ديوان الشاعر/ نداءالغيداني

هذه ابيات مهديها للشاعر الكبير عبدالله بن زويبن المعمري اللذي يعد من الشعار الكبار على مستوى المملكه ودول الخليج وقد اشادوا بشعره المميز
عدد كبيرا من الشعار العمالقه والنقاد ومن لم يعرف هذا الشاعرالعملاق يستطيع ان يعرفه عن طريق قراءة او استماع اي قصيده من قصايده وسوف يلاحظ قوة الشعر والابداع والتميز اللا محدود واخيرا انصح المهتمين بالشعر بالاطلاع على قصائد هذا الشاعر

يا ابن زويبن قيل ضايع ومسكين=وغشم ومغفل وتايه ومجنون
للشاعر اللي قلدك لو بيتين= يابعد فرقك عنه والناس يدرون
انته علم للشعر وسط الميادين = من حاولوا تقليد شعرك يعجزون
كم شاعر يشهد على شعرك الزين = مثل الحميدي والعطاوي وابن عون
المملكه شعارها بالملايين= لكن مثلك بالاصابع يعدون

جوني وقالوا ودنا انا نتخاوى = نبا نسافر يم لندن ومدريد
قلت اسمحولي يا وجيه النداوى=عسى سفرنا لديره الغرب مايعيد
الغرب غرب ولا لنا فيه ماوى=ولا عندنا للي يبا يروح تاييد
مانروح لديار الكفر والمهاوى=حنا نخاف الله ونخشى المناقيد
اناخوي اللي يحب المخاوى=فوق الجيوب اللي عليها صناديد
الى عقدنا الراي مابه مراوى=نقطع طواريق الخلا لوهي بعيد
ننام في جوٍ ذيابه تعاوى=اخير من نوم على دافي (البيد)
بارض خلا منها العليل يتداوى= لسار في وادٍ سيوله تراديد
جوه وجو (ام الضباب)يتساوى=ومن اين ما وجهت تلقا به الصيد
يا زينها هدت صقور تهاوى=على الارانب والحباري ملا بيد
بفياض 0 لا فيها 0 بدو 0 لا قراوى= غير الظباء ووعول كبر المفاريد
ليال نقضيها وكنا جلا وى= عندي تصير ايامها كنهاعيد
وكل الهموم اللي بقلبي تشاوى=لاصار معي 0 سعود0وسعود 0 ورشيد

ان كان يوم انك تجينا على شان=تحيي العهود السابقة لا تجينا
خلك بعيد وخلنا مثل الاخوان=ولا تشكي الفرقاء لو انا قسينا
ان كان قلبك يالغضي تو مالان=حنا ترانا بالقسا تو بدينا
انس الزمان اللي مضت فيه الاحزان=حنا على طول الزمن قدنسينا
ما عاد يمدينا نعود لشبان=خلاص من ذاك الزمان انتهينا
انا ادري انك كنت مخطي وزعلان=لكن لاتخطي وتزعل علينا
وان كان مانت بمقتنع شفلك انسان=واشتك ترانا قبلكم قد شكينا
ياما شكينا حبك لصاحب الشان=وياما اناوياه رحنا وجينا
وياما تعبنا لجلكم مير ما بان=برهان0منكم يوم لاجلك عنينا
واخترت لي غيرك ولاني بخسران=خلاص عن حبك ترانا اغتنينا
إنته0ترى مابيننا كاين(ن)كان=حروف للذكرى كتبنا ومحينا
وان عدت لك ماني بعزوة؟؟؟=خذ الكلام اللي صحيح ويقينا
مشيت دربي صح ماني بغلطان=الله على باق المسافه يعينا
الله يعين القلب بايمان واحسان=وانه على الدرب الصحيح يهدينا

هذه الابيات موجهه للشيخ بندر محمد بن بتلاء

خذ القلم واكتـب بيـوتٍ طرتلـي=وليا انتهت قم ودها لابـن بتـلاء
اشكي عليه هموم ماتـو جتلـي=تنتل فوادي بين الا ضلاع نتـلاء
قلبي شكالي والعيـون اشتكتلـي=وانا شكيت لفاتل الـراي فتـلاء
حاولت ابا امحا ذكرياتٍ مضتلـي=مير ما امحت يامير لا ما امحت لا
الحـب ميدانـه يهـدد بقتـلـي=اشوف به كثييييير جرحى وقتلاء
وكان السلامه مثلهم ما احصلتلي=لاني بلا اولهم ولانـي بالاتـلاء

رد الاخ بندر

يـا مرحبـا برسالـة وجهتـلـي=من شاعر يختل معانيـه ختـلاء
استر قلبي والهجـوس اهجستلـي=وقمت اتخير واعتل القاف عتـلاء
صعب القوافي يانـداء طاوعتلـي=حتيش لوجات القوافي على اتـلاء
قلبـي يسويهـا ويـدي كتبتلـي=وسطرت معناها على الطرس يتلاء
سهوم الهوى قدامكـم عارضتلـي=برمحٍ شطيرٍ يشتل القلـب شتـلاء
اجموعهـا بسيوفهـا قابلتـلـي=طابور جيشٍ شكل السيـر رتـلاء
معك على وضح النقاء ما نختلـي=حيثك طويل ذراع ماانتـه بهتـلاء

اقدم لكم قصيدتي هذه التي تعبر عن نفسها واتمنى ان تحوز على رضاكم
نداء الغيداني

فرخٍ عقب ضف ريشه طارمن وكره=فـي غفلـةٍ والأوادم مايشوفـونـه
الصقر لاطار ماحـد ضامـنٍ مكـره=وإليا شهر عودته ماهي بمضمونـه
والله مادري وش اللي دار في فكـره=أخلى مكانـه وخـلا اللـي ينادونـه
الفكره اللي طرت له ماهـي بفكـره=غير مفاهيـم كـل اللـي يعرفونـه
أقول بكـره يجـي والا بعـد بكـره=وطول غيابه وحال البعد مـن دونـه
لكن لو غـاب زولـه باقـيٍ ذكـره=بقلوب ناس مثـل حالـي يعزونـه
أنا أشهد إنه حدا رجلي على ماكـره=وأتعبت حالي على شانه وفي شؤنـه
قاسيت هـمٍ جرالـي منـه ماحكـره=أثر بقلبـي وسـدي بـاح مكنونـه
وحزنٍ يلفه تقل سيرٍ علـى مكـره=أسباب علمٍ سمعته بـان مضمونـه
واحياناً الحزن (مثل الموت له سكره)=يجهد فؤاد الحزين ويسهـر عيونـه
وياهيه ياللي بدا إسمك عندنا نكـره=زودت هم الخفـوق وزدت بحزونـه
ما دام ما ضاع لك حاشي ولا بكـره=وش دخلك بين مضنونٍ ومضنونـه
يالله ياللـي علينـا حمـده وشكـره=يالواحد اللي جميع النـاس يرجونـه
لاتِسمع الناس بمحمـد خبـر يكـره=وتفرح به اللي لهم وقـت يتحرونـه
وإنك ترده علينـا اليـوم لا بكـره=وتسعد بشوفه عيون اللـي يحبونـه

ابيات خاصه للشيبان لو اني ادري ان مافيه شيبان في الملتقى 00

يامحاربيـن الشيـب لا تحاربـونـه=لو كثر في سود اللحى هي والاشناب
الشيب ماهـو عيـب لا تصبغونـه=ولا مصغر(ن)شايب ولا مكبر(ن)شاب
يصبح شعر لحيـة راد الحـظ لونـه=ابيض وتمسي كنها ريشـة غـراب
وهـذا حــرام وكـلـم تعرفـونـه=ولا خير في رجل نكث عقب ماتـاب

العـام بـاب العـز والقـدر مفتـوح=مشـرع ٍفـي ليـل وإلا صبـاحـي
لاجل الصداقة بيننـا تجـي وتـروح=عليك من حسـن الصداقـه وشاحـي
حيثك عزيز ولا بدا منـك منضـوح=شـئ يغيـر فكرتـي و ارتيـاحـي
صديقنـا نفـداه بالمـال والــروح=ونصيـر بالشـدات درع ٍ سـلاحـي
ناقف معه لين ازمة ضروفـه تـروح=حتـى يبـدل ضيقتـه بأنشـراحـي
بجهودنا عنه اكثر الحمـل مطـروح=نشيـل حملـه لا تعـثـر وطـاحـي
وإن صار له في درب الأخطار ساموح=نقـوم وندلـه طريـق الصـلاحـي
وانت الـذي صداقتـك مالهـا روح=طارت علومك مع هبـوب الرياحـي
وين الكلام اللي كتبته علـى اللـوح=رمز الصداقـة والوفـاء والتضاحـي
صداقتك بالمصلحـه ريحهـا يفـوح=بانت عيوبك مـن جميـع النواحـي
من اول ٍ لجاء الخطاء منك مسمـوح=والسـر مابينـي وبينـك مبـاحـي
واليوم بعد ان الخطاء صار مفضـوح=غيـرت رايـي واتخـذت اقتراحـي
ترى الخطاء مابيننا ماهـو مدمـوح=احـذر وخلـك للمقابيـل صـاحـي
وجير صداقتنـا علـى كـل سلتـوح=سلتوح . وإلا مـن طيـور الفلاحـي
الحاصل انّـا مالنـا فيـك مصلـوح=يا مساوي يديـن الكـرم بالشحاحـي
سلك العلاقة بيننـا صـار مجـروح=خطير قطعـه بيـن ليـل وصباحـي

هذه القصيده وجهها لي الشاعر المعروف الحميدي الحربي وهي قديمه جدا 0
*******************************************

يانداء مالجرح الحب جراحه=كم جريحٍ فنى مابريت جروحه
صرت انا في عناء والناس في راحه=دوك روحي برمح الحب مجروحه
والسبب من نهيده تقل تفاحه=هايمت بالهوى روحي على روحه
صابني في عيونٍ سود ذباحه=يوم جاني عصير بسوق منفوحه
وجنته كنها القنديل وضاحه=من سرى بالدجاء يسري على ضوحه
وقرنه اشقرغذاه بغالي أرياحه=ماتوصف بوصفه كل مملوحه
قفل قلبي مع المجمول مفتاحه=كل مااشقى لقربه تبعد شبوحه
بالدلع زايده بالوصل شحاحه=يانداء قلها ماهيب مسموحه
نلت منها العناء والناس مرتاحه=بس اجاوب حمام الورق في نوحه

**************************************
وقد رديت عليه بهذه الابيات المتواضعه 0
*************************************

يالحميدي علاج القلب واجراحه=عند مزيونةٍ بالطيب ممدوحه
عاقلٍ ماهي للاسرار فضاحه=من مزيا بنات الحور ممنوحه
بنت ربعٍ لجيش القوم نطاحه=يمنعون العداء والخيل مذبوحه
يوم كلٍ يعيش بقوة سلاحه=قبل عبدالعزيز يكمل فتوحه
واترك اللي بغي الحب سباحه=لاتطالع جمال فيه مفضوحه
لو جمال المزين تلبس وشاحه=اعص نفسٍ بحب الزين مشفوحه
غض عنه البصر لو لاح وضاحه=وانتبه يمهم لا تطري الروحه
فيه غلطات ناسٍ كنها مباحه=وانت غلطات مثلك ماهي مدموحه
كل صقر كفخ للعالي جناحه=وكل رجلٍ يميز ويش مصلوحه

انا ظروفي صعيبه وانت خابرها=وعلي زادت همومي يالله الخيره
لو المدى أيام ماهي هم نصبرها=مير البلا ياعشيري طالت السيره
النفس في غابة الاوهام قابرها=والامر عند الولي علمه وتدبيره
روحي على البعد والهجران جابرها=والا أنت ما انته بمجبورٍ بهالديره
ياما عليك العيون يهل عابرها=والقلب ما زال همه يشعب بعيره
بيني وبينك مسافه ما اقدر أعبرها=الدرب دونك طويلاتٍ مشاويره
وقتي ليالي زمانه كيف اعبرها=ارجو من الله تدبيره وتيسيره
اصبر وانا اصبر الين الله يدبرها=الحل0صبراً جميلاً مالنا غيره

هذه القصيده موجهه للاخ الشاعر العلم لافي الغيداني 0ووصفاً مختصرا لقصائده0

من شان ناسٍ جلوس0وناس وقافي=هات القصايد من اولها الى اتلاها
افتح مخازن بيوت الشعر يالافي=وقل للمعاني تجي وتمد يمناها
على رجالٍ لهم بالشعر ميقافي=ناسٍ تعرف القصايد ويش مغزاها
خل القوافي تجي قافٍ ورى قافي=وتصافح اسموع ناسٍ جات تبغاها
في شعرك العذب لطف جونا الصافي=خل الفرايد تعانق من تمناها
يامصخر الشعر هات افراد واردافي=قل للشوارد تحول عن مطاياها
يالشاعر اللي رزين ولا انت مزهافي=تعرف جزال القصايد وين منصاها
قصايدك ياوسيع العرف لاهدافي=كل يحاول يحلل ويش معناها
قصيدتك لو توصف وصف ينشافي=تشدا رياضٍ زهور العشب تملاها
ومن كامل الزين فيها بعض الاوصافي=تشبه لوضحاً شمالي نجد مرباها
من ابل الطهيمي قراها كنه سنافي=ماسوقت مع رعايا البدو حلياها
فازت بكاس المزين شقح الاشعافي=وجوها هل الصنف مير الحربي أغلاها
سيمت بليون مع مليون له صافي=ثم صد واقفى عن اللي جو لشراها
اقفى بوضحاً عليها القلب ينلافي=لوفه على اللي يعيش أيام ذكراها
وتشبه لعنقاً عليها لبسها الضافي=سبحان منهو بصاف الزين سواها
مشهورةٍ بالجمال وعقلها الوافي=تسبى عقول الرجال وتخلف ارياها
لو شافها اللي بوسط البيت يطافي=يتوق عقله وبأعلى صوت ناداها
وان سولفت من سمعها قال ياكافي=تحكي بصوتٍ يخل الناس تهواها
تسحر سموع البشر في صوتها الدافي=كم عاقلٍ يختلف عقله ليا اوحاها
في منطقة نجد مترامية الاطرافي=مابه مثيله من اقصاها ليا اقصاها
عاد انت00شعرك جماله وافي وكافي=لو جيت اوصف جماله كنه اياها
يالشاعر اللي بخيص وتعرف اهدافي=بعض الاوادم لزوم اتحقق ارضاها
مستودع الشعر ولع نوره الطافي=وارفع بصوت القصايد تحفظ اسماها
وان كان فيها صعوبه مابه اخلافي=دون قصايدك لاجل الناس تقراها
بالشعر والطيب وعلوم الوفاء وافي=منابع الطيب مصدرها وملفاها
الطيب توفي حقوقه وانت تستافي=مواري الطيب في شرواك نلقاها
ياسامع المدح مدحك ماهو بخافي=قالوه قبلي رجالٍ عند شرواها
لوجيت اعدد صفاتك خانني قافي=اخصال طيبك يعجز القاف ما احصاها
والخاتمه في البدايه قلت0يالافي=قل للقصايد علينا تمد يمناها
وقل للقوافي تجي قافٍ ورى قافي=وتصافح اسموع ناسٍ جات تبغاها
من شان ناسٍ جلوس0وناس وقافي=هات القصايد من اولها الى اتلاها

[/poem]