله واسعه )

لاتهدّك ضيقتك لو تحدّتك الضّغوط=تنفرج لك كربتك كلّ مازادت حرج
رحمة الله واسعه ماتبي شخصٍ قنوط=والعسر فيه اليسر والصّبر بعده فرج
ولا تطاوع للهوى ماعلى وقتك شروط=الهوى مثل اللحد من دخل به ماخرج
ومن تغرّه بنيته صار آيل لسّقوط=نكسته يدرابها لوّ ماعنها هرج
ومن تواضع يرتفع مايجي فيه الهبوط=رافقه في دنيته صيت مع بخت انمرج
والحكي يظهر لكم بالرّجل ماذا ينوط=ومن تسفّل بالحكي منزله منه انكرج
والعلوم الغانمه في مكرّمها تحوط=من تعوّد فعلها عن طريقه ماانعرج
والفتنّ واهل الفتن تنتهيبك لشّطوط=لاعتلّى خيلها لوّ بالزّين انسرج
والزّمن هذا يده مثل يدّ الاخطبوط=من يضمّه في يده في ضحاياه اندرج
ولا تهدّك ضيقته لو تحدّتك الضغوط=تنفرج لك كربتك كل مازادت حرج
النّصيحه جبتها شعر بالجزل امخلوط=من تبع مضمونها حضّه بوقته برج

الشّاعر / خالد بن عبيد بن معتوق ألأحمدي