ديوان الشاعر عبدالعزيز دخيل الحربي

الوطن دار المعزة و رمز الاحترام = دار من هو طبَّق العدل بالوجه الصحيح
دار فيها يآمن الشعب في ظل السلام = المواطن في نعيم ن وباله مستريح
في بلاد ن عزها الله بيدين الكرام = الرجال اللي بنوها على ساس ن نصيح
ويش اعدد ويش اخلي عن الشيخ الامام = الامام اللي وصوفه قصر عنها المديح
لو ابمدح ماتجمِّل تعابير الكلام = والله إني ما باوفيه لو قولي فصيح
ذاك أبو تركي زعيم ن على الدين استقام = ومن يصون الدين يظفر على العلم المليح
ساقها يوم اخطرت له تحت جنح الظلام = ما يرده عن مراده صعيب ولا سميح
ناوي ن له مجد سابق ولا يرضى انهزام = مامعه كود اربعين ن يداوون الجريح
اربعين ن عن ملايين في وقت الزحام = كل واحد شد حيله وللعليا يصيح
ويوم جوها كرَّموها عن يدين الخِصام = حرروها يومها استنخفت والظلم زيح
ثم جاته بعدها كل مرغوبة شمام = المناطق جت تبايع على العز الصريح
للزعيم اللي خطفها وهي اغلى مرام = يوم جاها سيف الاسلام ما خلَّى قبيح
دانة ن بالعدل صينت على يدين الحشام = كل كادح لا نصاها غدا وضعه مريح
قبلة الاسلام تبقى فخر كل الانام = من يأمِّم صوبها الوجه نفسه تستريح
ندعي الله يجعل الخير يلزمها دوام = السعودية لها الشعب في حبه يبيح
ويرحم الله من جمعها على الدين التمام = نذكره في كل حزَّة عسى قبره فسيح
الوطن دايم على البال له حب وغرام = دون ذكره خاطري ما يطيب ولا يسيح
وختمها صلوا على خير من صلى وصام = النبي اللي هدانا على الدين الصحيح

[/frame]

مما جرى للنفـس عاتبـت الايـام=ببيوت شعر ن راجحات الموازيـن
عاتبتها بالقـاف شاكـي ومنظـام=وياكم شكاها من رجال ن مياميـن
إليا ذكرت صروفها عبـر الاعـوام=أونس بجوفي مثل فعـل السكاكيـن
يامـى غوينـا والْتهينـا بالاحـلام=ويامى ضحكنا ماشكينا مـن البيـن
ويامى شربنـا مـن زلال ٍ ولا دام=ويامى لعبنا في جميـل البساتيـن
ويامى مشينا للهوى حفـي الاقـدام=ويامى عسفنا من مهـارٍ مزاييـن
ويامى لهينا في مشاويـر الأوهـام=نطرد سرابٍ ماحصل منـه تمكيـن
ويامى بكينا من تباريـح الاعـوام=ويامى طربنا في زمان ٍ لنـا زيـن
ولاقد ذكرنا اللـي للاطيـاب هـدام=اللي على الموعد يجي يقضي الدين
الله يرحمنـا ليـا صـاح زهَّــام=وقال الوعد يافلان ما فيـه تخميـن
ولالك سوى ما سطَّّرن هاك الاقـلام=اللي على يسراك واللـي بالايميـن
واللا برحمـة خالقـك رب الانـام=ان كان جيت موحِّد وحافـظ الديـن
واللا تراك بصـف عبَّـاد الاصنـام=ولا ينفعك مال ٍ ولا جاهـك يعيـن
والوقت ياصاحي مطية بـلا زمـام=ما له ضمان يسير بالزين والشيـن
عزي لمن دربه ملـي ن بالاسقـام=لو ماج عن واحد لقى غيره اثنيـن
فكرت بالدنيا كمـا بعـض الاقـوام=وعرفت بن الموت له وقت ويحيـن
يامى نزل في قرم ساطـيٍ ومقـدام=ورْجال في وقت اللـوازم شياهيـن
ويامى عثا في روس قوم ٍ وحكَّـام=راحوا كما حلم ٍ توارى عن العيـن
وحنا بعدهم نسـرج الخيـل قـدام=ولا حانت الفرقـى مشينـا ملبِّيـن
كل ٍ بياخذ مع هك الـدرب مهـزام=وياتي بعدنا نـاس ماهـم قليليـن
ونبقى تحت ذيك الجنادل والاكـوام=رهن العمل واللي جنينا من سنيـن
يارب ترحمنـا ليـا حـان الاقـدام=وتلطف بنا لا لحدَّونـا المسلميـن
واقفوا اهلنا بالحزن هم والارحـام=يبكون والاجواد حضـروا معزِّيـن
واخيرهم منهو دعالـي ليـا قـام=واللا البكى ما رد للشيعـة حسيـن
وصلوا عدد ما ذعذعن طرق الانسام=علـى نبـي ٍ بيَّـن الحـق تبييـن