الطيَب الي بطيبه تفخر ربوعه

الطيًب الي بطيبه تفخر ربوعه = وجميع الاجناب بالحاجات ينصونه
الي استلم منصب ٍ ماجب كرسوعه = وعلى اضعوف البشر ماطير عيونه
له كلمة ٍ لانطقها دوم مسموعه =من طيب ذاته بما قاله يطيعونه
لا جاه طلاب حق يهدي لروعه = يعطيه حقه لو العالم يعادونه
مايعيش متجمع ٍ في وسط مجموعه = والخبط وراه لان الطق من دونه
المرجله بالفعل ماهي بمصنوعه = ماوردت ماركه للي على شونه
مع أهل الطيب والفزعات مشروعه = وممنوعة عند من همه وراء سنونه
ماهي بسنه مع اهل العرف متبوعه =والناس بالناس والعادات مضمونه
لو انها بالمنى كل ٍحسب نوعه = يقول انا الطيب الي ثبت ركونه
خلك مع الي يعز الراس وفروعه = جنب عن الي مع السكه يقودونه
من لاحمى كلمته جهز له الصوعه = حتى يضيّع قبل دربه دركسونه
الرجل نعطيه كلمة ماهي مقطوعه = مايصك من دونها بابه وكالونه
والبزر نعطيه لعبه شبه قرقوعه = يسلابها وبعدها نعطيه بالونه
نخاطب لروس فكر ٍ ماهي مصروعه = بالعرف والمعرفه والشعر واللحونه
المحترم يحترم لو قلت سنوعه = لو ضاع يلقى رياجيل ٍ يدلونه
والامعه يجهل ان الروس مرفوعه = من كثر مايردد الي هم يقولونه
والاحمق احمق مع الاصوات له فوعه= مطبوخ مشوي هل الرايات ينسونه
ولا كل كلمه تقال تصير مبلوعه = كم كلمة ٍ توصل الرجال لجنونه
رجل ٍ اليا جاه هرجه جهز فزوعه = مع دربهم جاك ماسح كل طبلونه
ورجل ٍ اليا جاه هرجه قال مدفوعه = ماحركت هاجسه ماثار قالونه
من يطرد الهرج مثل الي وراء كوعه = يحاول الحبته والناس ينهونه
لقيت صمت الرجل عن كل ممنوعه =عن كلمة ٍ من السانه تثقل ديونه
اخير من كلمة ٍ تطفي له شموعه = عند الرياجيل لا تحمي ولا تصونه
والتجربه ما تجي في يوم منقوعه = كم واحد ٍ يدعي بالعسر ياهونه
سن العقل ماسبق بسنون مقلوعه = وسن اللبن لارقل دايم يشيلونه
ومن لاعرف ويش شبره ماعرف بوعه =يبخس بحقه وخله حسب قانونه
من يتبع طمعة ٍ ماهي بمطموعه = حصادها عند من معها يحصدونه
مثله مثل من ضحك به عقل دلوعه = يصدره ماشرب مع من يبارونه
العد ما يورد اليا قل نابوعه = شاربت الماء تراهم مايمرونه
قلته وكل ٍ حسب عرفه وموضوعه = من لاعرف يشتري يمكن يبيعونه
فايز موسى البشري

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

صح لسانك لاهنت
ابداااااع
لاغرابة

	المشاركة الأصلية كتبت بواسطة الحب الباقي

	صح لسانك مليون على القصيده والله يـعـطـيـك الـعـافيـــــــــــة بيض الله وجهك

صح بدنك الله يعطيك العافيه

	المشاركة الأصلية كتبت بواسطة الكحيلة

	صح لسانك لاهنت ابداااااع لاغرابة

صح بدنك الله يعطيك العافيه

صح الله لسانك
ولاهنت
وسلم فكرك وبنانك
دمت برعاية الله وحفظة

المرجله بالفعل ماهي بمصنوعه = ماوردت ماركه للي على شونه


الله الله

ابدعت لله درك

صح لسانك بلا عدد

صح لسانك
واعتلا شانك
والله يـعـطـيـك الـعـافيـة
ويحفظك الامولا بحفظه

لاهنت وصح السانك

تقبل التقدير والاحترام

وفقك الله

صح السانك واعتلا شانك