ديوان قصائد الشاعر(بخيتان البشري)

نخلـق علـى الدنيـا وحنـا بريين=واعمـارنـا فــي عـلــم رب الـبـريـة
ونكـبـر وحـنــا فالـنـواظـر قـويـيـن=عـلــى المـشـاكـل بيـنـنـا والـزريــة
سرنا على درب المصالح حريصين=ودروب مـا فيـهـا مصـالـح عضـيـة
فالمصلحة صاحبك يقضي لك الدين=وإن كـان نخـوة مـا تـلاقـي عطـيـة
نضحك مجامل لين تدمع بنـا العيـن=والا الحقـايـق عـكـس لـكـن خفـيـة
نجـري وراء الدنيـا ولانتبـع الـديـن=ومـقـبـول مافـيـهـا ولــــه قـابـلـيـة
وباقي من اهل الطيـب لكـن قليليـن=وراع الـوفـا يلـقـى رجـال(ن)وفـيـة
النـاس فيهـم زيـن وفيهـم شياطيـن=ويــا كــم شيطـانـي عيـونـه قـويـة
إش السبب مانا علـى الـود صافيـن=ليـه الخـوي مـا عـاد يسمـح خويـة
ليـه الجفـا والحقـد صـارو عناويـن=لعلومـنـا فــي كــل صـبـح وعشـيـة
تـرى التسامـح هـو عـلاج العليليـن=سـامــح رفـيـقـك لا تـــدور جـزيــة
ما نا علـى الدنيـا ملـوك وسلاطيـن=نقـفـي لـيـا حـامـت عليـنـا المـنـيـة
حفـرة وأعــز الـنـاس عـنـا مقفـيـن=فذنوبـنـا يـانــاس كـيــف الـسـويـة

هـذه القصيـدة كتبتهـا لأبنـي
اتمنى ان تحـوز علـى رضاكـم

شيبت يا محمد وأنا في شبابـي=من كثر ما ايام العناء صافقنـي
سود الليالي والحزن عند بابـي=خاواهم الحظ الردي ليـن جنـي
امشي ولا بين مع الناس مابـي=واضحك من علومٍ قهر يضحكني
الصبر مبدأ لي ومخرج جوابـي=قانع بمقسومي وممشـاي قنـي
يا ما نظن وكم من ظـن خابـي=ويا كم علمٍ منـه العقـل جنـي
لي شايبٍ فالنايفات اعتلـى بـي=وهلت سحايب غيثه اللي سقنـي
رويت فكري ثم عرفـه سرابـي=ومن بحر ميزه بالمعاني رونـي
وان شفت وقتك يامحمد سرابـي=خلك على دربي ولاتحيـد عنـي
ولاطاب لك يومٍ به العيش طابي=لاتحسب ايـام العمـر اشرقنـي
واحذر ترى الأيام فيها انقلابـي=تمسي غني والصبح فقرك يدنـي
واحرص على دينك تجيك الوهابي=والوالدين ابذل لهـم كـل فنـي
والنفس حاسبها وصف الحسابي=ترى الكتوف اقلامهـا يرصدنـي
ولاتكون يامحمد كثيـر العتابـي=بالذات مع حـيٍ معـك يسكننـي
وياك تمشـي مـع رديٍ وهابـي=خلك مع اهل الطيب وبالجود ثني
واكرم ضيوف الله وسوق الركابي=يم القرايـب والعوانـي وحنـي
والظلم لايطريك يا لـه عقابـي=يا كـم ظالـم موتتـه تحزننـي
وشهادة الحق قولهـا لاتحابـي=ومنهو زعل منها عسى ما يثني
وياك فالمجلـس تثـر الزهابـي=خل العلـوم الخافيـة تستكنـي
ولاجيت مجلس لايضيع الخطابي=خل المعاني بالجـزل يخرجنـي
ولاتترك الفرصة ونيـل الثوابـي=في شايبٍ لقبل وغيـرك مدنـي
والجار لو دونه تقـص الرقابـي=من دون جارك خلهـن يقطعنـي
ابيك ذيب ومجلسك مـع ذيابـي=في عالي المرقـاب مـا ينزلنـي
وان قام حظك لاتهاب الصعابـي=بالحظ غصب لطاعتك يخضعنـي
هذي وصاتي لك وهـذا كتابـي=لاتلحقـك فيهـا مشاريـه منـي
اشرب معانيها ويهنى الشرابـي=ترى العلـوم الطيبـة يثمرنـي
وياالله تلهمني طريق الصوابـي=وتغفر ذنـوب بكثرهـا تعبنـي
وصلاة ربي عد وبـل السحابـي=على محمـد قالهـا كـل سنـي

زرعت الورد واسقيته بدمي ليـن ريحـه فـاح=لكن الورد خاين جـاه غيـري وقطفـه دونـي
الا يالليل يـا ظلمـة تعانقنـي بـك الأشبـاح=اسلي خاطري وانسـج بقايـا لهفـت جنونـي
وش اللي باقي إلا وش بقى يامنوتـي مـا راح=سحابت شوقي اقفت والمطر دمعة من عيونـي
بنيت احلام عمري والبناء من قمته بـي طـاح=على اشواك الغرور اللي فرشها ضيم مظنونـي
الا يا كسر جبرك في خفوقي من عذابي صـاح=وذاك الجرح ينزف داخلي من كثـرت طعونـي
انا عفت الغرام .العشق. المضوى على المسراح=لا بجلـس ولا باقـف ولا بـانـام فيـدونـي
اجل تدرون آبو الحب آبـو ذا الهـوى الذبـاح=انـا بعيـش عـزي واتـرك الأيـام ينسونـي
الا يانفـس دومـي بالغـلا ردي لـي الأربـاح=يكفي مـا خسرتـه مالقيـت اللـي يعذلونـي
نويت ارمي شماغي من عبوس الوقت والمسباح=واناظر في مرايـا وحشتـي واقـول شوفونـي

الا ياهاجسي

الا يا هاجسي هات العلوم وخافـي المكنـون=تراك اشغلتني واشغلت فكـري يـا معنينـي
أنا خابرك دايم فالعلـوم الطيبـة لـي عـون=شـيء دونهـا مرفـوض تكفـى لاتشقينـي
دموعي في عيوني يوم دمعي داخلي مصيـون=لكن هلت الدمعة غصب مـن شـي يبكينـي
أنا شلت الهموم اللي رماها وقتـي المجنـون=رماها وسط قلبي والعرب مـا هـم بدارينـي
ابيك تسلي الخاطر وتجبـر دمعـة المحـزون=ترى ما غيرك اللي باح له سدي من سنينـي
دريت بحالتي والناس عني مـا بعـد يـدرون=هـذا سـر خلـه ياصحيبـي بينـك وبينـي
وانا ما همني فالناس لو هم فالخفـا يحكـون=مكاني فوق واللـي تحـت مايقـدر يعادينـي
جريت وما لحقت الحظ وغيري فالعرب يمشون=حظوظ وحظي العاثـر مـع الأيـام ناسينـي
أنا رجال مشيي بالوفا يـوم الوفـاء عربـون=امده لرجـال اللـي علـى طبعـي تماشينـي
الاياذيب جر الصوت خل ذياب لـه يصحـون=صدى صوتك يهز جبال مـا هـز المساكينـي
اشوف الوقت مايل والليالي مالهـا مضمـون=وذيب اللي يلاقي صفحته تخلى مـن الدينـي
وراع الاولـة فالـه وغيـره دونهـا يقفـون=على العـد القـراح ليـا ورد الكـل تالينـي

اندب شبابي

اشره على نفسي بكثـر المشاريـه=مني ونفسي ماشيـة فـي هواهـا
اندب شبابي لا لفى الفكـر طاريـه=وابكي سنين الذنب منـي حواهـا
واليوم اشوف الشيب هذي حراويه=يالله نفسـي لاتخـيـب رجـاهـا
الشيب جاء زاير وبانـت مواريـه=وغفلتي لازلت ما اعـرف مداهـا
دربي ظلام ولا تعبتنـي مساريـه=وخطاي ما تدري متـى منتهاهـا
والمشكلة عارف بلا يـه وشاريـه=قلبي تبـع نفسـي ودارى خطاهـا
وبنصح عزيز(ن)لأجل اعزه واداريه=ونصحت نفسي بعد ذاقـت شقاهـا
إصحى لثوب(ن)ماكسى عيب راعيه=واترك نظر بالعين يجلـب عماهـا
والاش في طبعه حـذاري تجاريـه=كل(ن)على طبعـه علومـه بناهـا
وحذر كتاب(ن)لشقى قـاد قاريـه=ما تحصي ذنوبـك لكنـه حصاهـا
وابعد عن اللي ما تنومس شواريه=ليا بغـى الزلـة يجيبـك وراهـا
وياك من شيء يجيـب المكاريـه=النار تحرق رجـل منهـو وطاهـا
وإعداد همالن روت بـه صحاريـه=صلوا على المختار يا مـن قراهـا

بعض الغلا

بعض الغلا ياخذ له ايـام ويـروح=وبعض الغلا ياخذ له سنين مـا راح
وبعض الغلا متمكنن داخل الـروح=وبعض الغلا باقي ولو راحت ارواح
وبعض الغلا بلسم تداوى به جروح=وبعض الغلا يقفي وتبقى له اجـراح
وبعض الغلا مايحتمل سـده يبـوح=وبعض الغلا يموت والسـد مابـاح
وبعض الغلا مثل العطر دايم يفـوح=وبعض الغلا لو تدهنه عود ما فـاح
وبعض الغلا غالي ومغليه مذبـوح=وبعض الغلا بين المواليـف ذبـاح
وبعض الغلا لو قل تلقـاه مطـروح=وبعض الغلا لو ينقص الثلث ماطاح
وبعض الغلا يجري مع الدم بوضوح=وبعض الغلا من سرعته برق لا لاح
وبعض الغلا بين المخاليق مفضوح=وبعض الغلا غالي وبلحيل فضـاح
وبعض الغلا بدايته هرج ومـزوح=وبعض الغلا مايقبل انسـان مـزاح
وبعض الغلا دارن به الباب مفتـوح=وبعض الغلا لدار والبـاب مفتـاح

شربنا المُر

عسى الله لا يعيد أيام فيها الوقت يـا مقسـاه=
ويجيب أيام فيها الوقت يبدي لحظـة سـروره =
تعبنا من صواديف الزمن من كثر مـا شفنـاه=
وعانينا ولازلنا نعاني المُر من جوره =
شربنا المر كلـه والحـلا شفنـاه مـا ذقنـاه=
لأن سنين مرت قاسيـة وايام معسوره=
ومكسبنا من الدنيـا وفـي وافـي وجربنـاه=
فوقت الضيق يطلع فالظـلام ونقتبـس نـوره =
ولا نحسب حساب اللي على الضحكات جالسناه=
في لازمنا نوثق ضحكته بالصـوت والصـوره =
وباب ن ما يجي منـه الوفـا بالقفـل قفلنـاه=
وخلينا بيوته مـع مـرور الوقـت مهجـوره =
وباب الطيب لأهل الطيب والمعروف شرعنـاه=
وعلينـا بيوتـه بالمكـارم واعتلـى سـوره =
وكل إنسان عايش والحياة دروس لأهل الجـاه=
ومنهو عاش فيهـا ماتعلـم تهـدم قصـوره =
واكبر مشكلة بعض البشر مغتـر فـي دنيـاه=
وشال حمول فاقـت طاقتـه ماهـي بمقـدوره =
صحيح الجاهل اللي يمتحن نفسه ولـو تنهـاه=
ويصبح بين عُقـال الرجـال مضيـع ن دوره =
بعكس اللي على دينـه ومافـي دنيتـه كفـاه=
صحيح إن الرزين بشور عقله يكتمـل شـوره=
الا يالله تجعلنـا مـن اللـي رحمتـك تغشـاه=
نهار ن فيه بعد البعث كل الناس محشوره =
وقبل اختم كلامي العـذر مـن شـي موفينـاه=
ترى ماني بشاعر بس شخص يوضح شعـوره =
وصلى الله على محمد عدد مافالكتـب نقـراه=
وعدد ما لاح برق ن وامطرت في غبت بحوره=

ظلمت قلبك

لك في خيالي رسمتن شكلها غيـر=ولك صورتن منها بداخل عيونـي
كني فضاء وانته معي كنك الطيـر=تحوم وأيـام السعـد مـا لفونـي
اشتاق لك واصبر القلـب تصبيـر=ويا كم غيرك فالبشر مـا عنونـي
ما شفت منك ألا الجفا وكل تقصير=جيتك غلا لكـن خابـت ظنونـي
عطيت قلبك ود وقلبي جنى ضيـر=قدام تلقانـي وأنـا القـاك دونـي
يا ما خطايه لأجل شوفك بي تسير=وارجع بلا شوفك ودمعي يمونـي
توعد واجي في موعدك دون تأخير=والقى خيالـك والأمـل يحترونـي
جاك الوفاء وحساس صادق وتقدير=مني ومنك الهم والضيـم جونـي
القى من ايام العنـا داخلـي بيـر=واسقي أسى ماها بقايـا طعونـي
اتقنت دورك في هوى الحب تزوير=وانا هوى حبي صدق ما يخونـي
لا احتاج لعذارك ولا احتاج تبريـر=بنسى ليالي في هـواك ربطونـي
عسـاك تلقـى للمعاذيـر تفسيـر=وتقنع بها نفسـك قبـل يقنعونـي
ظلمت قلبك شال كـل المخاسيـر=وأنا كسبت فراق مـن يخدعونـي
لولا رمتني فـي هـواك المقاديـر=ما كان مثلـك فالبشـر يعرفونـي

بخيتان البشري=
الخبر منقول والجاهل بجهله كيف يعلـم =كيف يعلم دام فكره بالجهل ماشاف خلـه
شاف نفسه فاهم الدنيا وغيره كيف يفهم =امتطى صهوة جواده واستلم درب المذله
كيف يرجع للحقايق كيف عن ماضيه يندم =دام لعلومه مصمم ما سمع مهمـا تقلـه
المعاني لو كثيرة كل كلمة علـم مُبهـم =ماحواها لو يحاول والسبب فالأمر علـه
لو عيونه يم ذاك طويق به دايم تسلهـم =وده المرقا ولكـن القـدم عـزت تقلـه
في كلامه فكر عالي بالثقافة حيل مهتـم =الله أكبر يا زمن فيه العجايب جت مطلـه
الحمول اللي ثقيلة دونها ياقـف ويعـدم =والعذر موجود عنده دام حوله جاب شله
والعوارف للمعاني ما تبى واحد يترجـم =تعرف المنطوق والخافي لها يظهر مدلـه
قابل البشري=
كل ماقلته صحيح وانت يابخيتـان تسلـم =والعقول الراجحة درب الصحيحة ماتزلـه
ومن تداعى انه الفهمان هذا كيـف يفهـم =ان كل الخلـق تتقـدم وهويبقـى محلـه
مايرى فالكون غيره حصّل العلـم وتعلـم =مايشوف العيب في نفسه وفيه العيب كله
والأدب ياصاحبي فضّل على العلم وتقـدّم =وعلم دون اخـلاق ماهوعزللرجـال ذلـه
والمعاني صيد للشاعر ولاهي وسط معجم =وكم من رجال يبغى الشعر لكن ماحصل له
وكل شاعر ينعرف غزره ليا منـه تكلـم=والعيون الفاحصة ماتخطي دقاقـه وجلـه
فيه شاعر مايقصروفيـه للقيفـان ينظـم =والعديد اللي يصيـد النايفـات المستقلـه
والهواجس بنـدق الشاعرليامنـه تحـزم =احدتاصل بندقه مرماه واحـد ن ماتصلّـه

يامطول الغيبة عسى ماشي خلاف=غيبتك طالت والوعد طاف عامين
العلم جعله خير يازين الأوصاف=ارسل وريح شاقي القلب والعين
لي منتظر عامين بعد الوعد طاف=ولازلت في رجو ى حنينك ليا الحين
لو شفتني واقف على راس مشراف=ما غير نسناس الهبايب يسلين
وإن كان علمك يالغلا فيه محراف=ترى العلوم اللي بها غش بتبين
كان المفارق في نظركم هو انصاف=ابشر طلبك يهون وإحنا كريمين
ماني على المقفين يازين لقاف=لك داخلي كلمة تكون بحرفين
الفاء ويكتب يالغضي قبلهاالقاف=قف يا أمل ما نتبع اللي مقفين
رح في طريقك والزمن لو غدا جاف=تكفيني الذكرى من احباب غالين