حب المملكه عشرة اضعاف

الى ذكرت اني بعد خمسة ايام= راجع بلادي صار بالجوف خفخاف
مهوب بغضٍ في "سياتل" بلد سام= لا شك حب المملكه عشرة اضعاف
مهما يكون الغرب به صدق و انظام= نظام يحكم عدل ما فيه اجحاف
و لو خذت حقك فيه في وقته و تام= مهوب ضايع بين جاحد و حلاّف
و من غير ما تطلب مفازيع و ارقام= و وسايطٍ حسب العوايد و الاعراف
و من غير ركزة شبك او شيل مرسام= ما تكسبه يمناك هو ملكك الواف
و برغم هذا حبي لمهد الاسلام= ما له شبيه و لا تعدُّد بالاصناف
حبي لها مثل البدر صافي و تام= حب الوليف اللي يشفشف لميلاف
حتيش لو تكتب خبيثات الاقلام= و لو كثّروا بالهرج عذّال و سفاف
عجفا هلي اخير من قتل و اجرام= و تهجير لديارٍ بلا فرش و لحاف
كان الربيع اليعربي رفع لاعلام= لي بيرقٍ ما يوم نكِّس بميقاف
ربيع تونس، ليبيا، مصر، و الشام= و الا اليمن من ناظره شاف ما عاف
صحيح حنا عندنا ناس تنلام= ناسٍ انانيّه و لا تعرف انصاف
ما همها الا نفسها و البلد هام= و الجعجعه واجد و لا شي ينشاف
القايد يوجّه وزارات و ازلام= هو له هدف سامي و غيره له اهداف
بطانةٍ فيها جشع مع ردا خام= و الشعب يشكي و المواشي بلا اعلاف
ليتك يبو متعب تنفِّذ بالاكمام= و تزيح ناسٍ وقتها بالعمل طاف
الما طراته لا جرى يروي الضام= و الى ركد في حفرته يصبح ازعاف
ابلادنا فيها رجالٍ لها اقيام= مع خبره و تدريب في كل مشراف
و اللي تشبّث فوق في روس الاهرام= طايف زمنهم و العطا منبعه جاف
جدِّد دما كل الوزارات باعلام= ناس اتحمل همّ البلد فوق الاكتاف
حنا ولانا ما هو ابقصّة افلام= حنا معك بالصف من وقت الاسلاف
لكن يبو متعب ترا العصر ما نام= و عواصف التغيير تصفق بالاطراف
لازم قبل ما تقلع اشجار و خيام= نعرف نوجهها بلا خوف و ارجاف
و ما دمت لامر الله مطبق و الا حكام= لا تلتفت لحماية اغراب و احلاف
ذولا لجل بلدانهم يحفوا الاقدام= و صيداتهم ماهي هزيلات و اعجاف
يبون خيرات البلد ما هو ريام= و الى نشف نبع البلد راحوا خفاف
و صلّوا على خير البشر عدّ ما صام= صايم و عدّ اللي نصا الكعبه و طاف

تسلم على القصيده
الجميله
لاهنت
يالصيفي

تسجيل تواجد في منبر الجزاله
صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

	المشاركة الأصلية كتبت بواسطة عيسى العوفي

	تسلم على القصيده الجميله لاهنت يالصيفي

مرحبا بك يا عيسى العوفي

سلمك ربي

و شكرا لك على حضورك

صح لسانك واعتلا شانك

صح الله لسانك
ولاهنت
وسلم فكرك وبنانك
دمت برعاية الله وحفظة

	المشاركة الأصلية كتبت بواسطة الحب الباقي

	تسجيل تواجد في منبر الجزاله صح لسانك مليون على القصيده والله يـعـطـيـك الـعـافيـــــــــــة بيض الله وجهك

صح بدنك يالحب الباقي

و الجزاله تزيد بحضورك

سلمك ربي

تسلم على القصيده
الجميله
لاهنت
ياربيع الشعر

قصيدة تحكي الواقع
والله يحفظ وطنا من كل حاسد وطماع
صح السانك لاهنت
شاعرنا القدير

قصيده رائعه وهادفه صح لسانك وبيض الله وجهك