قصيدة مجاراة

بسم الله الرحمن الرحيم
هذه القصيدة قلتها عندما توظف الولد الكبير و خفت عليه من الغربة و غارات الجهل و كنت مشفق عليه..
و أرجو أن لا يفهمها الجميع بالطريقة الخطأ بأن الولد قد غلط في شيء
بل أنا خائف عليه من تصرفات الجهل و شلل الفساد
و من شفقتي عليه قلت هذه القصيدة و رد علي ابني ممدوح بقصيدة مماثلة
و أرجو كما قلت سابقاً أن لا يحللها الجميع تحليل خاطئ
ما هي إلا تخوفاً من الغربة و مشاكلها
و أما الآن الحمد لله أولادي عندي و في وظائف و مناصب طيبة و مستقبل زاهر و ذلك من فضل ربي فالحمد لله و الشكر لله
إليكم القصيدة و لو كان بها كذبة خفيفة أرجو إن لا تعاتبوني لأني قاصدها و هي من صالحي
هي العمر 60 والله ما أبيها و 70 أكثر مشكله منها و لكن قلت حول الـ 50 لعلها تكون اقل

يا عيال أنا عمري وصل حول خمسين=ما بعدها إلا الرحلة المستملة
و انتم بغيات الجهل مستـمرين=انفوسكم في غيـها مسفهله
وقتن مضى عن التعب مستـريحين=اتبع بكم حروت براد الأظله
يا ما سهرت الليل و الناس غافين=من شانكم زرت الديـار المزلة
اقاسي الدنيا على العسـر و اللين=من خوف لا تجري عليكم اعضله
و على كذا مضيتها شهـور و سنين=و أنـــا برجاء اللي كل عقدن يحله
عامين يا ممدوح مع درب عـامين=مع كثرهن ما ارتحت يا ابوك لله
اخوك وصيته على قمة الديـن=الله عـلى درب الهداية يدله
اقفت به الغربة و غي الجهل شيـن=عقبـه توارالي طواري امذله
اليا اطروه تسبق ونتي عبرة العين=و قلبي تعاقب فيه مثل الأخله
ما روحت يومين مع درب يومـين=إلا التفت له و انتظر فزعتن له
و اليوم يا ممدوح دينتك الـدين=مدري متى توفيني الديـن كله
ترى سداد الدين طبع الوفييـن=راع الوفى يوفيـه قدام حله
كثر الزعل يا ابـوك وراني البين=و اركى على كبدي سوات الأهله
ان زلت النفعه عن أيامها الحين=بــــاقي الليالي ويش انا مرقبن له
قبلي يقولون الرجـال الفهيمين=مـا ضحكن إلا و البكى مردفن له
ترى ليا حطيت قـدم المصلين=منته بنافعني بدمعن تهله
هذاك يومن به تشيب المـذاهين=يـومن يفرق بين خلن و خله
ما بعده إلا ينصبن المـوازين=اهــل العمل يحصون دقه و جله
اما يجون شمال و إلا ميـامين=كلن دعوه و سلموا له اسجله
اوصيك لا تفرح عليك المعـادين=اهــل النوايا و القلوب المغله
و اوصيك لا تتبع طريق المضلين=أهل الوجيه المظلمه و المظله
عليك بالتقوى و رفقة هل الدين=ولو جاز لك ما يعجب الطير خله
لا تستدل إلا بناسن مـدلين=اغنم صباك و كل شيءٍ بحله
و ربعك ليا ساروا على المنهج الزين= خلك جمل ما شالوا الربع شله
القل ما ضر الرجال الكــريمين=اسمـع لعلك كل خيرن تدله
و المال ما سر العفون البـخيلين=اليـا قيل عد افلان و افلان خله
صلات ربي عد وبل الـودادين=و إن حـــولت من مزنتن مستهله
على نبين مرسلن للثقلين=اللي حمــاه الله من كل زلة

رد الإبن ممدوح

حي الجواب و حي من له مكانين=طيـفه وسط عيني و قلبي محله
اللي على الطاله يسوق الملايين=حسن النوايا و الوفاء مذهبن له
يا مرحبا عدت هل الهنـد و الصين=و اعداد ما خـط القلم في اسجله
يا ابوي جاني من كـلامك عناوين=ابنك تكلم و استمع جابتن له
ما دامها تدخل و تطلع على الـزين=وقفت خواطر ما اثرت فيك خــله
اجامل الأنذال لأجـل العزيزين=و إلا تــرى يا أبوي ماهي مذلة
و إن كانها وصلت من الخشـم للعين=لا والله إلا اجـي من اقصاي كله
اللي تهاون فيك مسـكين مسكين=اقوله و انتـه ليا جاك قله
اني على متنك من يسار و يمين=سيفن ليا جـات اللوازم تسله
يا ابوي انا متـعلقن بين جدين=متمكنين الطيب دقـه و جله
شبلك على حقه طليق الـذراعين=و عن حق غيره شايمن ما استحله
اللي تبا هالحين هالحين هالحين=اشـــر ابصوبه و انس همه و خله
ان كان ما آقف في نحور المعـادين= بالله قـلي ويش انا عايشن له
يا ابوي حنا بالمواقيف قــاسين=مـن اعتزى فينا احجاجه نفله
و اليا حضرنا في اصفوف المصلين=ذكـر الولي هو خير ما نستهله
اختامها في ذكر من يـملك الدين=فـي يوم مابه ظل يا كود ظله
صلوا عدد ما ضج صــــوت الملبين=عـلى نبين جاب خير الأدله

صحت السنتكم
والشبل من ذاك الاسد

صحت السنتكم
والله يهدي شباب المسلمين ويحميهم من كل مكروه
صوت وصدى

من اروع مايكون
لاهنت شاعرنا القدير

تسجيل تواجد في منبر الجزاله
صحت السنتكم
والله يـعـطـيـكم الـعـافيـــــــــــة
بيض الله وجيهكم

صح لسان الشاعر الكبير المخضرم الاستاذ محمد سماح


على هذه القصيده الجزله القيمه المفيده للجميع


وصح لسان الشاعر ممدوح على الرد الوافي

ولاغرابه بذلك لان هذا الشبل من ذاك الاسد


وكذلك ابداعات ابنك مشعل لاني اعرف انه شاعر محترف
وقد سمعت له عدة قصائد جميله جدا


تحيتي

صح الله لسانك يا القرم
والله يـعـطـيـك الـعـافيـــــــــــة
بيض الله وجهك

صح لسانك على القصيده الجزله
والرد الجزل من ابنك ممدوح
الله يخليه لك ويصلح الابناء جميع

شاعرنا الكبير/ محمد بن سماح


صح لسانكعلى هذه القصيدة وصح لسان الشاعر/ ممدوح على المجاراة

	المشاركة الأصلية كتبت بواسطة فهد فهيد

	صحت السنتكم والشبل من ذاك الاسد

ماعليك زود
اشكرك على مرورك ومتابعتك وهذا الاطراء الجميل
تقبل تحياتي ..

	المشاركة الأصلية كتبت بواسطة الكحيلة

	صحت السنتكم والله يهدي شباب المسلمين ويحميهم من كل مكروه صوت وصدى من اروع مايكون لاهنت شاعرنا القدير

الشاعره الفاضله
شكرا على المرور والمتابعه وهذا الاطراء الجميل
تقبلي تحياتي . حفظك الله