يقوله اللي بدأ بالقاف مغتاضي

يقوله اللي بدأ بالقاف مغتاضي = غيضٍ يخلي الجمل تاقف جلاميده
للصاحب اللي يشوف الوقت عضاضي = تراي اطول العنب واقطف عناقيده
الامر هين وانا ماني على حاضي = انا احمد الله محصل كل ماريده
طلبتك العام ابيك تشوف مركاضي = اوعدتني بالمجي من دون تحديده
واليوم مرن ثلاثٍ جرد وغلاضي = وانا كما اللي هجاره زود مع قيده
بعض المواعيد تشبه بعض الامراضي =حلاوة ادواه ماتعادل مناكيده
سهج المواعيد تجبرني للاعراضي = نويت الاعراض عن ساهج مواعيده
الصاحب اللي مواعيده على الفاضي = خله يزيد الجفأ يمي وانا ازيده
يصبر لي ايام لين اجمع اغراضي = اقفي على ماحصلي من مناقيده
ماني مدور بها حقٍ ولا قاضي = مابي له اثبات خوفٍ من مجاحيده
مافيه داعي نفتش تحت الانقاضي = الحق ماينجحد من كثر ترديده
والله ولاني مقلب صفحة الماضي = نسيانه اخير عندي من محاميده
ابترك الحق شيمه له ومتغاضي = لو يحسبنه غلبني فيه من جيده
الكل مناّ على رايه وهو راضي = يعدها من بطولاته على سيده
يعتاض عني وانا اقفي عنه واعتاضي = باللي يجود مواعيده بتوكيده
ماني بحاسد ولاداعي للابغاضي = لكن وجهة نظر للي تبي تفيده
الزاد لصار مابه بعض الاحماضي = يسمج مذاقه وتسخينه وتبريده
البارق اللي شمال سواج نهاضي = ماسال سيله ولاخرج تماديده
حتى الهماليل مايملن الاحواضي = صيفية بس تبريقه وترعيده
غر ابقميٍ يبي له فيه مقياضي = ماشي على بارقه يشعب مفاريده
يبي يجي للبن والزبد مخاضي = الظاهر انه يبي يغدي معاويده
ماكل من قال انا مرشد ووعاضي = تكون كل المواعض في مسانيده
مافيه احد مغتني يحتاج الاقراضي = مالٍ تبي تكفله يلزمك تسديده
ماينتصر بالهديه كل متقاضي = مايقطع الدرب من يمشي بتعضيده
يابن أوسيمر سماكم بارقه ناضي = جبت الرساله ولكن ردها عيده
للشاعر اللي بدار محمد القاضي = يسكن عنيزه مابين الرس وبريده
شاعر مفوه وانا فتال نقاضي = ماورد عدٍ يخوضونه وراريده
غبت بحر يشرب المغتاض ماغاضي = واللي يطول العنب يبلغ مقاصيده
مجهزٍ للصعب سوط الترواضي = ماهز قلبي كثر جنده وتهديده
يقوله اللي لجر الصوت واهتاضي = ذابت على مركز الشاره عباريده
كان الغضب بالضماير ولع اللاضي = ابليس دوبح وقال السر لوليده
غضبك ماهو مزلزل سبع الاراضي = ضاري على زوبعة نجد ومقاريده
لاتتبع مذهب التقيه والارفاضي = انهج على سنّة الهادي وترشيده
لجاك مرشد ماهو بالهرج خواضي = افهم حديثه وتفسيره وتجويده
وادراء شعور الاوادم بالتحفاضي = وراع الحدب لاتجي حده وتحديده
وان جاك من همزة الشيطان نفاضي = تذكر الله وتسبيحه وتحميده
السالفه ليتك مسوي لها اجهاضي = الهرج مالك بتلقيحه وتوليده
عن الحقايق بعينيك التغماضي = صارو مثل للعرب هارون وزبيده
لبستها للبقوم بثوب فضفاضي = وانا تجيني بثوبٍ بان تقديده
صار العوض بالجماله راس عواضي = هذا جزاء من بذل طيبه وتمجيده
وسحابة سواج والفيضه وفياضي = شبعان من عشب ماها بربر رفيده
الضين هاك الزمان شباع وارباضي = وانته تجر اللحون وروحك سعيده
وسميةٍ سيلت والضلع مافاضي = ودربت حصأ الضلع غصب وجرحت حيده
من حملها ضيقت وديان وفياضي = ومع دربها يشبع الصياد والصيده
واللي يبي يشرف العالي باالالفاضي = انا اعرفه لنوى انه يعمل مكيده
مددت خدمتك ودك تيبس لحاضي = الاسم مسلم وجنيتك عربيده
خلك بعد مددت للسرحفاضي = العمر مايقدر الرجال تمديده
واليا حصلك بتال الوقت محماضي = لحمضت شوف العماره بابها سيده
مع السلامه مادامك ماانت مرتاضي = لاتشتري فلة حجاجك بتعقيده
وفجوج نجد الكبير طوال وعراضي = لضقت ضيع لهودك مع جراهيده
ماظن ترتحاح والجلسه تحرفاضي = الوقت يرسم على وجهك تجاعيده
والااسترح فالبلد ذبان وبعاضي = ماتستوي عقب تسخينه وتجميده
وانحر عماره رهنها بنك الاقراضي = مرهونةٍ قبل صب السطح والميده
جاهد بدنياك واترس جيبك الفاضي = وان مت وانت تجاهد روحك شهيده
لشفت ميلة خصيمك خلك رياضي = عليان لثار بالحمله هبد بيده
والديك يشتك من نفسه ليا باضي = لو غز عرفه جت بممشاه تحريده

صح لسان المطيري ولسانك اخوي
مجاراه رائعه
بيض الله وجهك

	المشاركة الأصلية كتبت بواسطة البلادي الحربي

	صح لسان المطيري ولسانك اخوي مجاراه رائعه بيض الله وجهك

البلادي الحربي صح بدنك ووجهك ابيض
شكرا لمرورك الكريم

صح الله لسااانك يا معجب



رد وافي ومليااان بيض الله وجهك يا الذيب



تقبل مروري وتحياتي لك يا الغالي

صح لسانكم جميع

وعلى القوة

ابو بتال

	صح لسانك مليون على القصيده والرد يالغالي والله يـعـطـيـك الـعـافيـــــــــــة بيض الله وجهك

ماقول غير صح الله لسانك وبيض الله وجهك




قصيدة سنقرأها مرات ومرات .. فلله درك ..









ياسلااااااااااام .. ياسلاااااااااااام



كفو ..

يقوله اللـي لجـر الصـوت واهتاضـي
..............................ذابت علـى مركـز الشـاره عباريـده
كان الغضب بالضمايـر ولـع اللاضـي
..............................ابليـس دوبـح وقـال السـر لوليـده
غضبك ماهو مزلـزل سبـع الاراضـي
..............................ضاري علـى زوبعـة نجـد ومقاريـده


الشاعر العذب
معجب
..
كالعادة حضور مميز
ومسكون بالعذوبة والإبداع
قصيدة جزلة من شاعر جزل
صح لسانك وبيض الله وجهك
ودمت بفرح وسعادة

صح لسانك وسلم بنانك



قصيدة رائعه بروعة حضورك

	المشاركة الأصلية كتبت بواسطة ذيب القصيد

	صح لسانك وسلم بنانك قصيدة رائعه بروعة حضورك

صح بدنك00 وشكرا يالذيب