أنا حربي ولد حربي علم مرسوم فوقه سيف . بين رجاءالله وزيد سلمي

هذه المحاورة جرت بين الشاعرين رجاء الله المحمدي رحمه الله و زيد سلمي العضيلة :

رجاء الله=
هلا يا مرحبا ترحيب حربي للخوي والضيف = وللربع الحضور وغايب العالم وحاضرها
ترى الليلة ربيع قلوبنا بين الشتاء والصيف = اقوله والعرب لعل ما تنكد خواطرها
زيد=
يدوم إلك البقاء من شاعر غني عن التعريف = وحنا ناخذ علوم القبايل من مصادرها
تهيض يا رجاء الله والسنة ما هي بدايم ريف = وأنا أدور على اللي كل رجال يدورها
رجاء الله :=
هلا يا مرحبا يا زيد سلمي يا رفيق خليف = أعرفك زين وعلومك زمان العام خابرها
تهيضنا وكل الأرصدة داخل بنوك جنيف = ولا منك شريت الطايرة يا زيد طيرها
زيد=
رفيق خليف وإلي العز وأنته كيف حالك كيف = بعد ذيك العلوم اللي بعد كبرت تصغرها
يابو شيكٍ مزيف بنكنا ما يقبل التزييف = لا كن هات البطاقة هاتها نبغى نصورها
رجاء الله=
أنا حربي ولد حربي علم مرسوم فوقه سيف = وقل لمطير فوق أعلامها ترسم خناجرها
أنا ماني مزيف وأنته البلشان بالتصريف = تعدت مستواك وتحسب الحربي مزورها
زيد :=
أنا خابرك حربي منفتل زندك ولا أنت اضعيف = لا كن مطير هرجك ما يغير في مشاعرها
أنا أبا أنشدك عن رجل تبين وأختفى ما شيف = عسى ماهو شريكٍ للجنايز في مقابرها
رجاء الله :=
عليك الهون قبل نطلع أوراقك من الأرشيف = ونمزح مع مطير و ياقف الماء في حناجرها
هذاك الرجل من عربانكم بالأسم والتوصيف = وكاننه يهمك سند الديرة وحدرها
زيد :=
ملفي يارجاء الله ما حذفته في حدود السيف = شناباتي تدسمها فعولي ما تغبرها
مادام علومكم صارت كذيا ولعوا بالليف = وتلقى مسفرة بكره وحججها وزورها
رجاءالله :=
ملفك زين لا كن به حروف محرفه تحريف = وأضنك ورطتك أم الكباير في كبايرها
بشب النار في روس العدى وأبا أرفع التكليف = وأبا أكحل عيون العير وأكسر مناظرها
زيد :=
ملفي حافظه ما هو ورق في مكتب التوظيف = يا راع الصرة اللي لك ثلاث أشهر تصرصرها
أنا أبا أقابل الحربي معي شلفا وحد ارهيف = ولن كسر يديك العير ما تقدر تجبرها
رجاءالله :=
ليا جينا الصحيح قلوبكم يبغى لها تنظيف = وصرتنا قنابل فوق حجانك نفجرها

رحمة لله على الشاعر رجاء الله محاورة جزله ومشكور على النقل

الله يـعـطـيـك الـعـافيـــــــــــة يــابــن الــعــم

بيض الله وجهك