باسم الحروب اهل الثلاث الوكادي

*باسم الحروب اهل الثلاث الوكادي*
*المعجزات البينات الصحيحات*

*من ماضي الايام ماهن جدادي*
*قدام وقت العولمه والدعايات*

*فيهن شهد قبل الصديق المعادي*
*حقايقن ماهي حلوم وخرافات*

*يامرحبا من عود جاوي وكادي*
*واحلا من السكر حلا عشر مرات*

*بضيوفنا من طيبين المبادي*
*بلي مرويت النمش والرهيفات*

*يوم القبايل بين منكف وعادي*
*ياما غزو فوق الركاب الاصيلات*

*وعلى السبايا في نهار الطرادي*
*يردون حوض الموت ورد الضميات*

*مايذبحون الاعقيد الشدادي*
*والا مجوخ مايهاب الصعيبات*

*ابيوتهم عن التقى بالحمادي*
*يوم المجاعه والسنين الشحيحات*

*في شوفهن يفرح غريب البلادي*
*يقلط على حلو النبا والتحيات*

*قبل العلوم ادار دله وزادي*
*ينسى التعب والهم تحت الظليلات*

*الطيب من توفيق رب العبادي*
*علام مانخفيه في كل الاوقات*

*عملة وفاء ماهو مهايط اربادي*
*يغيب وقت الازمه والمهمات*

*وان فازبه منا فتى شي عادي*
*مابه غرابه نصنع المستحيلات*

*يامحمد الفالح بك الكل شادي*
*فعلك ينومس يابعد كل شمات*

*الجيب جعله يابيض الوجه فادي*
*والجار في رحمة عليم الخفيات*

*ياطيب الخوه نصيح الفوادي*
*الطيب يبقاله مع الناس بصمات*

*مثل فعايل متعبين الجيادي*
*ربعك رويثه بالسنين القديمات*

*اليا ثنو من دون قطم التوادي*
*هيهات يامدور على الفود هيهات*

*قلت الصحيح برغبتي واجتهادي*
*وماقل دل ومسك عذبات الابيات*

*يالله تهدينا طريق الرشادي*
*يامخرج الحيين من بطن الاموات*

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

صح السانك يابو تركي
شاعر جزل لله درك

	المشاركة الأصلية كتبت بواسطة الحب الباقي

	صح لسانك مليون على القصيده والله يـعـطـيـك الـعـافيـــــــــــة بيض الله وجهك

صح بدنك يابن العم

	المشاركة الأصلية كتبت بواسطة حسيـن

	صح السانك يابو تركي شاعر جزل لله درك

صح بدنك ومشكور على مرورك

صح الله لسانك
ولاهنت
وسلم فكرك وبنانك
دمت برعاية الله وحفظة

صح السانك ونعم ب ارجال
حرب الهوايل يستاهلون
ونت ما قصرت تسلم