قبل هدات السباع اللي على روس الرجوم

السلام عليكم ورحمة الله وبركاته

قبل هدات السباع اللي على روس الرجوم=وقبل جزلات الشوارد نستهل أمثالها
عن طنوخٍ يوم لبوا ما لفوا بالشعر زوم=ومن صدوقٍ ما شقرها وحاسبٍ معدالها
يا سلام الله سلامٍ مثل همال الغيوم=ومثل رعاد المخيلة لا أركزت بخيالها
ردةٍ فيها المعاني سلمها حسب السلوم=لا تعب فيها جملها ولا أتعبت جمالها
وبعد مضمون التحايا يا معاقيل العلوم=يا فخر للديرة اللي تفتخر بأجيالها
مانبي ضرب الدفوف ولا نبي حب الخشوم=ولا نبي كلمة تضيع عمها مع خالها
ولا نبي من لا تمثل قال هالدنيا سهوم=تعطي اللي ما طلبها وتاخذ اللي جالها
ديرتي دارٍ عزيزة وان بغت فوق النجوم=فالكم جزل المعاني والجزيلة فالها
ما مضى قدام كوم وتالي الايام كوم=داركم أمٍ حنون وكل أبونا عيالها
لو نعلق في قبايل بد واحد في اللزوم=وسد عالي للثمينة لا ذرف مكيالها
يا سلام الله على اللي لا دعى الداعي يقوم=ويثني الركبة لداره ثم حط عقالها
ان دعاه الدار هلا لو يسوم الروح سوم=وإن ثنى دون الحمولة لو ثقيلة شالها
ياعيون الشعر هبي مابعد ذا اليوم يوم=جملينا في الحمول خفافها وثقالها
وذكّري منه تغيب قوْل .. مكفي الهموم=الله يخلي في اللوازم للرجال رجالها
ديرتي لابعدت عنها ما هناه الطرف نوم=ديرتي خلف المحاني عالياً منزالها
دونها نسل الحرار اللي على العزة تحوم=لو تقرنس ما اتَّغيَّب فوق روس جبالها
قوم لانادى المنادي وعند ثني الساق قوْم=وظل وارف للقصير اليا استظل ظلالها
كم زبنها من طريدٍ ما لحقها فيه لوم=وكم حضرها من ضعيفٍ واغتنى في جالها
يحفظ الله أهل دارٍ دون موطنهم قروم= ما تهاب الفتنة اللي يفتلون حبالها
عشت يادار السعود ويا عسى عزك يدوم=ويا عسى الاسرة تدم ولا يغيب هلالها
وفي الختام أختم كلامي بالتحية للعموم=ويا عساها بعد تمت شرفت من قالها

قبـل هـدات السبـاع اللـي علـى روس الرجـوم===وقـــبـــل جــــــزلات الـــشـــوارد نـســتــهــل أمـثــالــهــا

ياسلام عليك يابو هاني اذا هناك مركز للاباع فانت مركزة
اخي ابوهاني الرفع عقالي لك شخصياًو لهذه الدره الثمينه
تقبل تحياتي وتقديري

	المشاركة الأصلية كتبت بواسطة ابوفارس الجريسي

	قبـل هـدات السبـاع اللـي علـى روس الرجـوم===وقـــبـــل جــــــزلات الـــشـــوارد نـســتــهــل أمـثــالــهــا ياسلام عليك يابو هاني اذا هناك مركز للاباع فانت مركزة اخي ابوهاني الرفع عقالي لك شخصياًو لهذه الدره الثمينه تقبل تحياتي وتقديري

يسلم رأسك يابو فارس
ماعليك زود يالغالي والله أن يصح بدنك
دمت بألف ألف خير والله أن يحفظك ويرعاك

تسجيل تواجد في منبر الجزاله
صح لساانكـ يا القرم
بيض الله وجهك

صح الله لسانك
ولاهنت
وسلم فكرك وبنانك
دمت برعاية الله وحفظة

اديبنا وشاعرنا الكبير
محمد سعد اليوبي
صح السانك ولاهنت
ولاهان منطوقك
جزالة من اهلها

صح الله لسانك
ولاهنت
وسلم فكرك وبنانك
دمت برعاية الله

صح الله لسانك
ولاهنت
وسلم فكرك وبنانك
دمت برعاية الله

الشاعر
محمد سعد اليوبي
صح لسانك
طال الغياب وين الناس

صحت السنتكم
والله يـعـطـيـكم الـعـافيـــــــــــة
بيض الله وجيهكم