ديوان الشاعر \ نافع الحربي

غنيٍّ عن وضيع القول قولي = مادام الصبر له عندي مكاني
درست بنجد رمز حروف نجدي = شموخ النفس و الهام المعاني
اليا من الحياء باكر وطنها = فروع الغري مثل الأرجواني
عبير الورد لاذعذع هواها = و مزنٍ الغيث فوق الأرض داني
يروف الحال ويخفف عناها = وتنعم بالسكينة والآماني
مضالي في زهور العمر غفلة = يوم ان الوقت وقتي والزماني
ذرعت الارض حتى الارض كلّت = على متن الجديد البهبهاني
اسوقه مع شروق الشمس حتى = يشيل الهضب موج الضحضحاني
على مد النظر باللال كنه = اسطولٍ بالمحيط ابلا مواني
حريٍّ بالوفاء ماشال خايب = مريض القلب ندّاس العواني
يلم المال مايدي زكاته = ويرضى بالمذلة والهواني
الا يا الله جنبني صفاته = وعن ذا الخُلق يا الله اتحماني
حبست النفس حتى العمر طرّف = ولا لي غير ماحصّلت ثاني
عرفت اوجيه بوجيهٍ وراها = عليها من مواريها بياني
وكيف أسف على وقتٍ ظلمني = مدام الظلم والمظلوم فاني

ياالله طلبتك غر مزنٍ مزابير = نوٍّ تلاعج بالمثاني بروقه
برقه يشق المزن كنه فنانير = دهمٍ مواخيره وغرٍ وسوقه
البرق يبرق والرعد له زماجير = والريح بنفاس النسايم تسوقه
مزنٍ يلاعب كل شما شناضير = ينثر ادقاق الودق منخل فتوقه
مابه برد والا عجاج ومعاصير = سحٍّ وتسكابٍ تواصل دفوقه
سحاب وسميٍّ تدافع مناحير = يضفي على نجد العذيّة حقوقه
سيله يجنّب عن قديم المعابير = يومي بعيدان الشجر من عروقه
ستين ليلة مرزماتٍ مهادير = ليلٍ غطى شمس النهار بغسوقه
حتى نبات الأرض غطى العثامير = وقامت تغطرف بالروابي اعذوقه
عشبٍ على البيداء فروعه مزاهير = يضيع بدريّ البهم في طروقه
الأرض خضراء والمحاجر مغادير = والريح ذعذاع القفاري نشوقه
مراتعٍ لبست احللها مقافير = تبري جروحٍ بالضمير امحروقة
وصارت لعشّاق الطبيعة تباشير = واللي بغى المقناص حضّر علوقه
ركبوا على مترفّعٍ كنه الزير = يضرب على الدرب الخطر مايعوقه
سرّوه يوم ملابطين الغنادير = كلن بنومه محكماتٍ اوثوقه
على الطريق المختصر خطرن ايطير = لا اعرض مساره كنه الحزم فوقه
قبل يطير من العشاش العصافير = والشمس في برج الشروق امخنوقة
ياطا على غض الوسوم المباكير = يفوح ريان الشذى من عنوقه
فوقه اهل الهقوات ماهم مثابير = كل ابلجٍ كيف النشامى يشوقه
في ديرةٍ فيها الزبيدي مغارير = تطرب رفيع الذوق ويطيب ذوقه
هاذي وصايف عشقتي يأهل الخير = وكلن حسب عشقه يشوف امعشوقه

هاض الضمير وفي عنا خاطري هاض = واسترجعت كل الجوارح زمنها
وهني من سج القدم عقب مقياض = برضٍ زماليق الربيع اتحضنها
يتبع سحابٍ بارقه بالسماء ناض = على زهر دارٍ نضيفٍ وطنها
سيله من العالي على حايره فاض = اغصونٍ يطرقها وغصونٍ دفنها
دارٍ مرى خضراء صحاصيح وفياض = اتعزف بها طيور الهواجر لحنها
ترعى طرف روضٍ من المي ماغاض = ماوايقت غيب القلوب ودرنها
القلب به من جاير الوقت عضّاض = والنفس عياّ عن هواها بدنها
الله على اللي لا مشى يومض اوماض = كنه بسيف العدل يامر وينها
رفوق ما هو للأزاهير نفاض = كنه بميثاق الأمان يهدنها
كامل مكمّل عن هوى النفس ما جاض = مروة فلاةٍ ينطق الغيم عنها
كنه بقفريّ الحَياء يعرض اعراض = وضحا وشيع القطن يزهى رسنها
اليا دق في حدب المغاليق كضاض = وضاقت بمفهوم الوسيعة اسننها
نصيت فوقه مزهرٍ كنه احياض = يلبس متون الارض ويلبس طمنها
يطلع وينزل من مراعيف لرياض = في ساعةٍ بالعمر غالي ثمنها
مناظرٍ تجلا عن القلب الامراض = الله كساها بالجمال وضمنها
اخذ بها عن ناقص الهرج مركاض = عن كلمةٍ هراّجها ماوزنها
تقرض معاليق الحشى تقل مقراض = تقتل قلوبٍ صافية من رعنها
نفسي عزيزة ما استكنّت بالأنقاض = لو كان وقتي عن هواها سجنها
تنجض لي المعنى على كيفي انجاض = ولا لي سكن بالارض لولى سكنها
والله لا جاهدها على الحق لو غاض = حتى بروابي نجد تلبس كفنها

غطرفي يا لمملكة والبسي عقــد الورود = والمعـــاني حضّري للمليك أعــقودهـا
الفرح عــم الجزيرة وزاد الجود جود = يوم أبو متعب لفاء مـــن بعيد أحـدودهـا
خــــادم البيتين ليثٍ تحيزم فـــي أسود = من نوادر لابةٍ مـــا تهــاب أســـودهـــا
طيبٍ بالطيب طيبه عــلى الطــيب يـــزود = والكـــــرم بأهل المكارم يزود بزودهــا
دارنــا دار الجـــزيرة سعدهــا بالسعـــود = تحـــفةٍ بين الـــدول عـــزها بسعودهـــا
دون أبو متــعب نجـــدد وثيقات العــهود = بيعةٍ على الوفاء مــا نقضنا أعهودهـــــا
هم أهل المعروف والأمن بحماهم يسود = دوحةٍ عن واهج الشمس يغني جـودهــا
مــزنةٍ غراء بهـــا البرق تزهــاه الرعود = من مطرها تنبت الأرض ويخضر عودها
يا مليك المملكة كــــان طق العود عود = تتبع الأحفـــاد مـــا قدّمــوه أجدودهــــا
جـــــعل أبو تركي مخــلّد بجنات الخلود = يوم حرر دارنا مـــن جـــميع أقيودهــــا
صيرميٍّ جـــرّد السيف والكــــــايد يكود = لين أطــــاعت وأعلنت للإله أسجودهــــا
ثم ورّثهـــــا حــــرارٍ عظيمين الـــجهود = ما تفـــل المعضـــلات الكــبار أجهودهـــا
مـــرحبا بالشعر ما هز غصن الورد نود = فــــــي مشاريــفٍ رفيعة عــذيٍّ نودهــــا
الملك يستاهل المدح وأفعـــــاله أشهـــود = وافياتٍ بالوفاء حــــاضرات أشهـــودهـــا
من فعوله كـــــل شعب الميامين أمحسود = دولةٍ ذرعــــانها من صليب اعضودهــــا
زادت بعبدالله الحــــــاتمي ليث الفهود = منجـــــزاتٍ للعـــــلا حركت ركـــودهــــا
عاضها عن لقمت الفقر ورقـــاها سنود = وستعدت واجــهشت بالغزير اعدودهــــا
كلنا للدين والــحق والقـــــــــايد أجـــنود = دارنا حنا ذراهـــــا وحــنا أجــــنودهــــا
دونهــــــا عبدالله بسيفه الصـــــارم يذود = عـــلى غير الأسرة المـــالكة يا كــودهـــا
ودام أبو متعب عزيزٍ على عرش الوجود = ماعلينا من كلام السعة وحشــــــــودها

ياخادم البيتين يابدر الإســـــــــــلام = لك في قلوب الناس عــهدٍ وثيقي
حييت ياتاج الشهامة والإكــــــــرام = تحــــيةٍ فـــــيها مقامك يلــــــيقي
فيك المعاني بالجواهر ولإلـــــــهام = قامـــــــوس مجدٍ للبطولة عريقي
نضرتك بعيون الأرامل والأيـــتام = تطفي لهــــــيبٍ بالضماير حريقي
انته كما غيثٍ سحــــــــابه اليا زام = يطـــرق احزوم الأرض حتى تفيقي
نبته على اصدور الفيافي والآكــام= زلٍ بدقات الأعاجـــــم أنيـــــــــقي
ياسيدي حطمت بالطيب الأرقـــــام = طـــيبٍ على بيض الدلايل حقيقي
يزهاك مطروقٍ يرفرف بالأعـــلام = يغـــــوص ببحور القوافي غميقي
يامن قراره فوق الأمـضى ولأخــتام = للحرب حرب والصداقة صـــديقـــــي
جارك بميقاف المواجيب مايـــــضام = دونه تيبّس بالوفى كل ريـــــــــــقي
حكمك ايدرّس في قواميس الأحكام = رسمت لرباب الممالك طـــــــريقي
ركزت لك في قمّة المــــــجد مرسام = صرحٍ من الألماس يبرق بريــــــقي
أنت الزعيم اللي به المجتــمع قـام = يقطف زهور العلم صاف الرحــيقي
يما ثنيت عــــزوم زراّع الألغــــــام = ويما انتشلت من المحــــيط الغريقي
كم من سجينٍ ينتظر حكم الإعـدام = اصــبح بك الحر العزيز العـــــتيقي
يبصـــم لك التاريخ عامٍ بعـــــد عام = على شرف عيش الزمان ألسحـــيقي
ترفع لك الرايات بيـــــضٍ من الخام = في راس ريحان النسـيم المــــويقــي
يعيش ابو متعب دليلٍ للإقــــــــــــدام = شامخ شموخ المرتفع من طــــويقـي
مثل السحاب اللي ركم يـــرزم ارزام = وبله على حدب الجراهيد سيــــــقي
لبست به الدنيا على غــــر الأيــام = شروق صبحٍ بالربــــيع الـــوريــــقي

ندبت قافٍ للصحيح يتحراّ = قافٍ يهجرس بالمعاني لحونه
كنه رفيف البرق بنصوب غراّ = غراّ لبس ربانها من فنونه
يوم النديم بواجبي ماستقراّ = عيّت ضعوني لاتباري ضعونه
اقفت به الدنيا على متون عراّ = مع غيهبٍ بالليل تعزف جنونه
حتّيش لو انه شجاعٍ مضراّ = في لازمي ماورّدنّه شطونه
وجر قلبي من عراويه جراّ = جر الهشيم اللي تقصّف مزونه
هشيم سدٍ فوقه المي قراّ = حتى انثلم حبسه وذابت متونه
يفر مابوجهه من الارض فراّ = مع واديٍ سيله تجاوز ركونه
على رجالٍ من نجوم المجراّ = فيهم ثقيل الدين يوفي ديونه
مرّوا كما مزنٍّ مع الوسم مراّ = من غب سيله مبرضاتٍ غصونه
نوٍّ سحابه من ربابه تبراّ = يفوح وبله من مثاني ردونه
من جرّب الأيام حالي ومراّ = يملى من النوم المقرر جفونه
ماكل شرهات الهقاوي تسراّ = ولا كل جفنٍ يبصر الحق نونه
شكواك للي مايودك مغراّ = ورجواك للعدوان ذل ومهونة
ثوبٍ على غير الحقيقة ايزراّ = مايلّبس لو لون الألماس لونه
نقيت من كي الهواجيس دراّ = شعرٍ بشيمات العرب يذكرونه
شاب الزمان وجاير الوقت كراّ = والدرب حر القيض يبّس شنونه
حطيت من دونه مجاهيم حراّ = حماّ قراها كنه الليل دونه
رقيت في راس الطويل المذراّ = وجنيت من لب الشوارد عيونه
ومدام راس العز للعز براّ = في قدرة الله شيمته ماتخونه

البارحة والنجم في غيهب الجو = يتبع مداره في غياهيب جواّ
بدعت لي قافٍ على جذوة الضّو = كنه يفصّل من لواهيب ضواّ
دق الضمير وقال لي للزمن سو = شعرٍ على حروف الفواصل ايسواّ
وزهمت مطروقٍ مثل ديمة النو = نوٍّ على نوٍّ تقفاه نواّ
الله على اللي من حفيزه لفا تو = توه وصل من يمت الشرق تواّ
ربان غراء سيلها يرهج الدو = سهاب نهابٍ على كل دواّ
ياهيه ياللي فوق كشنه تساوو = الله يجنّب دربكم كل سواّ
سوقوه لين الليل يبرد ويحلو = في روضةٍ من زاهي النبت حواّ
مرّوا على وقع السحاب وتروّوا = من مر في وقع السحاب ايترواّ
كم قبلكم في قمّة المجد حلّوا = قومٍ بهم لو يقسي الوقت قواّ
حليب وضحٍ ضيّروهن على بو = ثلاث درّتهن على جلد بواّ
ماكنهم في صفحة الأرض مرّوا = على طريقٍ للوفاء والمرواّ
يما على عسر الليالي تخاووا = وحلّوا عقودٍ كالحديد المطواّ
طابوا وحجّة طيبهم ماتورّوا = علم على وضح النقاء مايلواّ
بحضورهم تقرءا الصراحة الياجوا = وبغيابهم شيمة وقدر وسمواّ

صفحة من الماضي محا رسمهااللمس = تلوح من لمس الأصابيع ملسا
فليتها للنور بطرافها رمس = وطويتها والليل بالأرض ماامسا
مرّتبي القدرة على مجلس الأمس = ووقفت به للغد واليوم وامسا
باقي تناتيفٍ حمسها الدهر حمس = غيدٍ حمسها تالي القيض حمسا
صافحتها بمعشرقاتٍ من الخمس = خمسٍ عليهن للمواجيب خمسا
معالمٍ كانت طمسها البطى طمس = كتبٍ طمسها رايح المزن طمسا
اقفيت منها خاطري ضايقٍ عمس = أكثر من ابن سرور ضيقة وعمسا
خواليٍ للريح بورودها همس = حديث عشقٍ بين الاحباب همسا
النمر دمّى بمقلته بالزمن نِمس = ونمرود عرشه طاح وافناه نِمسا
قريت بالدنيا على حاجب الشمس = حرفٍ من الياقوت بخيوط شمسا
حرفٍ غمسته في لهب ضامري غمس = حتى غمس غض المعاليق غمسا
الليل خلاّ الارض واجبالها دمس = والصوت ماله مع دجى الليل رمسا

سقاك الغيث يادار الفضايل = صدوق النّو مردوم الخيالي
كأن البرق في محفل سحابه = جواب العلم بحروف ألسؤالي
لها في ضامري قدراً وقيمة = يضم ترابها عمي وخالي
مضالي برضها عز ومعزة = وعقدٍ من عقود العمر غالي
بلادٍ حكمت سنة مُحمد = عضيم الخُلق مصدوق المقالي
بها القرآن والسبع المثاني = على علمٍ به الإيمان عالي
حكمها المُصطفى بالحق جهراً = بعشر ألاف بسلاح القتالي
ثلاث ألاف منهم من مُزينة = على دهمٍ عريباتٍ طوالي
صقلها عن سواد الشرك حتى = كساها النور بعقود الجمالي
بعلمٍ من وضوح الحق كنه = شروق الشمس بورود الجبالي
تركها درّةٍ بيضا جميلة = كاعقد الماس في عذراء دلالي
وسلمها من السادات سادة = رجالا يوم يعدون الرجالي
ثنوا من دونها من فوق ضمّر = كا أقواس الاهلة بالعوالي
تجوس الأرض بالفرسان شعثاً = على صُمٍ صليباتٍ جِلالي
ألا يادار حبك في فوائدي = كما الريحان بالعذب الزلالي
يذكرني نسيم الغيم رسماً = من الايام والهجران بالي
يزوره مع نسايم نجد زائر = لامن المزن بالربان مالي

هات القلم وكتب على صفحة الزرف = لاسال حبره بالمكاتيب كفاّ
الله من قلبٍ على هاجسه رف = رفيف برقٍ مع سدى الأرض رفّا
سجلت بحروف المعاني امية حرف = من صافيٍ عن الشوايب مصفاّ
حاكمتهن في مفردات ألوفا عرف = حكمٍ بدستور الشريعة اموفاّ
غرفت من شاطي سراب الأمل غرف = حتى الزمان بزهرة العمر قفاّ
القلب من واقع زمانه على جرف = يمكن على درب المشاريه هفاّ
نظرة تأمل دونها يقصر الطرف = تشعل قناديل الحنين المطفاّ
يالله يامنشي سحابٍ ترازف = يدف وبله عاتي الريح دفاّ
تجعل لنا قسمٍ من الطيب يعرف = يكف جزلات المواجيب كفاّ
ياونتي ونت كريمٍ بلا صرف = منصى لزواّر العرب مايتخفاّ
حده ضروف الوقت ضرفٍ بعد ضرف = على بغيضٍ في مطيحه تشفاّ
اسرف بحاله في طريق الكرم سرف = نفسه عزيزة واشهب الوقت حفاّ
قامن عيونه بالخفاء يذرفن ذرف = يفرق هدبهن من نظرهن تكفاّ
في مامضى يخرف من المرجلة خرف = واليوم رزقه عن عوانيه جفاّ
له صحبةٍ دون الكرم تهرفه هرف = ولا له سوى كسب النواميس شفاّ