حكم الاعدام

جاني اتصاله عقب مامـر عاميـن=انهد حيلـي يـوم طالعـت الارقـام
مدري افـك الخـط واكلـم الزيـن=ولا اصـد وصدتـي صـد منضـام
وعاد اتصاله عقـب الاول بيوميـن=فتحت خط الهاتـف وطحـت بالغـام
قالت سلام وتمتمـت بـس حرفيـن=واسمع صدى صوت الحزن والترحام
ابوي مات وراح من عندي اثنيـن=انته وابوي ومابقى عنـدي أحـلام
ارجاك يالغالي تجي عاجـل الحيـن=ولا ترى وقتى حكـم لـي بالاعـدام
ماهي كذا يالذيـب حـال المحبيـن=وشلون تتركني وانا اهـواك بهيـام
القلب يرجف خوف والدمـع للعيـن=بلل خدودي واسئل اطراف الاكمـام
لك وحشتن تشفى مصايب فلسطيـن=ولك وحشتن تشفى رغد بنت صدام
سكت لحظه .. قلـت اكلمـك بعديـن=حسيت نفسي مجرمن بأكبـر اجـرام
رجعت كلمت الغـلا يـوم الاثنيـن=قلت اسمعي للعشق عادات واحكـام
انا هجرتـك ليـه يابنـت تدريـن=انتي نصيبك جاك في شرع الاسـلام
صحيح من عقبك وانا بيـن مريـن=مر الفراق ومر مـن ضيـم الايـام
اضحك وانا اصارع بعد بعدك البيـن=يابنت واحد وانقسـم كلـي اقسـام
اثـر الليالـي كلهـا زينهـا شيـن=وحال الحبايب يشبه لحـال الايتـام
مع السلامه مايجـي عشـق لثنيـن=وارجاك سامحنـي للاشـواق هـدام
واقعـك واقـع طالبـك لاتشكـيـن=هاذي حقايق كيف تغريـك الاوهـام
لوشفت جسمي قلت عمري ثمانيـن=وانا بعد عشرين لي سبعـة اعـوام
قالـت ياماجـد ياحفيـد الشواميـن=يانسل قومن كلهـا عـرف والمـام
ترى الغلا فاللي بقالي مـن اسنيـن=مركوز في قلبي مثل ركز الاعـلاام
انت الفـؤاد بغيبتـك راح نصفيـن=نصفن توفى قبـل تزويجـي بعـام
ونصفن بعد فرقاك مالـه عناويـن=ومستغربه ياكيف مـن عقبكـم دام
الحمـد للـي ماخلـق فـي قلبيـن=لتصير من بعدك عـدوات واخصـام
لو ان ربـي كاتبـن لـي عمريـن=لعيشها فرجـواك ياسيـدي اشمـام
لو خيرو بينـك وبيـن السلاطيـن=لامـاك تسواهـم ولاعشـق حكـام
واللي خلق ادم وسواه مـن طيـن=حكم الفراق اقسى من احكام الاعدام
قلت الله اكبر ماغـدت بيـن يديـن=ضاعت ولافيها غصيبـه ولا الـزام
لو منتي بذمة رجل جيـت هالحيـن=واخذك غصب و لو وقف دونك اقوام
فمان من يقبـل صـلاة المصليـن=ولاخاب من صلى صلاته ومن صام
لعلي انسـى يالغـلا يـوم تنسيـن=وتبعـد خطاوينـا ولاتـزل الاقـدام
مـع السلامـه ..طالبـك لاتدقـيـن=انهد حيلـي يـوم طالعـت الارقـام

لاااااهنت ياماجد حفيد الشوامين

عزالله انك ترجمت القصة بقصيدة أكثر بكثير من رائعة

يسعدني أكون أول من يصافح هذه الدرة

كلااااام وافي بلاشك

صح لسانك وبيض الله وجهك

تحياتي لك

كفو كفو


بيض الله وجهك وصح لسانك والله يعطيك العافيه


لاهنت لاهنت

الله الله الله
ياماجد ماجمل القصيدة

ابداع

وتناسق

رائع يا ماجد

تسلم اخوي

الله الله


ياماجد صح السانك وصح فكرك ملاااايين


على هذا النص المتميز الراااائع الذي بحق

نال كل الاعجاب

اشكرك عليه من الاعماق


دمت بهذا التألق والابداااع


ايها الرااااااااائع


لك كل الود والتقدير ,,,

صح لسانك وبيض الله وجهك على القصيده الجزله لك كل
الحب وتقدير

مأساه فعلا والضحايا الوفيين=وماجد من رجالٍ لهم موقفٍ هام
يسلم لسانك يانقي المضامين=الصحف طويت ثم جفن الاقلام

دم بعز وتقبل إجلالي

ماجد الحربي

صح لسانك و بيض الله وجهك


على هذا النص الرائع

أشهد بالله ان هذه القصيدة

متعوب عليها

راااااااااااااااااااااااااااااااااااااااااائعة جداً

أبدعت يالشاعر

صح لسانك ... بوووح راقي

دمت ودام نبض قلمك