ديوان الشاعر فايز نافع الأحمدي (أبــو رغـــد)

قصيدة بمناسبة دعوة الشيخ رباح بن بمطلق لأعضاء المجالس

بسم الإله مؤسس الكون تأسيس=ربي ولي الكون جنه وناسه
اللي جلب من قدرته عرش بلقيس=من رحمته مايقطع العبد ياسه
جينا بدعوة كاسبين النواميس=اهل الصخا والمرجله والفراسه=
ريف الضيوف مشرعين الدهاليس=هقوة شييوخ ماتجي بالدراسه
جينا لشيخ مسيس العرف تسييس=شيخٍ ورث من شيخ نهج السياسه
حييت يارجل(ن) تزاها ولبيس=يلبس ثياب الطيب عز وحماسه
راع الدلال وبنها في المحاميس=وبهارها مقيوس ظاهر قياسه
مجالس أهل الطيب مثل النسانيس=لاذعذعت في صبح تجلى عماسه
تجلى عن الخاطر جميع الهواجيس=وتلقى بها نفس المآنس وناسه
يالربع أنا شاعر ولي في المثل قيس=اقيس وانقى القول دره وماسه
الطيب مثل البيت يحتاج تأسيس=وكلاً على طيبه ويرجع لساسه
بيت الردي دونه حدود ومتاريس=وبيت الكرم والجود ماله حراسه
الطيب مع ربعي بليا مقاييس=وكلاً لبس من طيب ساسه لباسه
والطيب مايعرف مكان وتضاريس=وسلم الرجال الطيبه في الرياسه
واللي غرس طيبن في ُطَيب مغاريس=يقطف ثمر غرسه وطُيب غراسه
والخلق مثل الغزو كسب ومفاليس=وحاتم غلب عنتر على قو باسه
أهل المراجل فوق مثل القرانيس=والحر قوي الباس مليان راسه
يضحك على الطيب عديم الاحاسيس=وراعي المروه فالكرم له حساسه
ومن لا ولف من طيب الفعل ويريس=يعيش عمره في لهود وتعاسه
واللي بليا طيب خلف الكواليس=الناس تصعد فوق وهو في انتكاسه
ورجلٍ بليا طيب كله حواسيس=والكل شرب من طيب فعله بكاسه
ورجلٍ على الهفوات يمشي ورا إبليس=سوى سواة إبليس وابليس حاسه
وصلو على المبعوث مايمشن العيس= لا روحن في صبح وجنُك عساسه