ديوان الشاعر عجاب صالح الحنتمي المزيني

اليا طرالي مامضالي من سنين
جريت بطراف المداهيل ونه

ونة صويب ٍ طاح بين المعادين
خلوه يوم سهوم بقعاء رمنه

يامال فرقا العين يامحزن العين
والقلب صلفات الليالي برنه

ياليت عمري حول واحد وعشرين
ورجلي مابه واديٍ مايجنه

اجدد الماضي من الحين للحين
لو اليالي جرحهٍ غمقنه

وين العدود وين هاك المعاطين
وطرش ٍ لها في جمرة القيض حنه

وصوت المحال وصوت بدوٍ محيلين
ونجرٍ لهتاش الصحاري ندنه

عجاب صالح الحنتمي

ياموتري زان لي ممشاك
ياللي عن الغير مغنيني

عايرت زيتك وزايد ماك
وفللتك الصبح بنزيني

علي مع كل درب اقداك
ماتخونك الرجل والعيني

وعليك جعل الرخيص افداك
لديار ربعي توديني
عجاب صالح الحنتمي

سلام ماسقى ناشي المزن قاعه
لا لاح براقه تحن الرعودي

اسبوع لريضان مثل الزراعه
الضلع والوادي وعرق النفودي

يامفرح ابن حسين ريف الجماعه
ياشامخ الهامه عريب الجدودي

ياوافيٍ وافي مع الكل صاعه
رجال عرف وللمراجل عمودي

دله وصينيه وطيب وشجاعه
ومراجلٍ تسهر عيون الحسودي

ياعل يفداك الردي والرعاعه
ومكار دايم للجمايل جحودي

جدك عساله عند ربه شفاعه
يحل بالصعبات عقد العقودي

وبوك ماينقص مع الناس صاعه
ممشاه دايم للمراجل سنودي

وربعك تجيب الخيل دايم قلاعه
مابه زغيبي بالملاقى شرودي

واليوم حكم الدار ضافي شراعه
الله يديمك يالنظام السعودي

عجاب صالح الحنتمي

ياساق كم جيلٍ فنى وانت ياساق
باقي على البيداء لما نفخة الصور

من عمرك الباقي قبل لوي الاعناق
عطني سلف جعلك من الوسم ممطور

ودي ارتب في حياتي والاوراق
بعد الظلام اشوف شمعه من النور

حيثك جبل مايزعجك كل من واق
على حجاك اللي جلاميد وصخور

ماتمر مستشفى وماترهق ارهاق
وماتشتكي من دين باهض ومن جور

شامخ وجنبك ماشتغل فيه طقاق
وحماك يحمى كل خايف ومنحور

لو التمني ماجلب عمر ورزاق
هذا الصحيح اللي مع الناس ماثور

عجاب صالح الحنتمي

يالحنتمي لاتضيق ياكثر من ضاق
دنياك من حادور تمشي بحادور

دارة يابو صالح على كل عملاق
حتى الديار المعشبه غاديه بور

وانا قبل تخلق محلي وعملاق
ومن قبل ابوك ادم ولاني بمنكور

امم تجي وتروح ياحسن الاخلاق
وامة محمد خير من جوني انشور

اليا ذنو حولي عريبين الاعماق
احس يغشاني بعد ظلمتي نور

الناقي اللي طيبهم مشرق اشراق
حولي مزارعهم بها التمر وزهور

كرم ودين ورمح فاري وزراق
ياما كسرو مع فجة النور طابور

عجاب صالح الحنتمي

وجدي وجود اللي ورى زلفت الباب
مسجون ظلم وجاريه له عواقيب

لاقال فرجة زادو انشابه انشاب
وان جر صوته بالسجن ماله امجيب

على الزمان اللي قضى فيه عجاب
اجمل ليالي عاشها قبل مايشيب

وبعد وجوده ياعريبين الانساب
على الرجال مكملين المواجيب

غياب لكن عندنا ماهو غياب
وسط القبور وذكرهم نفحة الطيب

اهل مجالس مابها لوم وعتاب
ونجرن صدي صوته مثل قنبت الذيب

الضيف لاجاهم حفاوه وترحاب
وماهو من اللي يشذبون العراقيب

يالايمي يامال مسموم الانياب
مشوك الغاسق وسيع الغابيب

عجاب صالح الحنتمي

لايامن الشمات دورات الايام
ويصير له ماصار باللي شمت فيه

اذكر معمر يوم يضحك بصدام
عليه شعبه ثار واخلف هقاويه

قام يتخثع زي مرثوم الاقدام
اتلا حياته قلب الانسان يدميه

وكم تاجرٍ حطم صعيبات الارقام
اصبح مايلقى مايقوته ويكفيه

وكم واحدٍ حضه بعد مانسدح قام
بعد الفقر تلقى مليه مخابيه

وعن التسامح يامدور للاعلام
يوسف عفى والكيل بالصاع موفيه

اوفى لهم بالكيل من كل الانعام
قال اخوتي وضفى عليهم حسانيه

وختامها ياللي بالاسرار علام
رحمتك يامن ميت القشع يحييه

عجاب صالح الحنتمي

هل ارمضان الله يعيده علينا
بالخير ورحمه ونصرة فلسطين

ويعزنا في دارنا ويحمينا
دار السعود مرجحين الموازين

احبها من كل قلب ويقينا
حب الوطن عندي شعيره من الدين

دولة سلام وعز للمسلمينا
تحكم بشرع الله مبطي وهلحين

يالله طلبتك لاتغير علينا
الامن ماله ياهل العقل تثمين

يغافل الدنيا مع الغافلينا
ازرع حياة الاخره بالرياحين

لامت ماخلفت للوارثينا
بالقبر مايدفن معك ربع ملين

سبح وصل وقول قولن ثمينا
وعن مجلس ٍ مايعجبك دربك ايمين

عجاب صالح الحنتمي

الله يعيد العيد في كل الاقطار
في خير والامه بعيشه هنيه

لو فرحته ماهي مثل ذيك الادوار
في سن ماتكتب عليه خطيه

العب طرب ماهمني صايرِ صار
اهم شي الثوب صبحه عليه

واليوم من بعد الكبر والفلك دار
يمر كنه ايامي العايديه

لو مايسلي خاطري نظم الاشعار
وذعذاع نجد وفرض ربي عليه

لاشق جيب الثوب في وقت الاسحار
وتضيق في افجوج نجد العذيه

يالله يالمعبود عتقك من النار
يعالم ٍ بالبينه والخفيه

في يوم لاحاكم والا فيه تجار
عند الولي كل الخلايق سويه

عملك ياينزلك منزال الابرار
والايحطك وسط نار ٍ لضيه

عجاب صالح الحنتمي

مريت تنومه على ثاني العيد
وياليتني عنها مجنب ومرتاح

وكملت عيدي دون ضيقه وتنكيد
سالي مع السالين بيام الافراح

ذكرت فيها يوم انا توي اوليد
ادرس ودور للفوايد والارباح

ياطيب من يسكن بها دون تحديد
دين وكرم ماهو مباغيض وشحاح

الحي جعله ماتجيه الواهيد
ومن مات في ذمة عليماُ بالارواح

للحزن في قلب المولع مواعيد
وانا الحزين اللي شكى حزن وجراح

لاشفت بعض رسومنا والمواريد
اون ونة شايب ِ من كبر طاح

عجاب صالح الحنتمي